Zenezi 29:1-35
29 Tawamhã Zaco, timorĩ na ma te oto ãma uzusi. Tahawa bâtâ pusizém niwĩ ro ꞌre ihâimana mono u ma tô wi.
2 Wisi wamhã, nimahã bâtâ na ma tô â zô abꞌre aꞌubuni wi ihâiba hã tãma waihuꞌu õ nherẽ, sõpẽtẽ. Poneꞌẽrebâ norĩ, siꞌubdatõ si ihâiba na iwaꞌõno, ma tô ꞌrâwi iꞌrata isimiꞌwara hã siwi uirĩ. Tame â zô abꞌre ãma ma tô danhimizama te te ꞌre âhuri. Â zô abꞌre ẽtẽ tõmo wawẽ na isitobzé hã, isaꞌẽtẽ uptabi.
3 Tame poneꞌẽrebâ ꞌmadâꞌâꞌwa norĩ, uburé tinhimizama na ꞌre sito mono wamhã, te za abꞌre nhidâzé hã te te siwi ꞌre saꞌré, tinhimizama ma, te te ꞌre amrami zaꞌra mono da hã. Taha pari te za duré apâ te te ãma siwi ꞌre sidâ.
4 Tawamhã Zaco te poneꞌẽrebâ ꞌmadâꞌâꞌwa norĩ sadanharĩ zaꞌra ãne:
— Ĩsiwaihuꞌu norĩ, e ma hã asaꞌru zaꞌra waꞌwa.
— Wa norĩ hã Harã ãma ꞌre iwarob zaꞌra mono. — Ãne ma tô asa sadaꞌâbâ zaꞌra.
5 Tawamhã te duré Zaco sadanharĩ zaꞌra ãne:
— E aima waihuꞌu pese zaꞌra waꞌaba di, Labã, Naoho ꞌra hã.
— Ĩhe, wama waihuꞌu pese zaꞌra di. — Ãne ma tô duré asa sadaꞌâbâ zaꞌra.
6 Te duré tawamhã ihâiba na, Zaco ãma sadanharĩ zaꞌra ãne:
— E rowẽ na te ꞌre hâimana.
— Ĩhe, rowẽ na te ꞌre hâimana. Õhõta iꞌra Raqueu te we poneꞌẽrebâ hã te te simro.
7 Tawamhã Zaco te tinha ãne:
— Zahadu aré bâtâ hâ di. Ãhã wa, poneꞌẽrebâ we iꞌubumroi waꞌaba mono hã zahadu sadai õ di. Tahawa e aré bété wẽ õ di, aꞌâ tô â hã tãma õb zaꞌra waꞌaba da, taha pari duré apâ ate mono bâ aꞌubuni u isimroi waꞌaba mono da hã, du te te ꞌre huri mono da.
8 Tawamhã asa ma te ãma sadaꞌâbâ zaꞌra ãne:
— Mare di. Waihuꞌu õ di. Wa za aꞌâ wasisô mapari zaꞌra ni, pibu pese na, aihĩni pese we ãwa aꞌâ poneꞌẽrebâ norĩ hã sihutu da. Tawapsi abꞌre nhidâzé ẽne hã wa za wasiwi saꞌré ni. Tawamhã â wa za oto tãma õb zaꞌra ni, wanhimizama norĩ ma hã.
9 Tawamhã Zaco zahadu, te te tãma nharĩ zaꞌra ré, Raqueu poneꞌẽrebâ ꞌmadâꞌâꞌwa ma tô itẽmemhã tiwisi zaꞌra, timama nhimizama ré hã.
10 Tawamhã Zaco, timama wapté Labãhã te, poneꞌẽrebâ norĩ siré Raqueu we imorĩ hã te te ꞌmadâꞌâ wi, ma tô abꞌre nhidâzé ẽne te te saꞌré da hã sô aiꞌré. Te te saꞌréi wamhã, ma tô tãma õb zaꞌra, timama waptép te ma hã.
11 Taha pari, ma tô duré Raqueu hã oto tobꞌrata hârâ na sawi. Tawamhã wawa ꞌrãihâ na te duré ãma aiwaꞌõ.
12 Tawamhã te tãma siwasuꞌu ãne:
— Wa hã aimama ꞌra waptéb uptabi, Rebecaha ꞌra.
Tawamhã ãne tãma siwasuꞌu wa, ma tô Raqueu wara, timama ma, te te tãma wasuꞌu da.
13 Tawamhã tiꞌra wapté wasuꞌu wẽ te te wapari wi, ma tô siꞌabaꞌré na itẽme watobro, te te sõpẽtẽ da. Tawamhã Labã, Zaco te te sina uzusi wi, ma tô tinhoꞌutu tiꞌâ. Ma tô duré tobꞌrata hârâ na sawi. Ãhã wa, ma tô saprõ, tinhorõwa u. Tawamhã Zaco uburé tãma iromhâimanazé te te tãma wasuꞌu wa,
14 ma tô Labã hã tãma tinha ãne:
— Ĩhe, tô sena tô, a hã ĩsiwapru uptabi.
Tawamhã Zaco, misi aꞌamo na ma tô timama wapté nhorõwa ãma hã nhamra.
Zaco, Léia norĩ ãma, Raqueu me ãma imro zahuré zé wasuꞌu
15 Tawamhã Labã te Zacoho ma tinha ãne:
— Ĩma hã ibâi õ di, ĩsiwapru na aihâimana nherẽ, waꞌâbâ ãna ĩma ꞌre iromhuri mono da hã. Tahawa e niha te asima iwẽ, asimiromhuri waꞌâ ꞌre imrami mono da hã.
16 Labãhã ꞌra sipiꞌõ te maparane ꞌre hâimana zahuré. Idubꞌrata nhisi hã Léia na, duré ino nhisi hã Raqueu na.
17 Léia hã simirobꞌmadâꞌâ warõire di. Raqueu si iꞌubu wẽ, duré ihâiba wẽ.
18 Tawamhã Zacoho ma, Raqueu tãma iwẽ uptabi zarina, ma ãne asa ãma sadaꞌâ:
— 7 wahum na wa za tô aima romhu, Raqueu ãma ĩmro da hã.
19 Tawamhã Labã ãne ma te ãma sadaꞌâ:
— Wẽ di ĩma hã, aibâ aimawi upana ĩꞌra te aima isõmri da hã. Tahawa, ãme ĩꞌrata ꞌre aihâimana mono.
20 Tawamhã Zaco, Raqueu zô 7 wahum na ma tô te te ꞌre romhuri. Tane nherẽ, te te ꞌre sawi pese mono wa, ma tô bâtâ umro ne waꞌa ãna te te sô ꞌre romhuri pese.
21 Tawamhã Zaco, 7 wahu oto iwa waptãꞌã wamhã, ma tô timama wapté Labãhã ma tinha ãne:
— Ĩma sõmri oto piꞌõ, ãma ĩmro da hã. 7 wahu wa te wasima itizé hã ma tô oto saꞌre. Tahawa wa oto ĩsima wẽ, ãma ĩmro da.
22 Tawamhã Labã, dasa isaꞌẽne ma tô ꞌmanha. Tahawa, ma tô irob ꞌre uburé ꞌre idahâimana zaꞌra mono norĩ zô hã hâ.
23 Tane nherẽ, tô taha mara na Labã, tiꞌra Léia Raqueu upana ma tô tãma saprõ. Tahawa, Zaco iré hâimana mono wamhã, ma tô oto ãma panomro.
24 (Labã, tite romhuriꞌwa Ziupa na isisi hã, ma tô tiꞌra Léiaha ma tisõ, tãma iromhuriꞌwa da hã.)
25 Tawamhã Zaco awẽm na si, Léiaha ré isõtõ na hã ma tô oto upsibi me. Tahawa timama wapté na timaprebaba ma, ma tô tãma aiwapsa. Tahawa te tãma tinha ãne:
— E marĩ da, ma ãne hã ĩma iꞌmanha. Raqueu ĩma ꞌre hâimana mono da wa tô aima te ꞌre romhuri. E marĩ da, ma bété ĩma asadawa nhipe.
26 Tawamhã Labã ma te asa ãma sadaꞌâ ãne:
— Ãhã tiꞌai ꞌre, ꞌre iwahâimana zaꞌra mono zé hã, dano uimrehẽne dadubꞌrata wana, ꞌre mro zaꞌra mono da, aibâ ma hã da te tãma ꞌre sõmri zaꞌra mono õ di.
27 Tahawa, dasa isaꞌẽne asina aimro waꞌaba saiwĩrĩzé te iꞌmanharĩzém na hã aꞌâ ã hã romhuri hã ãma siꞌutõrĩ. Tawamhã duré 7 wahum na ĩma ꞌre romhuri mono da, a hã ropisutu da wapsi hã, wa za Raqueu ino hã oto aima tisõ za, aimro da.
28 Tawamhã Zaco ma tô ãma saze. Tahawa Léia imrozém na dasa isaꞌẽne ihâimana na misi romhuri siꞌutõrĩ pari, ma tô duré Labã tiꞌra, Raqueu ãma mro da hã oto tãma tisõ.
29 (Labã, tite romhuriꞌwa Bira na isisi hã, ma tô tiꞌra Raqueu ma tisõ, tãma iromhuriꞌwa da hã.)
30 Tawamhã Zaco, te oto duré Raqueu ãma hã hâimana. Léiaha nhipai u te õhõ si te te ꞌre sawi pese. Tawamhã 7 wahum na, ma tô duré aꞌâ te te tãma ꞌre romhuri, Labãhã ma hã.
Zacoho ꞌra norĩ wasuꞌu
31 Tawamhã Uburé Danhibꞌapito, Zaco, Léia te te siwi iwẽꞌõ na te te ꞌmadâꞌâ wa, ma tô ꞌra da hã tãma ꞌmanha, wasã da. Tane nherẽ, Raqueu te zahadu ꞌra waihuꞌu ãna ꞌre hâimana.
32 Tawamhã Léia oto wasã wamhã, ma tô iꞌra hã tãma podo. Ta hã ma tô sisi, Rubẽ* na. Tawamhã ãne ma tô ãma rowasuꞌu:
— Uburé Danhibꞌapito robzei ãna ĩhâimanazé hã ma tô ꞌmadâ. Tahawa ãhã na hã ĩmro te za oto ĩzawi â.
33 Tawamhã duré Léia apâ wasã zahu wamhã, ma tô iꞌra hã tãma podo. Ta hã ma tô duré sisi, Simiã* na. Tahawa te ãne duré tinha:
— Uburé Danhibꞌapito, ĩmro te te ĩzawiꞌõzém na hã ma tô mapa. Tahawa ma tô duré ã hã ĩꞌra ĩma tisõ.
34 Tawamhã Léia duré apâ wasã wamhã, ma tô iꞌra tãma podo. Ta hã ma tô duré sisi, Levi* na. Tahawa te duré ãne tinha:
— Ĩmro hã te za oto sina ĩhâibato pese, siꞌubdatõ ĩzéꞌre hawimhã iꞌra hâimana zaꞌra wa oto.
35 Taha pari duré apâ wasã wamhã, ma tô duré iꞌra tãma podo. Tawamhã ta hã ma tô sisi, Zuda* na. Ãhã wa, te duré tinha ãne:
— Uburé Danhibꞌapito ãma wa za tô oto ꞌre ĩwata.
Taha parimhã oto ꞌra zahu õ di aꞌâ, Léia hã.
Ĩwaꞌõtõ piꞌreba watsuꞌu mono
^ 29:32 Rubẽ hã hebreu norĩ mreme na “ꞌMadâꞌâ, ĩꞌra hã!” aiwa prã na ne iwapari na hã, duré “Ta hã ma tô ĩwi irobzeiꞌõzé ꞌmadâ.” aiwa prã na ne iwapari na hã.
^ 29:33 Simiã hã hebreu norĩ mreme na “dawapari” aiwa prã na ne iwapari na hã.
^ 29:34 Levi hã hebreu norĩ mreme na “dahâiba sito” aiwa prã na ne iwapari na hã.
^ 29:35 Zuda hã hebreu norĩ mreme na “dawatazé” aiwa prã na ne iwapari na hã.
