Fan̈ontanian̈any Pamaky

Nan̈ino ma Vavolombelon̈o Jehovah tsy mifampikon̈o vera, kanefa Baiboly tsy mikoran̈a momba zen̈y aby?

Efa rango fa ela, fomba mahazatra olo mifampikon̈o vera izikoa fa higiaka divain na toaka. Samby isany fomba fan̈anaovanolo izio, amy toeran̈a samihafa. Misy olo araiky mampanonga vera, avio mirary soa olo araiky hafa, ohatra, ‘irarian̈a anao ho salama, ho sambatra, ho ela velon̈o’, na raha miramira zen̈y. Olo sasany amizay mivolan̈a raha hely han̈aboan̈a fa ikendro izio, na iro mampanonga verandro avio migiaka aminjay. Maro olo mieritreritry izio zisty fan̈aboahan̈a fahalalampomba fo fa tsisy raha maharatsy izy foeky. Fa ty misy antony tsara mahavy Vavolombelon̈o Jehovah tsy mifampikon̈o vera.

Izio tsy midika fa Kristianin̈y tsy man̈iry raha tsara, fahasalaman̈a ndreky fahasambaran̈a aminolo. Filankevipitantan̈ana tamy taonjato voanalohany izikoa fa nanoratra tamy fiangonan̈a, karaha ty volan̈andro farany: “Tsaratsara anaro!” (Asan’ny Apostoly 15:29) Nisy panompony Jehovah hafa koa nivolan̈a karaha ty tamy panjaka: “Irarian̈a ho velon̈o tsisy farany anao ... panjaka!” na “ho ela velon̈o anao panjaka!”​—1 Mpanjaka 1:31; Nehemia 2:3.

Ino fo mahavy olo mifampikon̈o vera? Ty raha koran̈iny Tilikambo Fiambesan̈a (angiley) tamy 1 Zanvie 1968, nalain̈a baka tamy Rakipahalalan̈a Britannica (1910, angiley), Boky faha-13, pazy 121: ‘Fombany fivavahan̈a taloha tan̈y mifampikon̈o vera, baka han̈amezan̈a voninahitry zan̈ahary aby io ndreky olo maty. Baka amy zen̈y navianolo mifampikon̈o vera izikoa fa irary fahasalaman̈a aminolo io. Iro Griky ndreky Romanin̈y aby io izikoa fa nihina, nandraraka toaka hely niny zan̈aharindro. Ke lera iro fa nan̈ano fety be, iro nifampikon̈o vera mba han̈amezan̈a voninahitry zan̈aharindro aby io ndreky olo maty.’ Karaha ty koa volan̈iny rakipahalalan̈a io: ‘Fombafomba ataonolo mifampikon̈o vera izikoa fa mirary ny tsara aminolo io, azo antoko tsarabe fa misy ifandraisany marikitry amy fombafomba miramiran̈a tamy fan̈amezan̈a fan̈atitry.’

Fa raha zen̈y ma mbala marin̈y fo ziô? Karaha ty raha koran̈iny boky araiky momba toaka ndreky kolontsain̈y, niboaka taminy 1995: “[Fampikon̈o vera io] fo donko fombanolo panompo sampy taloha tan̈y mbala tavela, izikoa iro fa nandraraka toaka niny zan̈aharindro. Tamy zen̈y, izikoa fa nisy raha tiandro ho azo, iro nan̈ano fan̈atitry lio na divain, baka io iro nivolan̈a ‘ho ela velon̈o!’ na ‘hatsaratsaran̈a ay!’”

Marin̈y ndraiky fa tsy kila raha na fomba izikoa fa nanomboko tamy fivavahan̈a diso taloha tan̈y, na miramiran̈a amy zen̈y, efa tsy mety hatao na tsy hampiasainy Kristianin̈y edy. Ohatra ziô, karaha ty koran̈iny rakipahaizan̈a malaza araiky zay, momba ampongabendan̈itry: ‘Izio nankamasin̈indro panompo sampy aby io, avio nampiasaindro tamy fivavahan̈andro.’ Kanefa, taloha, nirahiny Zan̈ahary nasian̈a petakofehy sariny ampongabendan̈itry tamy vitiny lambandro pisoron̈o aby io. Nasian̈a sarinizio koa tamy pôtô varahin̈y, tamy tempoliny Solomona tao. (Eksodosy 28:33; 2 Mpanjaka 25:17) Taloha koa, peratra mariazy io nisy dikany amy fivavahan̈a, fa raha zen̈y fo tsy hainy ankamarozanolo amy ziôty. Iro mieritreritry fa izio zisty ahaizan̈a fo fa olo araiky efa manambady.

Karakory fo basy mikasiky fampiasandro panompo sampy aby io divain izikoa iro fa nivavaka? Tandraraiky, iro olo nipetraka ta Sekema tan̈y pivavaka tamy Bala, “nandeha tantran̈ony zan̈aharindro tao nihina ndreky nigiaka, baka io iro nan̈ozon̈o Abimeleka”, zanaka Gideona. (Mpitsara 9:22-28) Araka hevitrinao, mba nisy panompony Zan̈ahary edy niaraka nigiaka tamindro, ndreky nangataka tamy zan̈ahary disondro tao ke han̈ano raha ratsy taminy Abimeleka? Karaha ty raha nivolan̈iny Amosa momba iro Israelita aby nivadiky tamy Jehovah: “Iro mandrimandry an̈abony lamba natao debaka, ankilandro alitara aby io. Vola nazondro baka taminolo nampan̈ifaindro sazy ivangandro divain, ke izio baka io giahandro antran̈ony zan̈aharindro ao.” (Amosa 2:8) Asa mba nisy tamizio tao olo ten̈a nivavaka tamy Jehovah, ke nandraka divain nindro zan̈ahary aby io, na nigiaka izio fo? (Jeremia 7:18) Iro ma mba nampanonga verandro, ke nangataka tamy zan̈ahary diso, han̈amia hatsaran̈a olo araiky baka izy hanan̈a hoavy sambatra?

Tsara ndraiky ahaizantsika fa taloha tan̈y, ndraikindraiky panompony Jehovah nampanonga tan̈ana koa fa nangataka hatsaran̈a. Iro tamy zen̈y nivavaka tamy Zan̈ahary marin̈y. Karaha ty koran̈iny Baiboly: “Solomona nitsangana talohany alitarany Jehovah ... , avio nivavariny fanandrify lan̈itry tan̈anany, ke ho izy: ‘Jehovah Zan̈ahariny Israely, tsisy Zan̈ahary karaha anao foeky. ... Irarian̈a anao baka andan̈itry misy anao an̈y hitandren̈y. Irarian̈a anao hitandren̈y ke han̈ambela hadisovan̈a!’” (1 Mpanjaka 8:22, 23, 30) Taminy andrany Ezra, izy koa fa nan̈ano mersy Jehovah, “olo jiaby nampanonga tan̈ana sady namaly karaha ty: ‘Ameny! Ameny! Avio iro niondriky ndreky nankohoko tamy tany man̈oloan̈a Jehovah.’” (Nehemia 8:6; 1 Timoty 2:8) Azo antoko fa panompony Jehovah tsy nivadiky aby io tsy nampanonga tan̈ana hangatahan̈a fitahian̈a tamy zan̈ahariny vintan̈a.​—Isaia 65:11.

Olo amy ziô koa fa mifampikon̈o vera io, iro tsy mieritreritry foeky fa iro mangataka ny tsara amy zan̈ahary tsy marin̈y. Na antony mahavy iro mampanonga vera io aby tsy haindro. Sady iro tsy miasaloha amy zen̈y foeky. Fa Kristianin̈y ndraiky tsy tokony han̈aradrorony fo amy raha ataonolo aby io.

Haintsika fa misy fomba hafa fataony ankamarozanolo koa, tsy ataony Vavolombelon̈o Jehovah. Misy raha fataonolo sasany han̈aboahan̈a fan̈ajan̈a drapô. Kanefa tsy an̈aty jerindro fa efa mivavaka amy raha io edy iro koa man̈ano zen̈y. Ten̈a Kristianin̈y tsy man̈ano raha karaha zen̈y, fa iro fo tsy misakana olo han̈ano zen̈y. Koa fa haindro tsialohaloha lera fan̈anaovanolo raha aby io, maro Vavolombelon̈o Jehovah mifidy tsy handeha amy tany misy izio, baka tsy hanafintohin̈y olo. Iro efa tapakevitry tsy han̈ano fomba han̈aboahan̈a fitiavan̈a tanindrazan̈a, fotony izio tsy mifan̈araka amy raha koran̈iny Baiboly. (Eksodosy 20:4, 5; 1 Jaona 5:21) Ankamarozanolo mifampikon̈o vera amy zioty io tsy mieritreritry foeky fa izio fombafombany fivavahan̈a. Kanefa misy antony maventy tsy han̈anaovany Kristianin̈y izio. Fomba io baka amy fivavahan̈a diso. Lan̈ianolo man̈ano izio miran̈a mangataka ny tsara amy ‘lan̈itry’ ndreky mangataka fan̈ampian̈a amindro fan̈ahy matanjaka mandilatra olombelon̈o.​—Eksodosy 23:2.