Desde tu mesil marzo tiʼ u añoil 2020, le Organización Mundial de la Saludoʼ tu yaʼalaj ka u kanáantuba máak tumen tsʼoʼok u káajal u pandemial le coronavirusoʼ. U jaajileʼ maʼ tuklaʼab wa yaan u xáantal maas tiʼ junpʼéel año le kʼojaʼanilaʼ, tsʼoʼoleʼ tak beoraeʼ táan u afectartik tuláakal le yóokʼol kaaboʼ. Desde ka káaj le pandemiaaʼ u millonesil máakoʼob táan u sufriroʼob. Yaʼab tiʼ letiʼobeʼ tsʼoʼok u tsaʼayaltiʼob le kʼojaʼaniloʼ, chiʼichnakoʼob yéetel yaneʼ táan u máanskoʼob óotsilil, ichiloʼobeʼ tiaʼan xan u testigoʼob Jéeobaiʼ. ¿Baʼax tsʼoʼok u beetaʼal utiaʼal u yáantaʼaloʼob?

 Yáanal u nuʼuktaj le Comité tiʼ Coordinadores tiʼ le Cuerpo Gobernante tiʼ u testigoʼob Jéeobaoʼ tsʼoʼok u formartaʼal maas tiʼ 950 Comitéʼob tiʼ Socorro tiʼ tuláakal yóokʼol kaab. Lelaʼ beetaʼab utiaʼal u yáantaʼal le Testigoʼob ku sufriroʼob yoʼolal le coronavirusoʼ. Yaan tuʼuxoʼobeʼ le Comitéʼob tiʼ Socorrooʼ letiʼob áantik le sukuʼunoʼob jach yaj bix kuxlikoʼoboʼ. Uláakʼ tuʼuxoʼobeʼ le Testigoʼoboʼ ku kʼamkoʼob le áantaj ku tsʼáaik le gobiernooʼ. Tsʼoʼoleʼ le Comitéʼob tiʼ Socorrooʼ yaan uláakʼ baʼax tsʼoʼok u beetkoʼob utiaʼal u yáantkoʼob u maasil Testigoʼoboʼ.

 Koʼox ilik baʼax úuch Paraguay. Junpʼéel periódicoeʼ tu yaʼaleʼ yoʼolal le coronavirusoʼ yaʼab máakoʼob tsʼoʼok u pʼáatal minaʼan baʼal u jaantoʼob. Pero le Comité tiʼ Socorro yaan Paraguayoʼ tsʼokaʼaniliʼ u káajal u tsʼáaik áantaj tiʼ le Testigoʼoboʼ. Le áantaj tsʼaʼabtiʼoboʼ utiaʼal u meyajtiʼob ich kaʼapʼéel semana. Kex 30 dólares tu tojoltaj cada paquete tsʼaʼabtiʼoboʼ. Ichileʼ yaan baʼal jaantbiliʼ, baʼaloʼob utiaʼal u beetaʼal limpieza yéetel uláakʼ baʼaloʼob ku kʼaʼabéettaltiʼob. Le baʼaloʼob ku taaskoʼ utiaʼal u meyaj tiʼ kantúul máakoʼob.

 ¿Bix u kanáantkuba le máaxoʼob armartik yéetel kʼubik u paquetesil le despensaʼoboʼ? Ku usarkoʼob cubrebocaʼob, caretaʼob yéetel le kéen múul meyajnakoʼobeʼ maʼatech u jach natsʼkubaʼob yiknal u maasil. Ku yilkoʼob xan ka pʼaʼatak limpio tuláakal le baʼaloʼob ku taasaʼaloʼ yéetel ku kanáantkubaʼob tak tuʼux ku béeytal. Tsʼoʼoleʼ ku yilkoʼob u limpiokíintkoʼob le lugar tuʼux ku meyajoʼoboʼ yéetel ku desinfectarkoʼob tuláakal le baʼaxoʼob kun túuxtbiloʼ. Ku desinfectartaʼal xan le camiónoʼob tuʼux kun túuxtbil le áantajoʼ. Tsʼoʼoleʼ le paquetes kun túuxtbiloʼ ku tsʼaʼabaloʼob tuʼux desinfectartaʼan. Le máaxoʼob xan bisik le paquetes u kʼuboʼoboʼ ku kanáantkoʼob maʼ u náatsʼloʼob tiʼ le sukuʼunoʼoboʼ.

 Tu mesil enero tiʼ u añoil 2021, le Comité tiʼ Coordinadoresoʼ tu yaʼalaj ka xuʼupuk maas tiʼ 25 millones de dólares utiaʼal u yáantaʼal le sukuʼunoʼob táan u sufriroʼob yoʼolal le coronavirusoʼ. Le u Najiloʼob Betel yéetel u Comitéiloʼob tiʼ Socorrooʼ jach ku kanáantkoʼob le donaciónoʼoboʼ, le oʼolal tuláakal le baʼaxoʼob ku manikoʼoboʼ ku yilkoʼob wa maʼalob u precioil. Koʼox ilik baʼax úuch tu luʼumil Chile, le sukuʼunoʼob yanoʼob teʼ Comité tiʼ Socorrooʼ taak u manikoʼob kaʼach 750 kilos lentejas. Pero u tojol le lentejasoʼ tsʼokaʼaniliʼ u naʼakal u dobleileʼ, kex aʼalaʼabtiʼob tsʼoʼok u koʼojtaleʼ le sukuʼunoʼoboʼ tu yaʼaloʼob yaan u manikoʼob. Chéen baʼaleʼ le ka máan dos horaseʼ le máakoʼ tu yaʼalaj tiʼ le sukuʼunoʼoboʼ juntúul máakeʼ tu sutaj le lentejas tsʼoʼok u manik kaʼachoʼ. Le oʼolal aʼalaʼabtiʼobeʼ wa u kʼáatoʼobeʼ yaan u cobrartaʼaltiʼob le precio yaantiʼ kaʼach antes u naʼakloʼ.

 Chéen baʼaleʼ le ka kʼuch le sukuʼunoʼob u chʼaʼob le lentejasoʼ le máakoʼ tu yaʼalajtiʼob maʼ ken u kontiʼob. Tumen según letiʼeʼ le sukuʼunoʼoboʼ maʼ parejo u tsʼáaikoʼob le áantajoʼ yéetel ku beetkoʼob jeʼex u maasil organizaciónoʼoboʼ. Juntúul sukuʼuneʼ tu jáan beetaj u oración chéen ichil u tuukuleʼ ka tsʼoʼokeʼ tu yaʼalaj tiʼ le máakoʼ beetaʼan u listail le máaxoʼob jach kʼaʼabéet áantajtiʼoboʼ. Le sukuʼunoʼoboʼ tu yaʼaloʼob xan tiʼeʼ le kéen beetaʼak le despensaʼoboʼ ku chʼaʼabal en cuenta tuʼux u taal le sukuʼunoʼoboʼ, beyoʼ yaan u tsʼaʼabaltiʼob le baʼaxoʼob maases jeʼel u meyajtiʼobeʼ. Tsʼoʼoleʼ aʼalaʼab xan tiʼeʼ tuláakal le taakʼin ku xuʼupuloʼ siibil u beetaʼal yéetel le máaxoʼob ku yáantajoʼoboʼ maʼatech u boʼotaʼaloʼob. Le máakoʼ jach jatsʼuts tu yuʼubil bix u meyaj le Testigoʼoboʼ le oʼolal tu cobrartaj le lentejas jeʼex u yaʼalmiltiʼoboʼ, tsʼoʼoleʼ le ka tu manoʼob uláakʼ lentejaseʼ tu síiajtiʼob 400 kilos.

 Lusueʼ juntúul kiik viuda tsʼoʼok u yantal u jaʼabil. Letiʼeʼ kajaʼan Liberia yéetel cinco u láakʼtsiloʼob. Juntéeneʼ le táan u yukʼuloʼob yéetel le táan u xokikoʼob u tekstoil le kʼiinoʼ u chan áabil Lusu yaan siete años tiʼeʼ tu tsʼáaj cuenta tsʼoʼok u pʼáatal minaʼan baʼal u jaantoʼob. Ka túun kʼáataʼabtiʼ tumen le chan xiʼipaloʼ: «¿Báan túun ken k-jaant bejlaʼeʼ?». Lusueʼ tu yaʼalajtiʼ maʼ u tuklik tumen tsʼoʼok u orar tiʼ Jéeoba utiaʼal u yáantaʼaloʼob. Teʼ kʼiin jeʼeloʼ le ancianoʼoboʼ tu tʼanoʼob Lusu utiaʼal u yaʼalikoʼobtiʼ ka xiʼik u chʼaʼ junpʼéel despensa. Lusueʼ tu yaʼalaj: «In wáabileʼ tu yaʼaleʼ jach ku creertik de ke Jéeobaeʼ ku núukik le oraciónoʼob k-beetkoʼ tumen tu yilaj bix núukaʼabik le oración tin beetoʼ».

 Tu luʼumil República Democrática del Congoeʼ yaan juntúul señora kajaʼan tu tséel u yotoch junpʼéel familia tiʼ u testigoʼob Jéeoba. Le ka tu yilaj bix u paklan áantkuba le Testigoʼoboʼ tu yaʼalaj: «Le kéen tsʼoʼokok le pandemiaaʼ yaan k-beetikba u testigoʼob Jéeoba tumen letiʼobeʼ jach ku yáantkubaʼob le kéen kʼaʼabéetchajak». U yíichameʼ tu yaʼalajtiʼ: «¿Yaan a beetkaba u testigo Jéeoba chéen utiaʼal u siʼibiltech junpʼéel bolsa arroz?». Le koʼoleloʼ tu núukajtiʼ: «Maʼ chéen yoʼolal leloʼ, le bolsa arroz tu síijoʼoboʼ ku yeʼesikten jach tu jaajil u yaabiltmubaʼob».

 Jach k-tsʼáaikteʼex u diosboʼotikil yoʼolal le donaciónoʼob ka tsʼáaikeʼexoʼ, lelaʼ ku meyaj utiaʼal u yáantaʼal le sukuʼunoʼob táan u máanskoʼob óotsilil yoʼolal le pandemiaoʼ. Diosboʼotik yoʼolal le donaciónoʼob ka túuxtikeʼex teʼ donate.isa4310.com.