Tumsalile ya mbili jenu.

Napagwile ku United States mu 1979. Panakwete yaka yitatu, baba ni mama ŵalekangene ulombela. Mama ŵandelite ni ndamo ja Chiyuda soni ŵandumisye kuti ngalijiganyeje ku sukulu sya Chiyuda. Ndili ngwete yaka 7, une ni mama twapite ku Israel kutama kwa chaka chimo, soni natandite kulijiganya pa sukulu jine jiŵajikolangaga kuti kibbutz. Kaneko une ni mama twapite ku Mexico.

Atamose kuti kwatwatamaga kwaliji kwangali nyumba jakupopelela ja Chiyuda, nambo nganindeka kukuya misyungu ja Chiyuda. Lisiku lya Sabata, napambaga makandulo, kuŵalanga buku ja Torah, soni kutenda mapopelo gane. Panaliji kusukulu, nasalilaga achimjangu ŵamkalasi kuti dini jetu ni jijaliji jandanda kupunda dini sine. Naliji mkanimbe kuŵalanga mabuku ga Malangano ga Sambano gagakusalondesya mnope ya utumiki wa Yesu Klistu soni yiŵajiganyisye jwalakwe. Nambo mama ŵalekasyaga kuti ngaŵalangaga pakogopa kuti mpaka yisokonasye.

Ligongo chichi ŵasagwile kuti aŵalanjeje Baibulo ja Malangano ga Sambano?

Panaliji ni yaka 17, nawujile ku United States kuti ngapitilisye majiganyo gangu ku sukulu. Ku sukuluku, nasimene ni mjangu jwine juŵaliji Mklistu, jwele ŵasalile kuti naga ngangusamkulupilila Yesu ni kuti umi wangu ukusoŵechela chinechakwe.

Ali asalile yeleyi, une namjanjile kuti “Ŵandu ŵakusamkulupilila Yesu ali ŵasokonechele.”

Jwalakwe ni jwatite, “Ana bwanawe pakwete pamŵalasile Malangano ga Sambano?”

Namjanjile kuti, “Iyayi.”

Kaneko jwatite, “Ana pelepo ngamkuyiwona kuti pangali chamkumanyilila? Mlole mkuyinyosya yindu yakuti ngamkuyimanyilila?”

Maloŵe gelega gangwayiye mnope, ligongo kutandila kalakala naliji ndili mkumanyilila kuti kusala nganisyo syakwe pa chindu changawukuchimanyilila kuli kuloŵela. Kaneko nagambile kujigala Baibulo jakwe nikutanda kuŵalanga Malangano ga Sambano.

Ana yiŵaŵalasileyo yakwayiye chamtuli?

Nasimonjile mnope panamanyilile kuti Malangano ga Sambano galembedwe ni ŵandu ŵaŵaliji Ayuda. Panaŵalangaga, nayiweni kuti Yesu nganiŵalagasyaga ŵandu. Mmalo mwakwe jwalakwe ŵaliji jwachinonyelo, jwakulinandiya soni jwakusachilila kwakamuchisya ŵane. Napite ku laibulale kuti ngajasime mabuku gagakusalondesya ya Yesu. Nambope pa mabuku ganajigele pangali jajalondesisye mwakungamula mtima kuti Yesu ŵaliji Mesiya. Mabuku gane gakusalaga kuti Yesu ali Mlungu. Nambo yeleyi nayiwonaga kuti yili yangapikanika. Sambano naga yili myoyo, ana Yesu jwapopelaga kwa ŵani? Soni kupwatika pelepa, Yesu jwawile, chitamilecho Baibulo jikusasala yakwamba Mlungu kuti, “Ali . . . jwangali mbesi” kapena kuti jwangawa. *

Ana ŵapatile chamtuli kwanga kwa yiwusyo yeleyi?

Usyesyene ngawukusalisisya jika. Yeleyi yandendekasisye kuŵa jwakusachilila kuti nawupate usyesyenewu. Myoyo napopesile kwa Mlungu mwakutyochela pasi pamtima soni ndili mkulila. Keleka kaliji kandanda kupopela mwangakamulichisya masengo kabuku ka mapopelo. Ndili malisisye kupopelaku napikene kuwodisya. Ŵaliji ŵa Mboni sya Yehofa ŵaŵili. Jemanjaji ŵambele kabuku kampepe kakusakamulichisya masengo pakwajiganya ŵandu Baibulo. Yanaŵalasile mu kabukuka soni yatwakambilene ni jemanjaji yangamuchisye kuyiwona kuti yakusakulupilila ŵa Mboni yikusatyochela m’Baibulo. Mwachisyasyo, ŵa Mboniŵa ngakusamwona Yesu kuti ali mbali ja chijiganyo cha Utatu. Mmalo mwakwe akusamwona kuti “ali Mwanache jwa Mlungu” * soni “ndande ja yosope yiŵapanganyisye Mlungu.” *

Kaneko nawujile ku Mexico. Kweleku ni kwanapitilisye kulijiganya ni ŵa Mboni sya Yehofa yakulochesya yakwamba Mesiya. Nasimonjile panayiweni kuti pana yakulochesya yejinji yakwamba Mesiya. Nambope nganinjikutilaga ni yeleyi. Mwamti naliwusyaga kuti, ‘Ana Yesu jikape ni juŵatesile yindu mwakamulana ni yakulochesyayi?’ soni ‘Nambi uli naga yili yakuti Yesujo ŵagambile kutenda yindu mwakalamuka pakusaka kuti yakulochesyayi yikwanilichikwe pa jwalakwe?’

Ana chichi chichatendekasisye kuti achenje nganisyo?

Ŵa Mboni ŵasalile yakulochesya yejinji yele pangali mundu jwampaka ayikwanilisye ligongo lyakuti ali jwakalamuka. Mwachisyasyo jwakulochesya Mika jwasasile mkanipaŵe kuti Mesiya chachipagwila ku Betelehemu ku Yuda. * Jwalakwe jwasasile yeleyi kuli kusigele yaka yakupunda 700. Ana pana mundu jwampaka asagule jika kwakuti akapagwile? Yesaya jwalembile kuti Mesiya chachiwulajidwa mpela chigaŵenga, nambo mtembo wakwe chachiwuŵika yalumo ni mmalembe ga ŵandu ŵakusichila. * Yesu ni juŵakwanilisye yakulochesya yosopeyo.

Umboni wine ukusawonechela mu msela wa achinangolo waŵapagwile Yesu. Baibulo jasasile kuti Mesiya chachipagwila mu msela wa Mwenye Daudi. * Ayuda ŵasungaga mabuku gakusala ya msela wa achinangolo ŵawo. Myoyo yikaŵe kuti Yesu nganapagwila mu msela ŵaliŵasa lya Daudi nikuti achimmagongo ŵakwe akakayichile yakuti ŵaliji Mesiya. Nambo pangali juŵakayichile, ligongo Yesu jwapagwile mu msela wa Daudi. Ŵandu ŵajinji ŵamkolangaga Yesu kuti ali “Mwanache jwa Daudi.” *

Mu 70 C.E, pali masile yaka 37 Yesu ali awile, Asilikali wa Chiloma ŵajonasile msinda wa Yelusalemu. Komboleka kuti yeleyi ni yayatendekasisye kuti mabuku gagasalaga ya msela wakupagwila gasokonechele. Welewu uli umboni wakulosya kuti Mesiya jwapali mkanichiyiche chaka cha 70 C.E.

Ana yaŵapikeneyi yakwayiye chamtuli?

Pa Detulonomo 18:18,19 pakusasala yakulochesya yaŵasasile Mlungu kuti tachisagula mu Isalaeli mundu jwakulochesya mpela Mose. Mlungu jwatite, “Une tinjipeleka chilango kwa mundu jwalijose jwangapikanila maloŵe gangu.” Kulijiganya kwangu Baibulo josope kwandendekasisye kulupilila kuti Yesu jwa ku Nasaleti ali jwakulochesya juŵamsalaga pelepa.