AM SUSUNNAG ni bay be’ ni fager rom nrib t’uf rom, machane ke rin’ boch ban’en ndabiyog ni ngam nang fan. Boch e girdi’ e yad ma gathibthibnag e pi n’en ni ma rin’, ma yad ma yog ni re fager rom nem e der ma dag e runguy. Gur, chingiyal’ nem ma ra fel’ u wan’um e n’en ni ka rogned, fa ngam sonnag e n’en nra yog e fager rom ngom? Faanra dabiyog ni nge weliy ban’en ngom e ngiyal’ nem, ma rayog ni ngam gum’an’nigem, ma dab mu turguy e kireb nga daken nib papey?

U m’on ni ngam pi’ e fulweg ko re deer ney, ma sana ga baadag ni ngkum nang boch. Rayog ni ngam fithem, ‘Uw feni rib fel’ rogon ni gu manang e re fager rog ney, ma mang fan ni gu baadag daken?’ Rayog ni ngam rin’ ni aram rogon. Machane, mu lemnag e re n’ey: Ere gathi rayog ni ngan fanay e re fanathin n’ey nge yag ni ngad nanged e fulweg ko fare deer nriyul’ nder ma runguydad Got?

Sana ba mo’maw’ ni ngam nang fan boch ban’en ni ke rin’ Got, ara ra balyangan’um ko pi n’en ni ke pag be buch. Ri boor e girdi’ nra yog ngom ni Got e der ma dag e runguy ma nga rogned ngom ni ngkum turguy e kireb nga daken ni bod yad. Ere gathi fel’ ndab da gurgad ni ngad turguyed e kireb nga daken nge mada’ ko ngiyal’ ni ke yoor ban’en ni kad nanged u murung’agen? Ma fulweg riy e be yan u rogon uw feni ri ga manang rarogon Got. Mu fithem ni nge lungum, ‘Mang e pi n’en nib fel’ ni ke rin’ Got ni fan ngog?’

Faanra kam mada’nag e magawon u lan e yafas rom, ma sana rayog ni nga mog ni Got e gathi fager rom. Machane am lemnag. Got e ir e ke k’aring e magawon nga lan e yafas rom fa ir e ke tow’athnagem? Kad nanged ni gathi Jehovah e “be gagiyegnag e girdi’ nu fayleng” ya Satan. (John 12:31) Ere Satan e ir tapgin yooren e gafgow nge tin de mat’aw ko re fayleng ney. Ma dabisiy nbochan ndawor da flontgad, ma yu ngiyal’ e ma buch boch ban’en nra magawonnagdad.

Machane, mang e ke rin’ Got? Mu lemnag e n’en ni be yog e Bible: ni Got e “ir e sunumiy e tharmiy nge but’”; ma re n’ey e be puguran ngodad ni “rib fel’” rogon ni ke sunmiy Got dowdad. Maku be yog e Bible ni ‘ir e bay e pogofan rodad u pa’.’ (Psalm 124:8; 139:14; Daniel 5:23) Mang e be yip’ fan e pi n’em?

Re n’ey e be yip’ fan ni yafas rodad e ke mil fan ngak e en Ke Sunmiydad. (Acts 17:28) Maku be yip’ fan ni yafas rodad ni ke pi’, nge pi n’en ni bay u toobdad nib fel’ yaan, nge t’ufeg ni bay rodad nge rogon nrayog ni nge fel’ e tha’ u thildad e girdi’ e gubin ni ke pi’ ngodad nib tow’ath. Re n’ey e kub muun ngay boch ban’en ni bay rodad ni ma ayuwegdad ni ngad ried lamen ban’en, ma gad thamiy ban’en, ma gad rung’ag ban’en, miki yag ni ngad farayed bon ban’en. (James 1:17) Ere gathi bochan ni ke mang e Fager rodad ma bay rogon ni ngad ted fan, ma nge pagan’dad ngak nbochan e pi tow’ath ney ni ke pi’ ngodad?

Sana ba mo’maw’ ni nge pagan’um ngak Got. Sana ga be lemnag nda mu nang nib fel’ rogon ya nge yag nim pagan’um ngak. Re n’ey e ku ma buch. U lan e pi article ney nib ngoch, e ba mo’maw’ rodad ni ngad weliyed fan ni ma lemnag e girdi’ ni Got e der ma dag e runguy. Machane gur, gathi ba ga’ fan ni ngad athamgilgad ni ngkud nanged boch murung’agen Got? * Ke mudugil u wan’mad nra ngam rin’ e re n’ey, ma ga ra nang e tin riyul’ u murung’agen. Gur, ir ba Got nder ma dag e runguy, fa? Danga’, ni ‘bochan Got e ba t’uf e girdi’ rok.’​—1 John 4:8.