2013 წანაშ 6—16 ივანობას ჩრდილოეთ საფრანგეთიშ საპორტო ქალაქ რუანშა მილიონობით ტურისტიქ მერთუ, მსოფლიოს არძაშ უდიდაშ დო უსქვამაშ ზღვაშ ფლოტიშ — არმადაშ ოძირაფშა.

120 კილომეტრიშ მიკულაშ უკულ ღარკულერ მალ წყარს, სენას, ქვერსემ გემეფქ ღუზეფ ქენაშქვეს თოლშა მალაფარ ნორმანდიაშ გემეფიშ ეკარინალ შქვით კილომეტრიან წყარ პიჯის. ვით დღაშ დინახალე სტუმარეფს შეულებუდეს მუთუნშა ვეშიდარებენ ფერ 45 გემშა ეშულა, ნამუთ თე ფესტივალშა რდუ გიშაჸუნაფილ.

მუქ გინაჭყვიდირაფუ არძანერ ხანიშ კათას, ქიმეურთუმუდესკონ თე ფესტივალშა? ფესტივალიშ ორგანიზატორეფ დო დუმარსხუაფალეფ იჩიებნა, ნამდა არმადა ხალხის საშუალებას არზენს „ხოლოშე ქოძირან ზღვაშ გიგანტეფ, ნამუთ კოჩის ოცნებაშ ხასიათშა მიჸუნანს“. ახალგაზრდეფს დო ხანიერეფს თოლშა გიწუდირთუნა შორშა ოულარ შარა, მუჟამს თეცალ ქვერსემ გემეფს ორწყენა.

რუანშა მოულირ ანთასობით ტურისტიქ ხოლო უმოს საინტერესო ამბე გეგუ, ნამუთ ნანდულ ალობას ოხუ — ალობა, ნამუშ გურშენით ბიბლიას რე რაგადი (იოანე 8:31, 32). მუჟამსით სტუმარეფ შქასაუკუნეშ ქალაქ რუანს ილენდეს დო ხალხით გინოჭკადილ ჭიფე ქუჩეფს გილეშესინ, იეჰოვას მოწმეეფიშ სტენდეფს ხოლო ქუმუკინდუეს თოლი. მუჟამს ტურისტეფ დო მეზღვაურეფ სტენდეფშა მიშესინ, მოწმეეფ უფარეთ არზენდეს ბიბლიურ ლიტერატურას. ბრელქ დეინტერეს ჟურნალ „საგუშაგო კოშკიშ“ დუდ ფურცელით „მსოფლიო გიშაკერზაფაშ უმშო — მუჟამს?“. მოწმეეფქ თინეფ ბიბლიაშა გერსხილ მოხსენებაშ მარჩქილაფშა დაპეჯეს, ნამუთ ფრანგულ, ესპანურ დო ინგლისურ ნინაშა იჸუაფუდ.

თექიან მახორუ კათა თე ირფელიშ გურშენ მოწმეეფიშ მარდულეფ რდეს. ართ კოჩიქ მოწმეეფ ქოძირ სტენდწკუმა გერდესინ თეშ დო გაკვირებულქ თქუ : „მოხიოლ, მუჟამსით ქუჩეფს გორწყეთ. მართალ რე, თქვა რწანან თინა მა ვა ბჯერს, მარა პატის რცენთ, თქვან რწმენას მანგარო იცვენთინ თიშ გურშენ“. ჟირ ხანიერ ქომოლკოჩიქ ახალგაზრდა მოწმეეფს უწუ: „თქვა მართალო გიღუნა ოამაყებელო საქმე!‘‘.