NGANI JA PANDANDA
Ana ŵa Mboni sya Yehofa Ali Ŵani?
“Mbele ndili mkummanyilila Mike kwa yaka yejinji. Jwalakwe ali jwa Mboni sya Yehofa. Nambope, dini jakweji ngangusajipikanicisya cenene. Ana Yehofa ali ŵani? Ligongo cici ŵa Mboni sya Yehofa ngakusatenda yindimba ya m’cilambo? Ana nikuti Mike ali m’kakuga kakusapuka?”—Becky, California, U.S.A.
“Ŵandu ŵakuŵandikana nawo nyumba paŵatandite kulijiganya Baibulo ni ŵa Mboni sya Yehofa, natandite kuliwusya kuti, ‘Ana lina lyakuti Mboni sya Yehofa likusagopolela cici? Linali lyaliji lyakusimonjesya mnope!’”—Zenon, Ontario, Canada.
“Une ni ŵamkwangu twaganisyaga kuti ŵa Mboni sya Yehofa ŵapatilepo upile wakwika panyumba petu kuti atutendekasye kulijimba magambo ligongo lyakuti nganitupopelaga ku dini jilijose. Twaganisisye kuti naga dini syakumanyika cenene nganisitukamucisyaga, nikuti kakuga kangamanyika cenene ka Mboni sya Yehofa ngaŵasoni mkutukamucisya ata panandi.”—Kent, Washington, U.S.A.
“Kusala yisyene, nganimanyililaga kuti ŵa Mboni sya Yehofa ali ŵani soni kuti akusakulupilila yatuli.”—Cecilie, Esbjerg, Denmark.
Mwangakayicila, aŵele ali mkwawona ŵamboni ali mkulalicila ku nyumba ni nyumba kapena m’malo gakusasimanikwa ŵandu ŵajinji, ali mkugaŵa mabuku gakusala ya m’Baibulo, soni ali mkutendesya majiganyo ga Baibulo. Kombolekasoni kuti apocele magasiniji kwa jumo jwa jemanjajo. Nambope, mpaka aliwusyeje kuti, ana ŵa Mboni sya Yehofa ali ŵani? Mwine mpaka akole nganisyo syakulandana ni sya ŵandu ŵatwakolasile kundandaku.
Naga akwete yiwusyo yakwamba Mboni sya Yehofa, ana mpaka apate kwapi kwanga kwakwe? Ana mpaka amanyilile catuli yakusakulupilila ŵa Mboni sya Yehofa? Ana akusapata catuli mbiya syakamucisya pa masengo gawo gakulalicila soni syakamulicisya masengo pa malo gakulambilila? Soni ligongo cici akusiŵayicila ŵandu ku nyumba syawo kapena malo gakulekanganalekangana?
Cecilie jwatumkolasile kundanda kula ŵatite,“Naŵalasile yindu yejinji yakwamba Mboni sya Yehofa pa Intaneti. Napikene yindu yaunami soni ngani syejinji syakwanyosya jemanjaji. Yeleyi yandendekasisye kuti ndande kwawona ŵa Mboni sya Yehofa mwakulemweceka.” Nambope, mkupita kwa ndaŵi, Cecilie ŵaŵecetene ni ŵa Mboni sya Yehofa mwati ŵamkamucisye kupata kwanga kwakamula mtima kwa yiwusyo yakwe.
Ana akusaka kupata kwanga kwakuwona kwa yiwusyo yawo yakwamba ŵa Mboni sya Yehofa? Tukwalimbikasya kuti ŵawusye ŵa Mboni sya Yehofa acimsyene, ŵakopwesye magasini ajino. (Miyambo 14:15) Tukukulupilila kuti ngani syakuyicisyasi cisyakamucisye kumanyilila kuti m’weji tuli ŵani, tukusakulupilila cici, soni kugamanyilila cenene masengo gatukusatenda.
