საშუალება ვა უღუნან ფერ ქიანეფს თოლს ვარწყენან ფერ კათას ვა უღუნა თიცალ პირობეფი, მუნერით შხვა ქიანეფს. თინეფს ხალხწკუმა ვა უღუნა ურთიერთობა დო ვართ მუთთუნერ მოხვარა, ნამუთ არძაშ უმოსო ოსაჭირუნა, მუშენდა მუნეფიშით ვა კეთებენა თიცალ საქმეეფი, ნამუთ თოლს ორწყენან თი კათაშო ეფი ოკეთებელ რე. მაგალთო, თინეფს შილებე გუჭირდან მუნეფიშით ოჸიდირალეფშა ულაქ, ავტობუსით გილულაქ დო არძაშ უმოსო ფარაშ ხარჯებაქ. პრობლემა თინა ხოლო რე, ნამდა ნამთინეს ვეშულებ ბრაილიშ შრიფტით კითხირ ვარდა ვა უღუ თეცალ პუბლიკაცია, მუშენდა თინა ვებეშტუ მუნეფიშ ნინაშა.

100 წანაშე მეტ რე იეჰოვაშ მოწმეეფი ბიბლიურ პუბლიკაციეფს თოლს ვარწყენან თინეფშო ხოლო გიშაშკვანა. ჩიჩევა ნინაშა ხოლო ქოჸოფედკო ბიბლიაშა გერსხილ ლიტერატურა ბრაილიშ შრიფტითინ თიშენ, ჭიჭე ხანიშ წოხოლე მოწმეეფქ ნიდერლანდეფშე მალავიშა ოჯღონეს ბრაილიშ ობეშტალ მანქანა დო კინძუაშ მონწყილობეფი.

ლაოქ, ნამუსით ბრელ ხან რე ბრაილიშ შრიფტით პუბლიკაციეფიშ გიშაშკუმალაშა მეუთხუ ხე, იეჰოვაშ მოწმეეფიშ ბრაზილიაშ ფილიალშე მალავიშა იდუ. თიქ ხუთკოჩიან ჯგუფის დაგურუ ჟიშე მოჸუნაფილ მონწყილობეფიშ დო იეჰოვაშ მოწმეეფიშ ნაკეთებ სპეციალურ პროგრამაშ გიმორინაფა, ნამუსით ტექსტი შხვადოშხვა ნინაშ, თიწკუმა ართო ჩიჩევა ნინაშ, ბრაილიშ შრიფტშა გინოჸუნს. პროგრამაქ ტექსტი შხვადოშხვა ნინაშა გეგნიჸონას თიშენ, საჭირო რე, ტექსტიშ დო ბრაილიშ შრიფტიშ წინასწარ მოხაზირება. პროგრამას ტექსტი ბრაილიშ შრიფტშა გინოჸუნს დო ბოლოს თინა თიცალო გინირთუ, ნამდა თოლს ვარწყენან თინეფს შეულებუნა თიშ კითხირ. მუსხირენ მალაველ იეჰოვაშ მოწმე იჩიებუ, მუჭო ოხვარუ თინეფს ბრაილიშ შრიფტით გიშაშკუმალირ პუბლიკაციეფი.

ართ ახალგაზრდა იეჰოვაშ მოწმე, მუნიარაძი, ნამუთ თოლს ვარწყე, გვერდი დღას მუშენს; თის რადიოპროგრამა მეჸუნს. თეშ გარდა თის თუთას სოდგარენ 70 საათი არძაშ უმოს მნიშვნელოვან საქმეშო აფუ გიმორთილ — შხვეფს ბიბლიას ოგურუანს. თინა იჩიებუ: „აიშახ ბრაილიშ შრიფტით გიშაშკუმალირ პუბლიკაციეფს ინგლისურ ნინაშა პკითხულენდ, მარა ასე, მუჟამს ჩქიმ ნინაშა პკითხულენქინ, გვალო შხვანერო ბგინაფლენქ დუდის — ნაკითხირ გურშა მეურს პირდაპირ. მარდულ ვორექ თი და დო ჯიმალეფიშ, მით ვართ დუდის ზოგენს დო ვართ ფარას, ბრაილიშ შრიფტით გიშაშკუმალირ პუბლიკაციეფი ჩქინ ნინაშა წეპკითხათინ თიშენ. მეტებულო ვაბგინაფლენქ დუდის დო თის ხოლო ვორწყექ, ნამდა და დო ჯიმალეფი მაფასენა“.

ფრანსისი იეჰოვაშ მოწმე რე დო მალავიშ ჩრდილოეთ ნაწილს ცხოვრენს. თინა თოლს ვარწყე, ათეშგურშენ ართ დროს პუბლიკაციეფს შხვეფი უკითხანდეს. მუჟამსით პირველაშო ქოძირუ ბრაილიშ შრიფტით გიშაშკუმალირ პუბლიკაცია ჩიჩევა ნინაშან, ხიოლით ქიმიოძახუ: „სიზმარს ვორექინ მიჩქუ! თენა მუთუნით ვადმაჯერებე!“

ლოისი ხოლო თოლს ვარწყე; თინა სრულ დროთ მსახურენს დო 52 კოჩის მეხვარუ, დუთირუდესკო ცხოვრებაშ წესი დო ქიგურინდესკო სწორ შარაშა. მუჟამს შხვეფს ბიბლიაშ გურუფას ოხვარუნ, ბრაილიშ შრიფტით გიშაშკუმალირ პუბლიკაციას გიმირინუანს (იეჰოვაშ მოწმეეფი გიშაშკვანა თოლს ვარწყენან თინეფშო დო შხვეფშო ხოლო).

ლაო იჩიებუ: „მანგარ ბედნერ ვორექ, მუჟამს ვორწყექ, მუჭო ოხიოლუ ხალხის მუნეფიშ ნინაშა ბრაილიშ შრიფტით გიშაშკუმალირ ლიტერატურაშ კითხირ. ბრელ იჩიებუ, ნამდა უმარდუნა იეჰოვას დო ბედნერეფ რენა, მუშენდა მუნეფიშით შეულებნა მემზადან კრებაშ შეხვალამაშო დო მსახურებაშო; შხვეფშა ვაფუნა ოთხუალ, ქოუკითხან დო ასე თინეფიშ პირად გურაფას დასურო პირად ჯოხო; ასე უმოსო შეულებნა ქიმეხვარან ოჯახიშ წევრეფს მირდან სულიერო. არძაშ უმოს მთავარ თინა, ნამდა ბრაილიშ შრიფტით გიშაშკუმალირ პუბლიკაციეფიშ ჭყოლოფუათ უმოს ხოლოს რენა იეჰოვაწკუმა“.