Candanda, maloŵe aga mpaka gatutondoye: Mlungu akusakuwona kulaga kosope kwakukutendekwa pacilambo capasi soni akusaka kutendapo kandu. (Salimo 72:13, 14) Kupitila m’Baibulo, Mlungu ŵatulagucisye kuti ‘ŵakulaga cacakamucisya.’ Ana yeleyi yicitendekwa cakaci? “Pandaŵi jele Ambuje Yesu caciwonecela kutyocela kwinani pampepe ni malayika gawo gamacili . . . Pa ndaŵi jelejo cacipeleka cilango kwa ŵandu ŵangammanyilila Mlungu soni kwa ŵandu ŵangapikanila ngani syambone syakwamba Ambuje ŵetu Yesu.” (2 Atesalonika 1:7, 8) Yesu caciwonecela kusogoloku pa ngondo jele Baibulo jikusajikolanga kuti “ngondo ja lisiku lyekulungwa lya Mlungu Jwamaciligose,” jakolanjikwasoni kuti Alamagedo—Ciunukuko 16:14, 16.

Mlungu ngasakamulicisya masengo ŵandu pakuputa ngondo jakonanga ŵandu ŵakusakala nambo cacikamulicisya masengo Mwanagwe, Yesu Klistu, soni yakupanganikwa yine yausimu. Yakupanganyikwa yakwinani yeleyi yicijonanga ŵandu wosope ŵakusiŵatendela yangalwe acimjawo.—Yesaya 11:4; Ciunukuko 19:11-16.

Moŵa agano, Mlungu nganacenga mwakusajiwonela ngondo. Akusajiwonape mpela litala lyakumacisya ŵandu ŵakusiŵatendela yangalwe acimjawo, soni lyakumacisya yakusakala yosope. Nambope, mpela mwayiŵelele ni kalakose, Mlungu jika ni jwakusasagula ndaŵi jakuputila ngondo soni jwakusosekwa kuputa ngondojo. Mpela mwatuyiwonele kala, Mlungu asimicisye kuti kusogoloku cayikasye ngondo jakumasya yakusawusya soni kuwucisya ŵandu ŵakusiŵalagasya acimjawo. Yesu Klistu ni jucaciputa ngondojo. Yeleyi yikulosya kuti moŵa agano Mlungu ngakusasangalala ni ngondo syosope syasikusatendekwa pacilambopa, atamose ŵakuputawo ali akwete magongo gakupikanika.

Tuwanicisye m’yi: Ŵanace ŵaŵili akuputana baba ŵawo ali atyosile. Kaneko akuleka kaje kuputanako ni akwajimbila foni baba ŵawo ŵala. Jumo mwa ŵanacewo akusala kuti jwinejo ni jwatandisye kuputanako nambo jwinejo akusala kuti mjakwejo ni jwamtandite. Jwalijose akwembeceya kuti babawo camkamucisye. Nambope, babawo ali apikene mbali syosope, akwasalila ŵanacewo kuti alece kuputanako mpaka ali ayice ni kutagulilana nganijo. Ŵanacewo akuleka kuputanako kwakandaŵi. Kaneko akutandilasoni kuputanako. Baba ŵala pakukopocela pamlango akwatumbilila ŵanace wosopewo ni akwapa cilango ligongo lyakuti nganiŵapikanila.

Moŵa gano, yilambo yayikuputana ngondo yikusam’ŵenda Mlungu kuti ayikamucisye. Nambo Mlungu ngakusajinjilila nawo pangondo sya m’moŵa agano. Mmalo mwakwe kupitila m’Baibulo jwalakwe akusati, “Akawucisya cakusakala pa cakusakala,” soni akusati, “Akawucisya cakusakala.” (Aloma 12:17, 19) Konjecesya pelepa, Mlungu ŵasalile ŵandu kuti ‘amjembeceye ni mtima wawo wosope’ mpaka pandaŵi jakuti jwalakwe atendepo kandu. Ndaŵi jakwe jili pangondo ja Alamagedo. (Salimo 37:7) Naga yilambo yikulepela kumjembeceya Mlungu ni kutanda kuputana ngondo, jwalakwe akusiŵawona ŵakuputanawo kuŵa ŵakulikwesya ni ngakusangalala nawo. M’yoyo, pa Alamagedo, Mlungu cacilosya kutumbila kwakwe ni cacimasya maukangani gosope ‘mwakulekasya ngondo mpaka kumbesi kwa cilambo capasi.’ (Salimo 46:9; Yesaya 34:2) Alamagedo jiciŵa ngondo jakumasya ngondo syosope.

Ucimwene wa Mlungu ucimasya ngondo syosope. Yesu ŵasasile ya ucimwene welewo m’lipopelo lyakwe lyakumanyika mnope lyakuti, “Ucimwene wawo uyice. Lisosa lyawo litendekwe pacilambo capasi, mpela kwinani. (Matayo 6:10) Ucimwenewo ngasiwugamba kumasya ngondope nambo ucimasyasoni cacikusatandisya ngondosyo cacili kusakala. * (Salimo 37:9, 10, 14, 15) Ni ligongo lyakwe ŵakumkuya ŵa Yesu wosope akwembeceya mwalung’wanu majali gagaciyika pasi pa Ucimwene wa Mlungu.—2 Petulo 3:13.

Nambo ana Ucimwene wa Mlungu ucimasya cakaci kulaga, ngalwe soni kusakala? Kwanilicikwa kwa yajalocesye Baibulo kukulosya kuti tukutama “m’moŵa gambesi” ga cilambo cakusakalaci. (2 Timoteo 3:1-5) * Pacangakaŵapa, Mlungu camasye moŵa gambesiga pa ngondo ja Alamagedo.

Ŵandu ŵacacijonasika pa ngondo ja Alamagedo, caciŵa ŵawowopewo “ŵangapikanila ngani syambone syakwamba Ambuje ŵetu Yesu.” (2 Atesalonika 1:8) Nambo akaliŵalila kuti Mlungu jwangasangalala ni ciwa ca mundu jwalijose kupwatikapo ŵandu ŵakusakala. (Ezekieli 33:11) Ligongo lyakuti ‘Mlungu ngakusaka kuti jwine jwalijose cajonanjikwe’ pangondo jakumalisyajo, apano akulolecesya kuti ngani syambone syakwamba Ambuje ŵetu Yesu ‘sikulalicikwa pacilambo cosope capasi, kuti siŵe umboni kwa ŵandu ŵa mitundu josope’ mbesi mkanijiyice. (2 Petulo 3:8, 9; Matayo 24:14; 1 Timoteo 2:3, 4) Kupitila m’masengo gakulalicila gakusatenda ŵa Mboni sya Yehofa, ŵandu moŵa agano akwete upile wakummanyilila Mlungu, kupikanila ngani syambone syakwamba Yesu, soni wakutama mundaŵi jele ngondo ngasisipagwasoni.