Biby madiniky aby io izikoa tihitilin̈y ndreky han̈aniky amy raha baka io hahay raha man̈odidin̈y izy, iro tsy maintsy madio tsarabe antsendriky. Ohatra, izikoa maloto tandrokony vitsiky, ho sahiran̈a edy izy izikoa fa mitady lalan̈a ndreky mifandray amy namany avio tihahay fofokondraha. Zen̈y mahavy Alexander Hackmann, manampahizan̈a momba biby, nivolan̈a karaha ty: “Tsisy andra anao hahita biby madiniky maloto zen̈y.” Avio ho izy: “Efa haindro miaro ten̈a amy loto.”

 Diniha hely baka: Hackmann ndreky piaramiasa taminany nandiniky karazan̈a vitsiky araiky (Camponotus rufifemur). Nidinihindro tsarabe fomba an̈adiovany biby madiniky io tandrokonany. Hitandro fa amy vitiny vitsiky io misy volovolo isankarazany. Ke izikoa izy man̈adio tandrokonany in̈y, ampandaloviny ambaniny vitinany araiky ao tandrokonany araiky. Iro volovolo maventy ao aby io man̈adoso loto maventy. Amy vitinany ao koa misy volovolo karaha pain̈y madiniky hely. Elan̈elan̈any rantsan̈any pain̈y io miran̈a aminy habezany volovolo amy tandroko io iô. Ke izikoa fa mandalo iô tandroko io, tavela iô loto madinidiniky. Amy vitinany io iô koa misy volovolo karaha borosy in̈y, ke izio koa man̈adoso loto farany madiniky aby in̈y. Afaka firaka amy loto heliheliny lohany fanjaitry.

 Zahava karakory ataony vitsiky araiky man̈adio tandrokonany

 Hitaniry Hackmann ndreky ekipinany fa fomba fan̈adiovany vitsiky io tandrokonany io mety ampiasain̈y amy loziny. Iro piesy elektroniky farany madiniky hely aby in̈y baka ten̈a mila fitandreman̈a mare. Ke ten̈a tsara izikoa misy fomba mety hitanan̈a izio hadio fo, an̈atiny fotoan̈a han̈amboaran̈a izy in̈y. Fotony izikoa piesy io maloto, ndray hely fo, izio mety tsy hiasa tsarabe.

 Akory hevitrinao: Fahaizany vitsiky man̈adio tandrokonany io ma vokatra evolision, sa izio nisy namoron̈o?