ართ იეჰოვაშ მოწმე, სახელო მართა, ნამუთ გვატემალას ცხოვრენს, კექჩი ნინას გურაფლენს, ნამდა თე ნინაშა მორაგადე ხალხის ბიბლიურ ჭეშმარიტება გეგნოჩას. ართ დღას თიქ საავადმყოფოშე გიმიშუნ ფერ კოჩ ძირჷ. მართაქ თე კოჩის დეკვირუნ, ქეშიამჩნუ, ნამდა თინა კექჩიშ ართ-ართ გვალამ სოფელშე რდუ. კექჩიშ გვალამ სოფელეფს იეჰოვაშ მოწმეეფს ხშირას ქადაგება ვა მახერხებენა. მართაქ ქიმერთჷ თე კოჩშა დო მუთ უჩქუდუნ თი სიტყვეფით კექჩი ნინაშა ქუდურაგადუ.

 მართაქ თე კოჩის ბიბლიაშ გურაფა შეთავაზ. თიქ ხიოლით დეთანხმჷ, მარა უწუ, ნამდა თეშო ფარა ვა უღუდ. მართაქ გეუნწყჷ, ნამდა იეჰოვაშ მოწმეეფ ხალხის უფასოთ ოგურუანა ბიბლიას. თეწკუმა ართო, თინა ხოლო უწუ, ნამდა ბიბლიაშ გურაფაქ შილებედ ტელეფონით ხოლო ჩეტარკო დო ოჯახიშ წევრეფქ ხოლო მიღესკო მონაწილება. თე კოჩიქ დეთანხმჷ. მართაქ თის ბიბლიაშ „ახალ ქიანაშ თარგმან“ ქიმეჩჷ ესპანურ ნინაშა, მუშენდა თე კოჩის ესპანურ უჩქუდ. თეს გეძინელ, მართაქ თის ბიბლიაშ გურაფას ოხვარუნ ფერ საშვალება „მუს მოგურუანა ბიბლია სინამდვილეს?“ ქიმეჩ კექჩი ნინაშა. უკულიან მარას, თე კოჩიქ მუშ ოსურ დო ჟირ ბაღანაწკუმა ართო ბიბლიაშ გურაფა ქიდიჭყჷ ტელეფონით. ბიბლიაშ გურაფა მარაშე ჟირშა უღდეს. მართა იჩიებ: „კექჩი ჯგირო ვა მიჩქჷ, ათეშენ ბიბლიაშ გურაფას ესპანურ ნინაშა ვატარენდით. ბაღანეფს უჩქუდეს ესპანურ, მარა ოსურს მუშ ქომონჯ უთარგმნუნდჷ, მუდგას იფჩიებუდით“.

 თე კოჩ პასტორ რდუ ეკლესიას. თის, მუდგას ბიბლიაშე გურაფლენდჷ, მუშ მრევლის ხოლო გინოჩანდჷ; თინეფს ხოლო მოწონდეს, მუდგას ირჩქილუაფდეს დო ოკითხუდეს, სოვრეშე გებულენდჷ თე ინფორმაციეფს. მუჟამსით თიქ უწუ, ნამდა ბიბლიას გურაფლენდჷ, არძაქ მინდომ ბიბლიაშ გურაფა. თე შემთხვევაშ უკულ ხეთეშე, 15 პიროვნებაქ ქიდიჭყჷ მართაწკუმა ბიბლიაშ გურაფა ტელეფონით. თინეფს ტელეფონწკუმა ხოლოს მიკროფონ გეუძდეს, ნამდა მართაშ ხონარ არძაქ ქიგეგკო.

 მუჟამსით მართაქ მუშ კრებაშ უხუცესეფს ქეჩუ თე სიტუაციაშ გურშენ, ართ-ართ უხუცესიქ მიდართჷ თი სოფელშა, სოდეთ თე ხალხ ცხოვრენდჷ. უხუცესეფქ დაინტერესებულეფ საჯარო მოხსენებაშა დაპეჯეს, ნამდგას რაიონულ ზედამხედველ a გაკეთენდჷ სოფელს. თე სოფელშა მიოულარო დიო მანქანათ 1 საათ ოკო ულინდესკო დო უკულ კუჩხით 2 საათშე უმოს. თე მოხსენებაშ მარჩქილაფარო 17 ბიბლიაშ მაგურაფალქ ქიმერთჷ.

 მუსხირენ მარაშ უკულ რაიონულ ზედამხედველქ დო მუსხირენ იეჰოვაშ მოწმექ მიდართეს ბიბლიაშ მაგურაფალეფიშ ოძირაფშა დო ოთხ დღას ქუდოსქიდეს თინეფწკუმა. ოჭმარე-ოჭმარეს თინეფ უჯინედეს ჩქინ ვებგვერდის jw. org-ის კექჩი ნინაშა გედვალირ ბიბლიურ ვიდეოეფს დო გენიხილენდეს ბროშურას „მი ასრულენს იეჰოვაშ ნებას ამდღა?“. ონდღეს JW მაუწყებლობას უჯინედეს. რაიონულ ზედამხედველქ თიშე ხოლო ქიზრუნ, ნამდა იეჰოვაშ მოწმეეფქ თითოულ ბიბლიაშ მაგურაფალს პირადო ჩუტარესკო ბიბლიაშ გურაფა.

 ოთხ დღაშ დინახალე მოწმეეფქ იქადაგეს თი სოფელეფს, სოდეთ კექჩი ნინაშა მორაგადე ხალხ ცხოვრენს დო თინეფ სპეციალურ შეხვალამაშა დაპეჯეს. თე შეხვალამაშა მოულირ არძა 47 სტუმარს ჯიმალეფქ შეთავაზეს ბიბლიაშ გურაფა; ვითაართ ოჯახიქ ქიდიჭყჷ ბიბლიაშ გურაფა.

 მუსხირენ თუთაშა თი სოფელს, სოდეთ ჟიშე მოშინაფილ პასტორ ცხოვრენდჷ, უხუცესეფქ ქიზრუნეს, ნამდა შეხვალამეფ ირ საბატონ დო ჟეშხას ჩუტარებდესკო. ამდღა თე შეხვალამეფს სოდგარენ 40 კოჩ ოსწრჷ რეგულარულო. მუჟამსით ქრისტეშ ღურაშ გოშინაშ ონჯუა ჩატარეს, ჯიმალეფს მანგარო ახიოლეს თიშ ძირაფაქ, ნამდა თე ღონისძიებას 91 კოჩიქ დესწრჷ:

 თე გურიშემაკინალ შემთხვევას იშინანსინ, მართა იჩიებ: „მანგარო ვუმარდუქ იეჰოვას. მინშა ფიფქრენქჷ, ნამდა ბრელ მუთუნიშ კეთება ვეშემლებ. მარა თე დროს გუმაშინე, ღორონთ ჩქი გიმომრინუანა, ნამდა შხვეფს ქიმეხვარას. იეჰოვაქ ქოძირ თე სოფელს მახორუ კათაშ გურ დო მუწკუმა დაახლოებაშ შესაძლებლობა ქიმეჩ. თავრეშე იძირე, ნამდა იეჰოვას მართალო უჸორს თინეფ“.