Aganicisye ayi: Tujile kuti msikana jwine lina lyakwe Karen apite kukunguluka ni ŵacinyamata ŵane. Mkanatamilicice, akupikana maloŵe ga mjakwe kunyuma kwakwe.

Karen pagalawuka, akum’wona Jessica ajigele mabotolo gaŵili ga ukana gewugule kala. Jessica akumpa Karen libotolo limo ni kumsalila kuti, “Nambi tujile kuti m’mwe mli mwanace, mwati ngaŵa mkumwa panandi?”

Karen akusaka kukana, nambo Jessica ali mjakwe. Karen ngakusaka kuti mjakweju aganisyeje kuti ali jwakusigalila. Nambosoni, Jessica ali msikana jwambone, soni naga akumwa ukana, nikuti kumwako nganikuŵa kwakulemweceka. Karen akuŵeceta jika kuti, ‘Ugambile kuŵa ukana, ngaŵaga mtela wakusokonasya mtwe.’

Ana wawojo akaŵe Karen, akatesile yatuli?

Kuti asagule mwalunda yakutenda pasimene ni yati mpela yeleyi, akusosekwa kumanyilila kuti wawojo ali mundu jwatuli soni akusajendela yatuli paumi wawo. Kumanyilila yeleyi mpaka kwakamucisye kusagula jika yakutenda m’malo mwakuti ŵane ŵasagulileje.—1 Akolinto 9:26, 27.

Ana yeleyi mpaka yikombolece catuli? Kwanga kwa yiwusyo yakuyicisyayi mpaka kwakamucisye.

Kumanyilila kuti wawojo ali mundu jwatuli soni akusajendela yatuli, kucakamucisya kuŵa ŵakulimba mpela citela cakombola kulimbana ni cimbungo

Kumanyilila yakusatenda cenene soni ndamo syawo syambone mpaka kwakamucisye kuŵaŵakulimba mtima.

CISYASYO CA M’BAIBULO: Ndumetume Paulo ŵatite, “Atamose ndili jwangaŵeceta cenene, nambo ngaŵa kuti jwangamanyilila yindu.” (2 Akolinto 11:6) Ligongo lyakuti Paulo ŵamanyililaga cenene Malemba, ŵaliji jwakulimbape atamose ŵane ŵamtengusyaga. Jwalakwe nganakunda kuti yakutengusyayo yim’wucisye munyuma.—2 Akolinto 10:10; 11:5.

ALIWUNGUNYE ASYENE.

Pasipa, alembe cindu cakusakombola kutenda.

Asale ndamo jekulungwa jakwete. (Mwacisyasyo, ana wawojo ali ŵakusamala ya ŵane? ŵakoloŵa magasa? ŵakudalilicika? ŵakamula ndaŵi?)

Kuganicisya mnope yindu yakusalepela kutenda mpaka kucenje mwakusaliwonela asyene soni yakusajendela paumi.

CISYAYSO CA M’BAIBULO: Paulo ŵamanyililaga yakulepela yakwe. Jwalakwe ŵalembile kuti: ‘Mtima wangu ukusasangalala ni malamusi ga Mlungu, nambo mumtima mwangu ngusinaliwona lilamusi line lyalikusalimbana ni lilamusi lyalikusajiticisya mtima wangu. Lilamusi lyelelyo lindesile kuŵa kapolo jwa lilamusi lya ulemwa lyalili m’cilu mwangu.’—Aloma 7:22, 23.

ALIWUNGUNYE ASYENE.

Ana akusosekwa kumalana ni yakulepela yapi?

Ana mpaka akwele galimoto ni kumsalila jwakwendesya kuti agambeje kusyungulila malo gamo mpaka mawuta gamale? Kweleko mpaka kuŵe kuloŵela soni konanga mbiya!

Ana tukulijiganya cici pelepa? Kola yakulinga mpaka kwakamucisye kuti ajawuleje pasogolo, ngaŵa kwambaga kusyungula pa malo gamo. Akusaŵa mpela akwete kwakwawula, soni yampaka atende kuti akayice.

CISYASYO CA M’BAIBULO: Paulo ŵalembile kuti: ‘Nganguwutuka mpela ngangumanyilila kungwawula.’ (1 Akolinto 9:26) Paulo ŵakolaga yakulinga ni ŵatendaga yindu mwakamulana ni yakulingayo.—Afilipi 3:12-14.

ALIWUNGUNYE ASYENE.

Pasipa, alembe yakulinga yitatu yakusaka kuyikwanilisya pakwikanaga caka ca malaŵi.

Naga nganakola yaŵasimicisye kuti catendeje, mpaka agambeje kucengacenga yakutenda mpela mwakusatendela nalwiyi. Mpaka atendeje yindu pakujigalila yitendo ya acimjawo. Kutenda yeleyi kukusalosya kuti wawojo ngakumanyilila kuti ali mundu jwatuli soni akusajendela yatuli.

Nambo kutenda yindu pakujigalila yaŵasimicisye, ngaŵaga yakutenda ya ŵane, kukusalosya kuti akumanyilila kuti wawojo ali mundu jwatuli soni akusajendela yatuli.

CISYASYO CA M’BAIBULO: Jwakulocesya Daniyele paŵaliji mnyamata, “ŵasimicisye mumtima mwakwe” kuti capikanileje malamusi ga Mlungu atamose ŵaliji kwakutalikangana ni ŵacibale ŵakwe. (Danieli 1:8) Jwalakwe ŵatesile mwakamulana ni yaŵasimicisye.

ALIWUNGUNYE ASYENE.

Ana wawojo ŵasimicisye yatuli? Mwambone: Ana akusasimicisya kuti Mlungu apali? Ana akwete maumboni gapi gakwasimicisya yeleyi?

Ana akusakulupilila kuti malamusi ga Mlungu gali gakamucisya kwa wawojo? Naga yili m’yoyo, ligongo cici?

Pakumalisya, ana mpaka asace kuŵa mpela lisamba lyejumu lyakujigalika ni mbungo jilijose kapena mpela citela cakombola kulimbana ni cimbungo? Naga akusalimanyilila cenene kuti ali mundu jwatuli soni akusajendela yatuli, taciŵa mpela cele citelaco. Soni yeleyi yicakamucisya kwanga cenene ciwusyo cakuti, Ana ndili mundu jwatuli?