1. Mang fan ni ma guy reb e pilot bang i babyor ni bay e pi n’en nib t’uf ni ngan fal’eg i yaliy ko sikoki?

 GUBIN ngiyal’ u m’on ni nge changagnag reb e pilot e sikoki, ma ma fal’eg i yaliy boch ban’en ko fare sikoki. Ma yaliy bang i babyor ni bay boch ban’en riy ni rib t’uf ni nge fal’eg i yaliy. Ma faanra dabi rin’ e re n’ey, ma rayog ni nge dabi pirieg ban’en ni ke kireb ko fare sikoki, ma rayog ni nge yan me buch ban’en riy. Mus ngak e piin ni ke yoor e duw ni yad ma kol e yap’ ko sikoki e kub t’uf rorad ni ngar fal’eged i yaliy gubin ban’en ko fare gi babyor.

2. Mang e ba t’uf ni ngad fal’eged i yaliy?

² Bod rogon fagi babyor ni ma fanay reb e pilot ni bay gubin ban’en riy nib t’uf ni ngan fal’eg i yaliy ko sikoki, maku arrogodad ni ku bay boch ban’en ni kub t’uf ni ngad fal’eged i yaliy rodad, ni nge yag ni nge par e michan’ rodad nib gel ni mus ko ngiyal’ ni kad mada’naged e magawon. Ere, demtrug ko kafin da uned ko taufe ara ke n’uw nap’an ni kad nanged e tin riyul’, mab t’uf ni ngad fal’eged i yaliy rarogon e michan’ rodad. Faan gad ra lemnag nib gel e michan’ rodad, ma nap’an nra yib reb e magawon nib gel ngodad, ma rayog ni nge kirebnag e tha’ u thildad Jehovah. Ere, be ginangdad e thin nu Bible ni be gaar: “En nra finey ni ke par ni ke mudugil e nge ayuw ya ri mul.”​—1 Kor. 10:12.

3. Mang e ba t’uf ni nge rin’ e pi Kristiano nu Galatia?

³ Fare biyul ni pi’ Jesus e ke bing e kanawo’ ngak e piin Kristiano ni ngar nanged Got u reb e kanawo’ nrib fel’. Ere, rayog ni ngan mel’eg e pi girdi’ nem ni ngar manged pi fak Got. Machane, pi Kristiano nu Galatia e ba t’uf rorad ni ngar fal’eg i yaliy rarogon e michan’ rorad. (Gal. 4:9) Ya bay boch i yad ni yad be yog nrayog ni nge par reb e Kristiano nib mat’aw u wan’ Got, ni faanra ulul nge fol ko Motochiyel rok Moses. Machane, dakir fanay Got e re motochiyel ney, ma piin ni Kristiano ni gathi yad e Jew u lan e ulung e da ur moyed u tan e re motochiyel nem. Ere, gubin e pi Kristiano nib muun ngay e girdi’ nu Jew nge girdi’ ni gathi yad e Jew, e kub  t’uf rorad ni ngar mon’oggad ko tin riyul’. Ya ba t’uf ni ngar nanged ni daki ga’ fan u wan’ Got ni ngar folgad ko re motochiyel nem.

4, 5. Mang fonow e pi’ Paul ngak e girdi’ nu Galatia? Mang nib ga’ fan e re fonow ney ngodad?

⁴ Fare babyor ni ke thagthagnag Jehovah nga laniyan’ apostal Paul ni nge yoloy ngak piyu Galatia e be puguran ngodad e piin Kristiano ni dab da paged e tin riyul’ u Bible ni kad filed. Thingar dab da sulod ko pi n’en ni kad digeyed nga tomur. Ere, fare babyor ni kan pi ngak fapi girdi’ nu Galatia e rayog ni nge ayuwegdad ni gad gubin ni ngad pared ni gad ba yul’yul’.

⁵ Gadad gubin nib t’uf ni nge dab da paged talin e ngiyal’ ni kad dugliyed ni ngad pigpiggad ngak Jehovah. Mu lemnag e gal deer ney: Ka ga manang e pi n’en nim rin’ ni nge ayuwegem ni ngam fal’eg rogom ni fan ko taufe? Ma ka ga manang rogon e tafinay rom u nap’an ni kam nang Got ara ngiyal’ ni kam nang ni ke nangem Got?

6. Mang e pi n’en ni kad rin’ed ni ngad nanged Got ni gad ra weliy murung’agen?

⁶ Bay mereb i ban’en ni kad rin’ed u m’on ni kad nanged e tin riyul’. (Mu guy fare kahol ni kenggin e  “Pi N’en ni Kad Rin’ed ni Ngad Nanged Got e Rayog ni nge Ayuwegdad ni Ngad Mon’oggad i Yan ko Tin Riyul’.”) Rayog ni ngad lemniged ni aram e pi n’en ni kad rin’ed, ya nge yag ni ngad fal’eg i yaliy rarogon e michan’ rodad, ma nge ayuwegdad ni dab da sulod ko pi n’en ni bay ko re fayleng ney. Ere, taareb rogon ko fare pilot ni ma fal’eg i yaliy fagi babyor u m’on ni nge changagnag fare sikoki, ma kub t’uf ni ngad fal’eged i yaliy fapi n’en ni kad rin’ed u m’on ni ngad nanged e tin riyul’.

7. Mang e “tin nib riyul’ e thin” nib t’uf ni ngad folgad riy, ma mang fan ni ngad fal’eged i yaliy ko uw rogon ni gad be fol riy?

⁷ Taareb rogon ko fare pilot ni ma fal’eg i yaliy fagi babyor u m’on ni nge changagnag fare sikoki, ere ku arrogodad ni kub t’uf ni gad ra fal’eg i yaliy rogon e mon’og ni gad ma tay ko tin riyul’. I yoloy Paul ngak Timothy ni gaar: “Dab mpag fapi thin nib riyul’ ni kug fil ngom, ya ir e nguum fol riy, mu um par u fithik’ e michan’ nge t’ufeg ni ma yog ngodad ko taab girdi’ ni gadad ma tay Kristus Jesus.” (2 Tim. 1:13) Fa “tin nib riyul’ e thin” ni be weliy Paul murung’agen e ba muun ngay gubin e pi machib ni bay ko Thin rok Got. (1 Tim. 6:3) Ni bod nrayog ni gad ra nang murung’agen ban’en ni faan gad ra yaliy yaan. Ere, ku taareb rogon ko fa “tin nib riyul’ e thin” nrayog ni gad ra fil boch ban’en u murung’agen e pi n’en nib t’uf ni ngad rin’ed ni fan ngak Jehovah. Ere, chiney e gad ra weliy e pi n’en ni kad rin’ed u m’on ni ngan taufenagdad, ma ngad fal’eged i yaliy ko uw rogon ni gad be fol ko tin riyul’.

8, 9. (a) Mang fan ni thingari yoor e tamilangan’ rodad me gel e michan’ rodad? (b) Mang nib ga’ fan e mon’og ni gad be tay, ma mang fan ni kan taarebrogonnag e re n’ey nga rogon ni ma tugul ba ken e gek’iy?

⁸ N’en ni som’on ni kad rin’ed e aram e nge yag e tamilangan’ ngodad ni ke ayuwegdad ni nge yag e michan’ ngodad. Machane, kub t’uf ni nge yoor e tamilangan’ rodad ma kub t’uf ni nge par e michan’ rodad ni gubin ngiyal’ mab gel. (2 Thess. 1:3) Ma tomuren ni kan taufegad mab t’uf ni ngad mon’oggad i yan ya nge gel e tha’ u thildad Got.

⁹ Rogon e mon’og ni gad ma tay e rayog ni ngan taarebrogonnag nga ba ken e gek’iy ni be tugul. Ri gad ma gin u nap’an ni gad ra guy ga’ngin ba ken e gek’iy nib ga’ ni faanra ba ga’ lik’ngin mab gel. Ni bod rogon boch e gek’iy ni cedar ko fare nam nu Lebanon nrayog ni nge tugul nge taw ko 120 feet (37 meter) n’umngin. Ma ga’ngin lukngun e rayog ni ngam m’ag bel’ i gaf ngay ni 40 feet (12 meter) n’umngin. (Tng. 5:15) Som’on ni yira yung ba ken e gek’iy mab papey nra tugul. Ma ra yoor e duw me ga’ kenggin i yan ma be kan lik’ngin i yan nga ar ma be palog. Ma bochan e re n’ey, ma aram e be gel i yan fare ke gek’iy ni nge mo’maw’ ni nge thig. Re n’ey e rayog ni ngan taarebrogonnag  nga rogon ni be mon’og reb e Kristiano i yan ko tirok Got ban’en. Ya nap’an ni gad be un ko fol Bible, ma rayog ni ngad mon’oggad nib papey, ma aram ma gad un ko taufe. Ma girdi’ u lan e ulung e yad be felfelan’ ni yad be guydad ni gad be mon’og. Maku rayog ni nge bung rogodad ni ngad uned ko machib u polo’ e tayim rodad, ara nge yag boch e tow’ath ngodad u lan e ulung. Ma boch e duw nga m’on ma sana gathi rib gagiyel e mon’og ni gad be tay ko tirok Got ban’en. Machane, ba t’uf ni nge gel i yan e michan’ rodad, ma nge yoor e tamilangan’ rodad, ma “gadad ilal i yan nge mus rogodad” nge taw nga nap’an ni kad gelgad ko tirok Got ban’en. (Efe. 4:13) Ere, mon’og ni gad ma tay ni gad e tin riyul’ e Kristiano e bod reb e awoch nra tugul ni nge mang ba ken e gek’iy nib gel.

10. Mang fan ni piin Kristiano ni yad ba mudugil ko tin riyul’ e kub t’uf ni yad ra gay rogon ni ngar mon’oggad i yan?

¹⁰ Susun ni mon’og ni gad be tay e dabi tal. Ya tamilangan’ rodad nge michan’ rodad u murung’agen e Thin rok Got e bod lik’ngin ba ke gek’iy ni ma ayuwegdad ni ngad pared ni gad ba gel. Ba t’uf ni nge par lik’ngin fare ke gek’iy nib mudugil. (Pro. 12:3) Ma boor e pi walag u lan e ulung ni yad be ulul ni ngar pared ni yad ba mudugil. Bod rogon reb e walag ni pumoon ni ke pag 30 e duw ni ke mang reb e piilal e be yog ni ku be ulul ni nge mon’og i yan. Miki yog ni pi thin nu Bible e ke ga’ fan u wan’ e ngiyal’ ney ko kafram. Ku be fil rogon ni ma ayuwegey e thin rok Got ni ngan dugliy ban’en, ma be felfelan’ ni ke yoor e tayim ni be fanay ni fan ko machib.

11. Uw rogon nrayog ni ngad ululgad ngad gelnaged e tha’ u thildad Jehovah?

¹¹ Faanra gur reb e Kristiano ni ga baadag ni ngam mon’og i yan ko tirok Got ban’en, mab t’uf ni ngam gay rogon ni ngam chugur ngak Jehovah. Ya baadag ni ngad lemniged ni gad ba t’uf rok, ma be pagan’dad ngak ni bod ni ma lemnag reb e bitir u nap’an ni bay ko gallabthir rok nib t’uf rorow, ara rogon e lem rodad u nap’an ni gad be chag ngak be’ nib fel’ e thin rodad. Machane, ba t’uf e tayim nge athamgil ni nge yag ni ngad chugurgad ngak Jehovah, me yag ni ngad lemniged ni gad ba t’uf rok ma be pagan’dad ngak. Ere, mu gay rogon ni ngam beeg e thin nu Bible ni gubin e rran. Mag beeg e pi babyor ni ke pi’ Jehovah ngodad. Ya rayog ni nge ayuwegem e re n’ey ni ngam nang Jehovah nib fel’ rogon me gel e tha’ u thilmew.

12. Mang e thingar da rin’ed ni faanra gad baadag ni nge par e tha’ u thildad Got nib gel?

¹² Meybil ni gad ma tay nge girdi’ ni gad ma chag ngorad nib fel’ e ngongol rorad e rayog ni nge ayuwegdad ni nge gel e tha’ u thildad Got. (Mu beeg e Malaki 3:16.) Nap’an nra “meybil” e pi fager rok  Got ngak, ma ma motoyil ngorad. (1 Pet. 3:12) Jehovah e bod reb e gallabthir ni ma t’ufeg fak, ya ma motoyil ko meybil rodad ni gad ma tay u fithik’ e kireban’. Ere, aram fan ni ngaud meybilgad ni gubin ngiyal’. (Rom. 12:12) Ya dabiyog ni ngad manged e fager rok Got ni faanra dariy e re ayuw ney rodad. Ma faanra dab da meybilgad ngak ma dabiyog ni nge yib gelngidad. Ma rayog ni nge mulan’dad ni bochan ni gad be par ko re fayleng nib kireb ney, ma ra mom rodad ni ngad rin’ed boch ban’en nib kireb. Machane, baadag ni nge ayuwegdad ni faan gad ra ning e ayuw ngak. Ere, ga ma meybil ngak Jehovah ni bod rogon ni ga ma non ngak reb e fager nib pagan’um ngak? Bay boch e kanawo’ u rogon nrayog ni ngam mon’og ko meybil ni ga ma tay, fa?​—Jer. 16:19.

13. Mang nib ga’ fan ni ngad uned ko pi muulung ni gubin ngiyal’ ni faanra gad baadag ni nge par e tha’ u thildad Got nib gel?

¹³ Ba t’uf ni ngad pared ni gad ba chugur ko ulung ya nge yag ni ngad chaggad ngak e piin ni yad e fager rok Jehovah. Yad ba t’uf rok ni bochan e yad ma ‘chel ngar sapgad ngak.’ (Nam. 1:7, BT) Ma bochan ni ke gel e kireb ko re fayleng ney, ma aram fan nib t’uf ni ngad ted e tayim ni ngad chaggad ngak e pi walagdad. Ya rayog ni nge bagadad me ayuweg bagadad ni nge par nib gel. Ma re n’ey e ra k’aringdad ni ngad daged e t’ufeg ngak yugu boch e girdi’ ma gad rin’ e “tin nib fel’.” (Heb. 10:24, 25) Ma dabiyog ni gad ra fol ko re fonow ney ni ke pi’ Paul ni faanra dab da chaggad ko girdi’ u lan e ulung. Ere, mu athamgil ni ngam un ko pi muulung ni gubin ngiyal’, mag gay rogon ni ngam pi’ e athamgil ngak e girdi’ u daken e fulweg rom u nap’an e muulung.

14. Mang nib ga’ fan ni nge gubin ngiyal’ ma ngad fal’eged rogodad ni ngad k’adedan’dad ma ngad thilyeged boch ban’en u lan e yafas rodad?

¹⁴ Ba t’uf ni ngad kalgadngan’dad ma gad pag i rin’ e tin nib kireb ban’en u m’on ni ngad manged reb e Kristiano. Machane, gubin ngiyal’ ni ngad fal’eged rogodad ni ngad kalgadngan’dad, ma gad thilyeg boch ban’en u rarogon e yafas rodad. Ma bochan ndawor da flontgad ma gad ba meewar, ere ba mom ni gad ra denen. Denen e rayog ni ngad taarebrogonnaged nga reb e porchoyog, ni ke par ni be fal’eg rogon ir ni nge k’addad ko ngiyal’ nrayog rok. (Rom. 3:9, 10; 6:12-14) Ere, dabiyog ni ngad lemnaged ni gowa dariy e meewar rodad. Jehovah e be gum’an’nag ir u puluwdad u nap’an ni gad be cham ko pi meewar rodad. (Fil. 2:12; 2 Pet. 3:9) Mu fanay e tayim rom nge gelngim ni fan e ngam pigpig ngak Jehovah, ko bin ni ngam n’ag e tayim rom nga boch ban’en ni yigoo gur e nge fel’ ngom. Reb e walag nib ppin ni chuguliy ko tin riyul’ e lemnag nib t’uf ni nge i par ni be rus ngak Jehovah, miki lemnag ndariy ban’en nrayog ni nge rin’ ni nge felfelan’nag. Ma bochan e re n’ey, ma der chugur e tha’ u thilrow Jehovah, ma boor ban’en nde puluw ni i rin’ u lan e yafas rok. Me yog ni gaar: “Kug rin’ e pi n’ey ni gathi bochan de t’uf Jehovah rog, ya bochan ni dawor gu nang nib fel’ rogon.” Ere, kug meybil ngak ni nge ayuwegeg, me yag ni nggu thilyeg boch ban’en u lan e yafas rog. Miki yog ni gaar, “Kug fil nrayog rok Jehovah ni nge pow’iyeg me ayuwegeg u rogon nggu pithig e pi magawon rog ni reb nge reb ni bod rogon reb e bitir.”

15. Mang boch e pi n’en ni manang Jesus nge Jehovah murung’agen mab ga’ fan u wan’row?

¹⁵ I yog e engel rok Got ngak Peter nge pi apostal ni ngar “weliyed ngak e girdi’ urngin ban’en” ni murung’agen fare thin nib fel’. (Acts 5:19-21) Ere, machib ni gad ma tay u gubin e wik e aram reb e ban’en ni thingar da fal’eged i yaliy, ya nge par e michan’ rodad nib gel. Ya Jesus nge Jehovah e yow manang gelngin e michan’ rodad ma yow ba felfelan’ ko athamgil ni gad ma tay ni fan ko machib. (Rev. 2:19) Ere, machib ni gad ma tay e susun ni nge ga’ fan u lan e yafas rodad.

16. Mang nib ga’ fan ni ngaud fal’eged i lemnag fan ni kad ognaged gadad?

¹⁶ Thingar um fal’eg i lemnag fan ni kam ognagem. Ya n’en ni th’abi ga’ fan e tha’ u thildad Jehovah. Ma manang gubin e piin ni yad girdien. (Mu beeg e Isaiah 44:5.) Mu fal’eg i lemnag rarogon e tha’ u thilmew Got u fithik’ e meybil. Ma  kub ga’ fan ni dab mu pagtalin e rorran ni kan taufe nigem riy. Ya re n’ey e rayog ni nge ayuwegem ni nge puguran ngom ni ireray e n’en ni th’abi ga’ fan ni kam dugliy.

17. Mang fan nib t’uf ni ngad k’adan’gad ni faanra gad baadag ni ngad pared nib chugur e tha’ u thildad Jehovah?

¹⁷ I yog Paul ngak e girdi’ nu Galatia ni dabi chalbarad i ngongliy e ngongol nib fel’. (Gal. 6:9) Ere, ku arrogodad ni kub t’uf ni ngad k’adan’dad u nap’an ni gad ma mada’nag e pi magawon. Ya ra ayuwegdad Jehovah. Ere, mu ulul ngam yibilay gelngin Got ni nge ayuwegem ni ngam felfelan’ me gapas lanin’um, ni yugu aram rogon nder m’ay e magawon rom. (Matt. 7:7-11) Am lemnag e re n’ey, Jehovah e ma ayuweg e pi arche’. Machane, gadad e kab ga’ fadad ko pi arche’. Ma baadag Jehovah ni nge ayuwegem ni bochan ni manang nib t’uf rom ma kam ognag e yafas rom ngak. (Matt. 10:29-31) Ere, yugu aram rogon ni kab mo’maw’ e pi magawon ni ma yib ngom, machane dab mu tal ko pigpig ngak Jehovah. Ma dab mu pag e tin riyul’ ni bochan e pi n’en ngkum rin’ kafram. Ya bin riyul’ riy e boor e pi n’en ni kan tow’athnagdad riy ni bochan ni kad nanged Jehovah.

18. Mang e thingari rin’ e piin ni yad manang Got e ngiyal’ ney?

¹⁸ Demtrug ko kafin mu un ko taufe fa ke n’uw nap’an, ma mang e thingar mu rin’ e chiney? Mu athamgil ni ngam nang murung’agen Jehovah nib fel’ rogon, me yag ni ngam mon’og i yan ko tin riyul’. Ma dab mu lemnag ni bochan ni kam nang murung’agen Got nib fel’ rogon e chiney, ma daki t’uf ngkum gelnag e tha’ u thilmew. Ere, thingar mu par ma ga be sul nga daken urngin e pi n’ey ni kad weliyed ko re article ney, ya nge yag ni ngam par ni gab chugur ngak Jehovah ni ir e Chitamangidad ni ma t’ufegdad, maku ir e Fager rodad, maku ir e Got rodad.​—Mu beeg e 2 Korinth 13:5, 6.