Okas ni Nge Kay e Kus Rog
I YOLOY Nick ni ma par u Oregon u Meriken ni gaar: “Tabolngin e duw ni 2014, mug fek l’agruw chi kus rog nggu warod nga bangi ban’en ni bay ko gin gu ma par riy. Ba ga’ ni aram e gin bay e Pi Mich riy ni yad ba sak’iy u tooben e pi cart rorad ni bay e babyor riy. Ba fel’ rogon e munmad rorad ma yad ma fingichiy e girdi’ ni be yib i yan u toobrad maku yad ba siminmin.
“Gathi kemus ni yad ba gol ko girdi’ ya ku yad ba gol ko gal kus rog nem. Bay reb e rran nib sak’iy bagayad u tooben e cart ni ka nog Elaine ngak, ma nap’an nug bad me pi’ e okas ni nge kay e gal kus rog nem. Tomuren, ma nap’an ni gamad ra chugur ko gin bay e re cart nem riy, ma yow baadag ni nggu warod ko gin bay e Pi Mich riy ya ngan pi’ e okas ngorow.
“In e pul ni yan ni aram rogon e n’en ni gamad ma rin’. Ra be kay e gal kus rog nem e okas rorow ma gamad be sabethin. Machane dabug ni nge yoor ban’en ni nggu weliyed. Ke pag 70 e duw rog ma gathi ri gu manang murung’agen e n’en nib mich u wan’rad. Gu lemnag nib fel’ ni nggu fil e Bible rog ni yigoo gag ni bochan e ke mulan’ug ko pi n’en ma rin’ boor e teliw ni Kristiano.
“Ku nap’an e re ngiyal’ i n’em, mug guy yugu boch e Pi Mich ni ku yad ba sak’iy u tooben boch e cart u yu yang ko re gin’em nug ma par riy. Ku yad ba gol. Gubin ngiyal’ ni yad ma fanay e Bible ni ngar pied e fulweg ko pi deer rog, ma ireray e n’en ni k’aringeg ni nge gel boch e pagan’ rog ngorad.
“Bay borran ni fitheg Elaine ni gaar, ‘Ba mich u wan’um ni gamanman e boch e tow’ath ni ke yib rok Got, fa?’ Me lungug, ‘Arrogon!’ Ngemu’ me beeg Elaine e n’en ni bay ko Isaiah 11:6-9 ngog. Ka aram mug adag ni nggu fil murung’agen e Bible, machane dabug ni nggu fek ba ken e babyor rorad ni nggu beeg.
“U lan e pi rran nga tomuren, mab ga’ ni ug weliyed Elaine nge Brent ni pumoon rok boch ban’en nug baadag ni nggu nang murung’agen, machane der ma n’uw nap’an. Rognew ngog ni nggu beeg e Matthew nge mada’ ko Acts ya nggu nang e n’en be yip’ fan ni ngan folwok rok Kristus. Ma aram e n’en nug rin’. De n’uw nap’an nga tomuren u lukngun e duw ni 2016, me m’agan’ug ngay ni nggu filed Brent nge Elaine e Bible.
“Ba ga’ nug ma athapeg ni nge taw ko ngiyal’ ni ngan fil e Bible ngog riy u gubin e wik nge ngiyal’ ni yira tay e muulung u Tagil’ e Liyor. Rug felfelan’ nug fil e n’en nri be yog e Bible. Reb e duw nge boch nga tomuren, mug un ko taufe nggu mang reb e Pi Mich. Chiney ni ke gaman 79 e duw rog e ka rug felfelan’ ni kug pirieg e baan riyul’ e teliw. Ke tow’athnageg Jehovah ni aram e ke ayuwegeg ni nggu mang bang ko tabinaw rok ni bay u ga’ngin yang e fayleng.”
