2013 წანას კვირკვეშ დაჭყაფუს, ბრაზილიას, ქალაქ სან-ფელის-დუ-შინგუს მახორუ 28 იეჰოვაშ მოწმექ კაიაპუ დო იურუნაშა გეგნოჭყვიდ ულა, სოდეთ ინდიელეფ ცხოვრენა. თინეფქ მალწყარ შინგუ 15 მეტრიან ნავით დინებაშ საწინააღმდეგოთ გეგნონჩურეს. თე მალწყარიშ სიგინძა 2 092 კილომეტრ რე დო ჩრდილოეთით მალწყარ ამაზონშა მიშურს.

იეჰოვაშ მოწმეეფიშ მიზან რდუ მალწყარიშ გოხოლუას ღორონთიშ სამეფოშ გურშენ სახიოლო ამბეშ ქადაგება. მასმა დღას სოფელ კოკრაიმოროს ქიმიოდირთეს. თექიანეფქ ხიოლით დოხვადეს მოწმეეფს დო პატი ცეს. ართ ოსურ თინეფჸურე აჭდოგაჭით უფინუანდ ხელეფს, მუშენდა მუდგარენ ოკოდ გაგებაფუკო. თექიან კოჩიქ ჯგუფის ეუნწყუ, თეცალ საქციელით მუშ რადაგ ოკოდ თე ოსურს: „არძაქ აშო ქუმორთით; თქვან გაჩინებაფა მოკონა!“

მოწმეეფი ირ კოჩის ურაგადუდეს, ნამთინეს პორტუგალიურო, ნამთინეს ხოლო ჟესტეფიშ ნინაშა. მანგარო მიმეხვარეს სურათამ ბიბლიურ პუბლიკაციეფქ. თექიანეფს არძაშ უმოსო მეწონეს ბროშურაქ „ურჩქილით ღორონთის“ დო ხიოლით ეჭოფეს ლიტერატურა.

სპეციალურ პიონერი, ჟერსონი გიშინანს ართ კოჩის, ნამუსით წიგნი „ბიბლიურ ისტორიეფი“ მიარზუ: „თიქ ქიგიოჯინ წიგნის დო ჟირხოლო ხეთ თიცალ მანგარო ეკუნჭირუ, ნამდა ხეშ გოტება ვაკოდუ“.

იეჰოვაშ მოწმეეფქ თე სოფელს მახორუ მარდიელ ხალხის სოდგარენ 500 წიგნი, ჟურნალი დო ბროშურა დოუტუეს. სოფელ კავატირს ხალხიქ დიდ ინტერესით მირჩქილუ ბიბლიას მოჩამილ იმენდი სამოთხეთ გინორთელ დედამიწას ცხოვრებაშ გურშენ. „კათა სამოთხეს თეშ იცხოვრენს, მუჭოთ ჩქი ფცხოვრენთ,“— თქუ ართ სტუმარიშ მოჸოროფე კაიაპუელ ინდიელქ, ტონგჟაიკვაქ.

ქალაქ სან-ფელის-დუ-შინგუს ბრელს უჩქუდ, ნამდა მოწმეეფი აპირენდეს მალწყარ შინგუშ გოხოლუაშა ულას. ჯგუფიშ ართ-ართ წევრი, სიმონი გიშინანს, ნამდა მუშ ქალაქის ნამთინე ფიქრენდ, ითამ თენეფს სოფელეფშა მითინ ვემშაშკვანდუ, მარა მოწმეეფს მუთუნნერ პრობლემა ვა შიებუნა. სიმონი იჩიებუ: „თექიანეფქ შურ დო გურით შეფხვადეს დო არძაწკუმა ქიფქადაგით“.