Reb e maruwel ni ma rin’ e piin yad bang ko fare ganong rok Levi ni gathi yad boch e prist e aram e yad ma maruwel ni yad boch e polis. En ni ir e ba tolang ko tempel e ir e ma yog e thin rorad. Immoy reb e tayol rok e pi Jew ni ka nog Philo ngak ni weliy murung’agen e maruwel ko pi polis ney ni gaar: “Bay boch e pi [Levite] ney ni yad ma matanagiy e pi mab ni ma yib e girdi’ riy nga lan e tempel. Ma boch e yad ma matanagiy mit e [tempel]. Maruwel rorad e ngar guyed rogon ndabi yan be’ nga lan e tempel ndawor ni pi’ mat’awun, ara ke oloboch ke yan ngaram. Boch i yad e ma liyeg e tempel ni be matanag, ma yad ma thilthil ko maruwel rorad ni rran nge nep’.”

Rayog ni nge yog fare Sanhedrin ngak e pi polis ney ni ngar ayuweged yad. Ma kemus e re ulung ni ke ngongliy e pi Jew ni i pag e am nu Roma ni ngaur feked talin e cham.

I weliy be’ ni boor ban’en u murung’agen e Bible ni manang ni ka nog Joachim Jeremias ngak nnap’an ni yib fapi girdien e matanag ra koled Jesus me fithrad ko mang fan ndar koled u nap’an ni immoy u tempel. Faan gomanga pi girdi’ ney e gathi yad boch e polis ko tempel ma dabi fith Jesus e re deer ney ngorad. Ku be lemnag e cha’ney ni fapi girdien e matanag nra bad ni ngkur koled Jesus ba ngiyal’ u m’on riy e ku yad boch e polis ni ma maruwel u tempel. (John 7:32, 45, 46) Boch nga tomuren, miki l’og girdien e Sanhedrin e pi matanagen e tempel nge en nib tolang rorad ni nga ranod ra koled e pi apostal. Ku dabisiy ni aray e pi cha’ nra girngiyed apostal Paul u tempel nga wen.​—Acts 4:1-3; 5:17-27; 21:27-30.