Mwakamulana ni lipoti lya pachilambo chosope lya pamkaŵapa, a chiŵandika mundu jumo mwa ŵandu mcheche ŵaliwose akusalaga ni lipowo.

•    Chido Mpemba jwali jwaŵili kwa cheyamani jwa bungwe ja World Health Organization’s Commission on Social Connection jwatite, “Lusagu mpaka lumkwaye jwalijose, mwangasamala kandu ya msingu wakwe, soni kwakutama.”

 Mwakulekangana ni yampaka aganisye ŵandu ŵajinji, lipowo likusilyakamula ngaŵape ŵandu ŵachikulile kapena ŵali jika, nambo likusilyakamulasoni ŵachinyamata, ŵandu ŵayikwajendela chenene yindu paumi wawo, soni ŵalombele. Kulisagula soni lipowo mpaka yisokonasye chilu cha mundu soni kaganisye kakwe.

•    Dr. Vivek Murthy jwakusakamula masengo ga udokotala ku U.S. jwatite, “Lipowo nganiligamba kuŵa kulagasika nganisyope.” Jwalakwe jwapitilisye kuti, “Yakusawusya yayikusayika ligongo lya lipowo yili yakulandana ni yakusawusya yayikusayika ligongo lyakukwemba ndudu 15 syasona pa lisiku.”

 Mlungu jwetu jwangasaka kuti tutameje pajikajikape. Chakulinga cha Mlungu ndaŵi syosope chili chakuti ŵandu asangalaleje soni kuŵa ŵakamulana ni ŵane.

•    Mfundo ja m’Baibulo: “Kaneko Yehofa Mlungu ŵatite, “Nganiyiŵa yambone kuti munduju apitilisye kutama jika.’”—Genesesi 2:18.

 Mlungu akusasaka kuti tuŵe najo paunasi. Akusasala kuti mpaka atuŵandichile naga tukulingalinga kumŵandichila jwalakwe.—Yakobo 4:8.

•    Mfundo ja m’Baibulo: “Ŵana upile ŵandu ŵakusamanyilila kuti akusosekwa Mlungu kuti ŵalongoleleje, ligongo Uchimwene wakwinani uli wawo.”—Mateyu 5:3.

 Mlungu akusasaka kuti tumtumichileje jwalakwe yalumo ni ŵandu ŵane. Kutenda yeleyi kukusatukamuchisya kuŵambala kulagasika nganisyo.

•    Mfundo ja m’Baibulo: “Nambosoni kwende tuganichisyaneje soni tulimbikasyaneje ni chakulinga chakuti tukomboleje kunonyelana soni kutenda yambone. Kwende tukaleka kusongana pampepe, . . . Nambo kwende tulimbikasyaneje.”—Ahebeli 10:24, 25.

 Kuti amanyilile yejinji ligongo lyakwe kuli kwakusosekwa kumasya lipowo, aŵalanje ngani ja Chichewa ja mtwe wakuti, “Anthu Ambiri Amasungulumwa Ngakhale Kuti Pali Njira Zambiri Zolankhulirana.”