1, 2. (a) Ana cici cacikusasangalasya ŵandu ŵa Mlungu moŵa agano? (b) Ana acinangolo soni acakulungwa ŵa mumpingo mpaka ŵakamucisye catuli ŵacinyamata kumanyilila gopolela kwa kubatiswa?

JWAMKULUNGWA jwa mumpingo jwine ŵakasalile kamcanda kane ka yaka 12 lina lyakwe Christopher kuti, “Mbele ndili mkummanyilila kutandila pamwaliji likandi. Sangalele mnope kupikana kuti mkusaka kubatiswa. Nambo nam’wusye ciwusyo cimo, ‘Ligongo cici mkusaka kubatiswa?’” Ciwusyo celeci caliji cakuŵajilwa. Kusala yisyene, wosope tukusasangalala patukwawona ŵacinyamata ŵajinji pacilambo cosope ali mkubatiswa caka ni caka. (Mlal. 12:1) Nambo, acinangolo ŵaciklistu soni acakulungwa ŵa mumpingo akusasaka kuti ŵacinyamataŵa asaguleje jika kubatiswako soni kuti apikanicisye kuti kubatiswako kukusagopolela cici.

 ² Maloŵe ga Mlungu gakusalosya kuti kulipeleka soni kubatiswa kuli ndanda ja umi waciklistu. Konjecesya pelepo, mundu pabatiswe Yehofa akusampaga majali. Nambope, akusasimanasoni ni yakulingwa yakutyocela kwa Satana. (Miy. 10:22; 1 Pet. 5:8) M’yoyo, acinangolo ŵaciklistu akusosekwa kwajiganya ŵanace ŵawo gopolela kwa kuŵa jwakumkuya Klistu. Kwa ŵanace ŵanganakola acinangolo ŵaciklistu, acakulungwa ŵa mumpingo akusosekwa kwakamucisya. (Aŵalanje Luka 14:27-30.) Kuti masengo gakutaŵa nyumba gamale cenene pakusasosekwa kosecela cenene, m’yoyosoni kuti tumtumicile Yehofa mwakulupicika “mpaka kumbesi,” tukusasosekwa kosecela cenene. (Mat. 24:13) Nambo ana ŵacinyamata mpaka atende cici kuti aŵe ŵakusimicisya kumtumicila Yehofa kwa umi wawo wosope? Kwende tulole.

3. (a) Ana maloŵe ga Yesu soni ga Petulo gakutujiganya cici pakwamba ya kusosekwa kwa kubatiswa? (Mat. 28:19, 20; 1 Pet. 3:21) (b) Ana citutagulilane yiwusyo yapi soni ligongo cici?

³ Ana mli jwacinyamata jwamkusaka kubatiswa? Naga yili m’yoyo, tukum’yamicila mnope. Kuŵa jwa Mboni sya Yehofa jwam’batiswe uli upile wekulungwa mnope. Konjecesya pelepa, kuti mundu aŵe Mklistu soni kuti cakulupuce akusosekwa kubatiswa. (Mat. 28:19, 20; 1 Pet. 3:21) Pakuŵa mli jwakusacilila kusunga cilangano cacimcitenda ni Yehofa, mkusosekwa kosecela cenene mkanim’batiswe. M’yoyo, mpaka mtende cenene ganicisya kaje yiwusyo yitatuyi yampaka yimkamucisye kulola naga mkosece kubatiswa. Yiwusyo yakwe yili ayi: (1) Ana ndili jwamkomangale? (2) Ana ndili jwakusacilila kubatiswa kutyocela pasi pamtima? (3) Ana ngupikanicisya gopolela kwa kuŵa jwakulipeleka kwa Yehofa? Kwende tutagulilane yiwusyo yeleyi.

4, 5. (a) Ana ŵacikulilepe ni ŵakusosekwa kubatiswa? Alondesye. (b) Ana komangala kukusagopolela cici?

⁴ Baibulo jangasala kuti ŵacikulilepe kapena mundu jwayice pamsingu wine wakwe ni jwakusosekwa kubatiswa. Pa lilemba lya Miyambo 20:11 tukusaŵalanga kuti, “Atamose  mwanace akusamanyika ni masengo gakwe, naga yitendo yakwe yili yeswela kapena yagoloka.” Yeleyi yikulosya kuti jwacinyamata mpaka amanyilile yindu yambone yakusosekwa kutenda soni kulipeleka kwa Mkupanganya jwakwe. M’yoyo, jwacinyamata jwalosisye kuti ali jwamkomangale soni juŵalipelece kwa Yehofa akusosekwa kubatiswa.—Miy. 20:7.

⁵ Ana komangala kukusagopolela cici? Komangala ngakukusagopolelape kula kwa mundu kapena msingu wakwe. Baibulo jikusasala kuti ŵandu ŵakomangale ‘akusakamulicisya masengo macili gawo gakumanyilila, pakulekanganya cakuŵajilwa ni cangaŵajilwa.’ (Ahe. 5:14) M’yoyo, ŵandu ŵakomangale ni ŵakusamanyilila yindu yambone m’meso mwa Yehofa soni akusaŵa ŵakusacilila mumtima mwawo kutenda yindu yakuŵajilwa. Yakuyicisya yakwe, ŵandu ŵakomangaleŵa ŵangajigalika ni yindu yakusakala kapena ngakusiŵakanganicisya kuti atende yambone nambo akusayitenda jika. M’yoyo, jwacinyamata jwam’batiswe cacijendelecela kuya malamusi ga Mlungu atamose pali kumalo kwakuti kwangali acinangolo ŵakwe kapena mundu jwine jwacikulile.—Awanicisye ni Afilipi 2:12.

6, 7. (a) Ana Daniyele ŵasimene ni yakusawusya yatuli paŵaliji ku Babulo? (b) Ana jwalakwe ŵalosisye catuli kuti ŵaliji jwamkomangale?

⁶ Ana ŵacinyamata mpaka aŵe ŵakomangale? Kwende tulole cisyasyo ca m’Baibulo ca Daniyele. Komboleka kuti jwalakwe ŵaliji jwacinyamata paŵamjigele kwa acinangologwe mwakumkanganicisya ni kwawula najo ku ukapolo ku Babulo. Mwangajembeceya, Daniyele ŵatamaga ni ŵandu ŵanganakuyaga malamusi ga Mlungu. Konjecesya pelepa, Daniyele ŵasimenesoni ni cakusawusya cine. Ŵandu ŵa ku Babulo ŵamtendelaga yindu mpela mundu jwapenani mnope. Jwalakwe ŵaliji jumo mwa ŵacinyamata ŵaŵasagwile kuti amtumicileje mwenye. (Dan. 1:3-5, 13) Kombolekasoni kuti Daniyele paŵaliji ku Babulo ŵakwete ukumu wekulungwa wangamkanakola ku Yisalayeli.

⁷ Ana Daniyele ŵayiwonaga catuli yeleyi? Ana jwalakwe ŵajigalice ni yindu yapenani ya ku Babulo? Ana ŵakundile kuti yindu yeleyi yijonanje cikulupi cakwe? Iyayi. Baibulo jikusatusalila kuti Daniyele paŵaliji ku Babulo “ŵasimicisye mumtima mwakwe kuti akalisakasya” ni cindu cilicose cakwayana ni kulambila kwaunami. (Dan. 1:8) Jwalakwe ŵalosisye kuti ŵaliji jwamkomangale.

8. Ana alijiganyisye cici pa cisyasyo ca Daniyele?

⁸ Ana akulijiganya cici kwa Daniyele? Jwacinyamata jwamkomangale ngakusajigalika ni cilicose. Ngakusaŵa mpela namlwiyi jwakusacenga mtundu wakwe kuti ukamulane ni malo gali. M’yoyo, ngakusaŵa mpela mjakwe jwa Mlungu pali ku Nyumba ja Ucimwene nambo pali kusukulu ni kuŵa mpela jwakucilambo. Jwalakwe ngakusacenga nganisyo atamose pasimene ni yakulingwa.—Aŵalanje Aefeso 4:14, 15.

9, 10. (a) Ana ganicisya yaŵele ali mkutenda pasimene ni yakulingwa mpaka kumkamucisye catuli jwacinyamata? (b) Ana kubatiswa kukusagopolela cici?

⁹ Yili yisyene kuti pangali mundu jwamlama. Ŵacinyamata soni ŵacikulile akusalemwa ndaŵi ni katema. (Mlal. 7:20) Nambope, mpela mundu jwamkusaka kubatiswa, mkusosekwa kuliwungunya ni kulola naga mli jwakusacilila kuya malamusi ga Yehofa. Ana mpaka mmanyilile catuli naga mli jwakusacilila kuya malamusi ga Yehofa? Mkusosekwa kuliwusya kuti, ‘Ana mbele ndili mkumpikanila Yehofa kwandaŵi jelewu catuli?’ Mganicisyesoni yamwatesile pamwasimene ni  cakulingwa. Ana mwalosisye kuti mkusamanyilila kulekanganya cakuŵajilwa ni cangaŵajilwa? Wuli naga ŵandu ŵane akusamtendela yindu mpela mundu jwapenani m’cilambo ca Satanaci mpela muyaŵelele ni Daniyele? Pamsimene ni yakulingwa, ana mkusakombola “kwendelecela kumanyilila lisosa lya Yehofa”?—Aef. 5:17.

¹⁰ Ligongo cici tuwusisye yiwusyo yeleyi? Ligongo mpaka yimkamucisye kuwuwona ubatiso mwakuŵajilwa. Mpela mwatusasile kala, kubatiswa kuli kulosya kuti mlipelece kwa Yehofa. Mkusaŵa mli mtesile cilangano ni Yehofa cakuti cimumnonyeleje soni kumtumicila jwalakwe ni mtima wenu wosope. (Maliko 12:30) Mundu jwalijose jwam’batiswe akusasosekwa kuya cilangano caŵatesile ni Mlunguci.—Aŵalanje Mlaliki 5:4, 5.

11, 12. (a) Ana mundu jwakusaka kubatiswa akusasosekwa kuŵa jwakusimicisya ya cici? (b) Ana cici campaka cimkamucisye kuwuwona ubatiso mwakuŵajilwa?

¹¹ Baibulo jikusasala kuti ŵandu ŵa Yehofa kupwatikapo ŵacinyamata “cacilipeleka mwakusacilila” kuti amtumicileje jwalakwe. (Sal. 110:3) M’yoyo, mundu akusasosekwa kuŵa jwakusimicisya kuti asagwile jika kubatiswa. Kuti mmanyilile naga msagwile jika kuti m’batiswe mkusosekwa kuliwungunya, mnopemnope naga mwakulile m’liŵasa lyaciklistu.

¹² Komboleka kuti m’ŵele mli mkwawona ŵandu ŵajinji ali mkubatiswa kupwatikapo ŵakulandana nawo msingu kapenasoni acalongo ni acalumbu ŵenu. Naga yili m’yoyo kwa mmwejo, ligongo cici mkusosekwa kusamala? Ngamkusosekwa kuwuwona ubatiso mpela msyungu wawukusatendekwa mundu payice msingu wine wakwe. Ana cici campaka cimkamucisye kuwuwona ubatiso mwakuŵajilwa? Mkusosekwa kolaga ndaŵi jaganicisya ya kusosekwa kwa kubatiswa. Ngani ajino soni jakuyicisya jikusala ya maumbone ga kubatiswa.

13. Ana mpaka mmanyilile catuli naga msagwile jika kuti m’batiswe?

¹³ Pana matala gampaka gamkamucisye kumanyilila naga msagwile jika soni mwakutyocela pasi pamtima kuti m’batiswe. Mwambone, mapopelo genu gacilosya kuti mli jwakusacilila kumtumicila Yehofa. Ana mkusapopela kalingwa kwa Yehofa? Ana mkusasala yindu yisyesyene yimkusaka? Kwanga kwa yiwusyo yeleyi mpaka kumkamucisye kumanyilila mwawuŵelele unasi wenu ni Yehofa. (Sal. 25:4) Litala lyekulungwa lyakusajanjila Mlungu mapopelo getu lili kupitila m’Maloŵe gakwe. M’yoyo, kulijiganya Baibulo kulisoni litala line lyakulosya kuti tukusaka kum’ŵandicila soni kumtumicila Yehofa ni mtima wetu wosope. (Yos. 1:8) Mkusosekwa kuliwusya kuti, ‘Ana pangupopela ngusakolanga yindu yisyesyene yingusaka? Ana ngusalijiganya Baibulo mwakutamilicika? Soni, liŵasa lyetu palikutenda Kulambila kwa Peŵasa, ana ngusasimanikwapo?’ Kwanga kwa yiwusyo yeleyi mpaka kumkamucisye kulola naga msagwile jika mwakutyocela pasi pamtima kuti m’batiswe.

14. Ana kulipeleka ni kubatiswa kukusalekangana catuli?

¹⁴ Ŵane ŵangamanyilila kulekangana kwa kulipeleka ni kubatiswa. Mwambone, ŵacinyamata ŵane akusati ŵalipelece kwa Yehofa nambo nganakosece kubatiswa. Ana yeleyi yili yakupikanika? Kulipeleka kukusagopolela kumsalila Yehofa kuti mkusacilila kumtumicila jwalakwe mpaka kalakala. Mundu pakubatiswa  akusiŵalosya ŵane kuti ŵalipelece kwa Yehofa. M’yoyo, kubatiswa kuli kulosya pelanga kuti mwalipelece kala kwa Yehofa mwipopelo. Nambo mkanim’batiswe mkusosekwa kupikanicisya gopolela kwa kulipeleka.

15. Ana kulipeleka kukusagopolela cici?

¹⁵ Mwakata, kulipeleka kwa Yehofa kuli kumsalila jwalakwe kuti mli jwakwe. Pamkulipeleka mkusatenda cilangano ni jwalakwe kuti cimtendeje candanda lisosa lyakwe paumi wenu. (Aŵalanje Matayo 16:24.) Ngatukusosekwa kuciwona cilangano cilicose mwauwanace, mnopemnope catutesile ni Yehofa Mlungu. (Mat. 5:33) Nambo, ana mpaka mlosye catuli kuti mwalipelece soni mli jwa Yehofa?—Alo. 14:8.

16, 17. (a) Asale cisyasyo cakulosya gopolela kwa kulipeleka. (b) Ana mundu jwakulipeleka kwa Yehofa akusaŵa ali mkuŵeceta kuti cici kusyesyene?

¹⁶ Yeleyi mpaka tuyiwanicisye m’yi. Tujile kuti mjenu ampele galimoto mpela mtuka. Akumpa yikalata yosope yakwayana ni galimotojo. Ni akumsalila kuti, “Bwanawe nampele galimotoji, nambo makiyiga cisunjeje jika. Soni cinjendesyeje unejo ngaŵaga mmwejo.” Ana mpaka m’wuwone catuli mtukawo soni jwakupelekajo?

¹⁷ Ni mganicisye yakusasaka Yehofa kwa mundu juŵalipelece kwa jwalakwe, juŵamsalile kuti, “Ngwapa umi wangu. Ndili jwawo.” Wuli naga mundu jwelejo akutenda yindu yine yakutindana ni yakusasaka Yehofa mpela kuŵa pauganja ni jwangakulupilila? Wuli naga ali apatile masengo gangampa lipesa lyakwawulila mu undumetume soni kumisongano? Ana yeleyi ngayikulandana ni kusunga jika makiyi ga galimoto? Mundu juŵalipelece kwa Yehofa akusaŵa mpela akuŵeceta kuti, “Umi wangu uli m’miyala mwawo ngaŵa mwa une. Naga yingusaka kutenda yili yakutindana ni yakusaka wawojo, ndaŵi syosope cindendeje yakusaka wawojoyo.” Yeleyi yikutukumbusya nganisyo syaŵakwete Yesu juŵasasile kuti, “Natulwice kutyocela kwinani kukutenda lisosa lya juŵandumile, ngaŵaga lisosa lyangu.”—Yoh. 6:38.

18, 19. (a) Ana yaŵasasile Rose soni Christopher yikulosya catuli kuti kubatiswa kuli upile wekulungwa? (b) Ana mkupikana wuli mumtima pamkuganicisya ya upile wakubatiswa?

¹⁸ Kusala yisyene, ngatukusosekwa kukuwona kubatiswa mpela cindu cang’andila. Nambo atamose yili m’yoyo, tukumbucileje kuti kulipeleka soni kubatiswa uli upile wekulungwa mnope. Ŵacinyamata ŵakusamnonyela Yehofa soni ŵakusapikanicisya gopolela kwa kulipeleka ngakusagwala kubatiswa. Soni pabatiswe, ngakusalijimba magambo. Msikana jwine jwam’batiswe lina lyakwe Rose ŵasasile kuti, “Ngusamnonyela mnope Yehofa, soni yikaŵe kuti ngangumtumicila jwalakwe ngamkanimba jwakusangalala. Pana yindu yine yanakayicilaga kusagula pa umi wangu, nambo nganingayicila ata panandi panasagulaga kubatiswa.”

¹⁹ Nambi wuli pakwamba ya Christopher jwatumkolasile kundanda jula? Ana jwalakwe ŵasagwile mwakutyocela pasi pamtima kuti abatiswe paŵakwete yaka 12? Jwalakwe akusangalala mnope ligongo lyakuti ŵasagwile kulipeleka soni kubatiswa pandaŵi jelejo. Christopher ŵatandite upayiniya wakutamilicika ali akwete yaka 17, soni paŵakwete yaka 18, ŵaŵele jwakutumicila jwakamucisya. Apano jwalakwe akutumicila ku Beteli. Jwalakwe ŵatite, “Natesile cenene kusagula kubatiswa. Ngusangalala mnope kumtumicila Yehofa soni kukamucisya likuga lyakwe.” Sambano, naga mkuganicisya yakuti m’batiswe, ana mpaka mkosecele catuli? Ngani jakuyicisya jicijanga ciwusyo celeci.