¡MAʼ U NÁAYAL A WÓOLEʼEX!
Yaʼab máak péeknajaʼan u yóol ikil u sen tsʼoʼontsʼonaʼal máak | ¿Baʼax ku yaʼalik le Biblia yoʼolal leloʼ?
Tu mesil julio tiʼ 2022, yaʼab tuʼuxoʼob sen tsʼoʼontsʼonaʼab máak:
«Le úuchik u kíimsaʼal le político maas kʼaj óolaʼan [le primer ministro Shinzo Abe] tu luʼumil Japónoʼ, tu beetaj u sen péek u yóol le kaajoʼ bey xan tuláakal yóokʼol kaab tumen teʼeloʼ casi mix juntéen úuchuk junpʼéel baʼal beyaʼ tsʼoʼoleʼ jach controlartaʼan u koʼonol tsʼoonoʼobiʼ» (10 tiʼ julio tiʼ 2022, The Japan Times).
«Jach sajakchajaʼan u luʼumil Dinamarca tumen juntúul máakeʼ tu kíimsaj óoxtúul máakoʼob tu centro comercialil Copenhague» (4 tiʼ julio tiʼ 2022, Reuters).
«Sudáfrica: jujuntúul máakoʼobeʼ káaj u tsʼoonoʼob tiʼ junpʼéel bar yaan tu kaajil Sowetoeʼ, ka tu kíimsoʼob 15 máakoʼob» (10 tiʼ julio tiʼ 2022, The Guardian).
«Teʼ kʼiinbesajil beetaʼab tu luʼumil Estados Unidos tu kʼiinil 4 tiʼ juliooʼ kíimsaʼab maas tiʼ 220 máakoʼob» (5 tiʼ julio tiʼ 2022, CBS News).
¿Yaan wa baʼax eʼesik yaan u kʼuchul u kʼiinil u xuʼulul u kíimsaʼal máak? ¿Baʼax ku yaʼalik le Biblia yoʼolal leloʼ?
U xuʼulsaʼal le kʼasaʼaniloʼ
Le Bibliaoʼ ku yaʼalikeʼ kuxaʼanoʼon «tu tsʼook kʼiinoʼob», le oʼolal le máakoʼoboʼ jach yaan u tsʼíiktaloʼob yéetel yaan u píitmáan u kʼasaʼaniloʼob (2 Timoteo 3:1, 3). Ikil u beetkoʼob lelaʼ le máakoʼoboʼ ku sajaktaloʼob yéetel ku péek u yóoloʼob (Lucas 21:11). Le Bibliaoʼ ku yaʼalikeʼ yaan u kʼuchul u kʼiinil u xuʼulsaʼal le kʼasaʼaniloʼ yéetel ku yaʼalikeʼ tuláakal máakeʼ «yaan u kajtal tuʼux yaan jeetsʼelil, tuʼux mix baʼal jeʼel u beetik u sajaktaleʼ yéetel tuʼux maʼalob utiaʼal u jeʼelskuba» (Isaías 32:18). Chéen baʼaleʼ, ¿bix kun xuʼulsbil tiʼ le kʼasaʼaniloʼ?
Dioseʼ yaan u xuʼulsik le máaxoʼob kʼasaʼanoʼoboʼ bey xan le nuʼukuloʼob utiaʼal baʼateloʼ.
«Le kʼasaʼan máakoʼoboʼ yaan u luʼsaʼaloʼob way luʼumeʼ» (Proverbios 2:22).
«[Dioseʼ] ku beetik u xuʼulul u yantal baʼateʼel tiʼ tuláakal yóokʼol kaab. Ku kaʼakachik le arcooʼ bey xan le lanzaoʼ, yéetel ku tóokik u carroiloʼob baʼateʼel» (Salmo 46:9).
Dioseʼ yaan u kaʼansik máak kuxtal ich jeetsʼelil, bey ken u xuʼulsil le kʼasaʼaniloʼ.
«Letiʼobeʼ maʼ ken u beetoʼob mix junpʼéel kʼaas yéetel mix junpʼéel loob tiʼ tuláakal in montaña, le lugar santooʼ, tumen le luʼumaʼ yaan u chuʼupul yéetel le naʼat ku taal tiʼ Jéeobaoʼ, lelaʼ bey jeʼex u jaʼil le kʼáaʼnáaboʼ» (Isaías 11:9).
Teʼ kʼiinoʼobaʼ Dioseʼ táan u kaʼansik tiʼ tuláakal máak maʼ u baʼateloʼob mix u meyajtiʼob u nuʼukuliloʼob baʼateʼel. Ku yaʼaliktiʼob ka u sutoʼob u espadaʼob tiʼ «u nuʼukulil u péeksaʼal luʼum» yéetel u lanzaʼobeʼ tiʼ «u nuʼukulil podar» (Miqueas 4:3).
Wa taak a wojéeltik u maasil tu yoʼolal le jatsʼuts luʼum ku prometertik Dios tuʼux maʼ tun antal kʼasaʼaniloʼ, ilawil le xook ich español «¿Es posible librarse del miedo?».
Utiaʼal a wojéeltik u maasil yoʼolal bix kun xuʼulsbil le kʼasaʼaniloʼ, ilawil le xook ich español «¡Por fin paz en la Tierra!».
Maʼ xaaneʼ jeʼel u yutstal xan ta wicheʼ
BAʼALOʼOB UNAJ A KANIK
¿Baʼaxten ku chaʼik Dios u yantal muʼyajil?
Yaʼab máakeʼ u kʼáat u yojéelt baʼaxten jach yaan pʼektajil yéetel muʼyajil way yóokʼol kaabeʼ. Le Bibliaoʼ ku yaʼalik baʼaxten yéetel ku yaʼalik baʼax ken u beet Dios.
BAʼALOʼOB KU NÚUKAʼAL TEʼ BIBLIAOʼ
Jeʼel u yantaltech esperanzaeʼ
Le promesaʼob tsʼíibtaʼan teʼ Bibliaoʼ ku tsʼáaiktoʼon esperanza teʼ kʼiinoʼobaʼ bey xan teʼ kʼiinoʼob ku taaloʼoboʼ.
LE MÁAX KU KANANOʼ
¿Yaan wa u xuʼulul le kʼasaʼaniloʼ?
Ojéelt baʼax áant jujuntúul máakoʼob utiaʼal ka xuʼuluk u beetik u kʼasaʼaniloʼob.
KʼAJ ÓOLTOʼONIʼ
Kʼáat ka kaʼansaʼakech yéetel le Bibliaoʼ
Wa yaan baʼax taak a wojéeltik yoʼolal le Bibliaoʼ kʼáat ka áantaʼakech tumen juntúul u testigo Jéeoba wa kʼáat ka tsʼaʼabaktech xook.
