Tiandro piso aby io man̈adio vatan̈andro amy lelandro. Izikoa fa tsy mandry izy, efa kadiriny ampahefatrany fotoan̈anany laniny ililafany ain̈inany. Piso aby io mahavita man̈adio tsarabe vatan̈andro fotony miavaka fomba nan̈amboaran̈a lelandro io.

 Diniha hely baka: Amy lelampiso misy raha madiniky hely masakosako kadiriny 290. An̈atindro io amy zay samby misy raha karaha kanaly zay. Izikoa fa ampidiriny piso io an̈aty vavany ao lelanany, direkty misy rora miditry amy kanaly io. Ke isaka izy milelatra volovolonany, raha masakosako hely amy lelanany ao in̈y mandalo amy volovolo io iô, ke manjary misy rora mandeha aminy hoditrinany.

 Isanandra, lelampiso io mahavita mitatitry rora kadiriny 48 mililitara mandeha aminy hoditrinany ndreky volovolonany. Amy rora in̈y misy anzimy man̈adoso loto. Rora io izikoa fa manjary vapera, loso manintsinintsy oe vatan̈any piso io. Raha zen̈y ten̈a ilainy piso, fotony vitsy fo raha amy vatan̈anany ao miaro aminy hevoko.

 Izikoa misy mirekitry amy volovolony piso, ke tavela iô araiky amindro raha masakosako amy lelanany in̈y, loso mijotso lalin̈y an̈aty volovolonany an̈y izio ke mahaimahery fo. Ke vitany man̈asarasaraka volovolo io. Piso io koa izikoa fa man̈adio vatan̈anany, tendrony raha aby masakosako amy lelanany in̈y loso mikasiky hoditrinany. Raha zen̈y misy vokany tsara aminy hoditrinany. Pikaroko aby io nangala tahaka lelampiso. Iro nan̈andran̈a nan̈amboatra pain̈y borosy tsy mitovy aminy araiky mahazatra in̈y. Izio mora diovin̈y, salakady anao koa fa mampiasa izy tsy voatery man̈antsory mare. Baka io lan̈iany fan̈eva mirekitry manjary mora pahin̈iny. Pikaroko aby io mieritreritry fa lelampiso io mety han̈ampy iro hahita hevitry tsara. Ohatra, mba han̈amboaran̈a fitaovan̈a mety tsara han̈adiovan̈a tany feno fan̈eva, na han̈atsaran̈a fomba fan̈osoran̈a ranondraha na aody aminy hoditry misy volovolo.

 Akory hevitrinao? Navinavy hoazy fo ma lelampiso io, sa izio nisy namoron̈o?