Pa Disemba 18, 2020, * luŵala lwa magambo ku Leninskiy mu dela ja Rostov-on-Don lukwembecheya kulamula magambo ga M’bale Semyon Baybak. Ŵakwimila boma pa magamboga, ŵaŵendile ŵakulamula magamboga kuti M’bale Semyon akatame mu ukayidi kwa yaka mcheche.

Semyon Baybak

• Chaka chakupagwa: 1997 (ku Rostov-on-Don)

• Mbili jakwe: Jwalakwe akwete mkulugwe soni mlumbugwe. Jwalakwe jwalijiganyisye Chitchainisi soni akusakamula masengo gakwiganya chiŵechetochi. Akusanonyela kuŵalanga soni kulemba ndakatulo

• Ali jwachinandipile, jwalijiganyisye yakwamba Yehofa kwa achinangolo ŵakwe. Paŵakulaga, jwanonyelaga kulijiganya Baibulo soni kutendaga yindu mwakamulana ni yajikusasala Baibulojo. Yindu yaŵakulupililaga yamtendekasisye jwalakwe kukana kwinjila usilikali. Mmalo mwa kwinjila usilikali, jwakamwilesoni masengo gakukolopa pa chipatala cha ŵanache mu 2015 mpaka mu 2017.

Pa Meyi 22, 2020 ŵapolisi ŵakulimbana ni ŵandu ŵakwimuchila boma, ŵajinjile m’nyumba syakwana 10 sya ŵa Mboni sya Yehofa ku Rostov-on-Don. Pali papitile ma wiki gaŵili, pa Juni 6, 2019, ŵamkatile chisamani M’bale Semyon. Kaneko jwalakwe ŵamtaŵile ni ŵatemi lisiku limo m’kachipinda kwembecheya kwimbidwa magambo. Yeleyi yatendekwe luŵala lwa magambo mkanilulamule yakuti jwalakwe aŵe pa ukayidi wa panyumba. Luŵala lwa magambo lwalamwile kuti m’baleju atame pa ukayidi wa panyumba mawiki 8 nambo kaneko ŵajonjechesyesoni mawiki gane.

Achakulungwakulungwaŵa ŵamjimbaga m’baleju magambo gakuti ali jwakulemwa ligongo lyakuti jwasimanikwe pa misongano ja dini soni ŵasalilaga ŵane pakwamba ya yindu yalijiganyisye m’Baibulo. Pa Nofemba 2019 achakulungwakulungwaŵa ŵamsimenesoni ni magambo gane gakuti jwapelekaga mbiya syakamuchisya kagulu kakwimuchila.

Tukumanyilila kuti abale ni alongo ŵetu pakupitilisya kulagasidwa ku Russia, “Mlungu jwamtendele,” chapitilisye kwapa machili ni chakulinga chakuti “atende chakulinga chakwe.”—Ahebeli 13:20, 21.