ბრიტანეთის, პრინცესა დაიანაშ სახელიშ საქველმოქმედო ორგანიზაციაქ 10 წანერ ჰიუგოს, ამარდე სპეციალურ ჯილდო მეჩუ, მუშენდა თინა თანასკოლელეფს ოხვარუ, დუდი დითხილუან ბუნტიშდუდეფშე.

ჰიუგო იჩიებუ: «გრაფიკულ ანიმაცია „დეთხინე ბუნტიშდუდი ლიკვი დო ჩხუპიშ უმშო!“ ვა რდუკონ, თე ჯილდო ვა მაშიდუ. ვებ-გვერდის jw.org გედვალირ თე ვიდეორგოლიშ ჭყოლოფუათ, სკოლას მშვიდობაშ ელჩო გინიფრთი».

ჰიუგოქ თე ანიმაციურ ვიდეორგოლი პირველო მუშ მასწავლებელს ოძირუ. თექ თიცალო მეწონეს, ნამდა გეგნოჭყვიდეს, ვებ-გვერდი jw.org არძა მოსწავლეშო ჸოფედკონ ხეშამალაფარქ. ამდღა თი სკოლას, სოდეთ ჰიუგო გურაფლენსინ, 8-შე 10 წანერ ბაღანეფი ბრელშა მიშმულა ვებ-გვერდშა. თინეფიშ ნარაგადით, ვებ-გვერდის გედვალირ ინფორმაცია ოხვარუნა, მუჭოთ ბუნტიშ დუდიშ დათხინაფასინ თეშ თიცალ კითხვეფშე პასუხეფიშ გორუას, მუნერით რე, მაგალთო, „მუჭო შილებე პჸუნდას ნამდვილ მეგობრეფი?“.

ბრიტანეთიშ ხოლო ართ სკოლას 8 წანერ ელაიჯას მუშ მახანეფი გიაძიცანდეს დო ირდენდეს. ელაიჯაშ მშობლეფქ გეგნოჭყვიდეს, მუწკუმა ართო ქუჩიებინდესკონ ვიდეოშე „დეთხინე ბუნტიშდუდი ლიკვი დო ჩხუპიშ უმშო!“ თე განხილვაშ დროს ქილაჸაფეს სიტუაცია, მუჭო შეულებუდ მიქცუკო ელაიჯაქ, მუჟამსით მუშ მახანეფი ქიგიაძიცანდეს ვარდა ერდენდეს. თეცალ განხილვაშ ჭყოლოფუათ ელაიჯას გაბედულებაქ ქაშუ. ჭიჭე ხანიშ უკულ, თიშ დამრიგებელქ თე ვიდეო მთელ კლასის ქაჯინუ.

სკოლას გეძიცა დო არდება ხვალე ბრიტანეთის ვა უჩქუნა. თეცალ მუდგარენ მთელ მსოფლიოს რე. თე ვიდეორგოლი არძა კუნთხუშ ახალგაზრდას ოხვარ, ნამდა გეგნარჯგინან თე პრობლემას.

10 წანერ აივეს, ნამუთ შეერთებულ შტატეფს ცხოვრენსინ, ოშქურუდ ართ თანაკლასელ ძღაბშა, ნამუთ ირო აწვალენდუ დო ვასვანჯუანდ. ვიდეორგოლქ „დეთხინე ბუნტიშ დუდი“ მეხვარუ აივეს, უმოს გაბედულ ქოჸოფედუკო დო რკინაცალო ქეწოხვადუკო კლასელ ძღაბშე არდებას. თიქ მუშ პრობლემაშ გურშენ მასწავლებელს ხოლო ქოუწუ, ნამუქით სიტუაციაშ გიშანწყუალას მეხვარუ. ბოლოს აივეს მუშ ამხანაგიქ ბოდიში ქოუწუ დო ამდღა თინეფ ჯგირო რენა ართიანწკუმა.

იეჰოვაშ მოწმეეფს ოინტრესუნა ახალგაზრდეფიშ ჯგირობუა. ჩქი ჯვეშობურო ქიმვეხვარებუთ ახალგაზრდეფს, ნამდა თინეფქ გეგნარჯგინან ირდღაშიან პრობლემეფს, მაგალთო, მუნეფიშ მახანეფშე გეძიცას დო არდებას.