Soane 8:12-59
8 12 Neʼe toe palalau leva ia Sesu ki te hahaʼi, ʼo ina ui fenei: “Ko au te malama ʼo te malamanei. Ko ʼae ʼe mulimuli mai ia te au, ʼe mole haʼele anai ʼi te fakapoʼuli, kaʼe ʼe ina maʼu anai te malama ʼo te maʼuli.”
13 Neʼe ui fenei e te kau Faliseo kia te ia: “ ʼE ke fakamoʼoni ʼo ʼuhiga mo koe totonu, koia ko tau fakamoʼoni ʼe mole moʼoni.”
14 Neʼe ui fenei e Sesu kia natou: “Tatau aipe pe ʼe au fakamoʼoni ʼo ʼuhiga mo au totonu, kaʼe ko taku fakamoʼoni ʼe moʼoni koteʼuhi ʼe au iloʼi pe ʼe au haʼu maifea pea mo au alu kifea. Kaʼe ʼe mole kotou iloʼi pe ʼe au haʼu maifea pea mo au alu kifea.
15 ʼE kotou faifakamau ʼo mulimuli ki te ʼu lekula fakatagata.* ʼE mole au fakamauʼi au he tahi.
16 Kaʼe tatau aipe pe ʼe au faifakamau, kaʼe ko taku fakamau ʼe moʼoni koteʼuhi ʼe mole au tokotahi, kaʼe ʼe fakatahi mo au ia te Tamai ʼae neʼe ina fekauʼi mai au.
17 Pea ʼe toe tohi fenei foki ʼi takotou Lao: ‘Ko he fakamoʼoni ʼa he toko lua, ʼe moʼoni.’
18 ʼE au fakamoʼoni ʼo ʼuhiga mo au totonu, pea ʼe toe fakamoʼoni foki ʼo ʼuhiga mo au ia te Tamai ʼae neʼe ina fekauʼi mai au.”
19 Neʼe natou fehuʼi fenei leva kia te ia: “ ʼE ʼifea tau Tamai?” Neʼe tali fenei e Sesu: “ ʼE mole kotou iloʼi au pea mo taku Tamai. Ka na neʼe kotou iloʼi la ia au, neʼe kotou toe iloʼi foki mo taku Tamai.”
20 Neʼe ina fai te ʼu palalau ʼaia ʼi te faʼahi ʼae neʼe tuʼu ai te ʼu puha tanaki paʼaga, ʼi tana faiakonaki ʼi te fale lotu. Kaʼe neʼe mole puke ia ia e he tahi, koteʼuhi neʼe heʼeki hoko mai tona hola.
21 Pea neʼe ina toe ui fenei kia natou: “ ʼE au alu, pea ʼe kotou kumi anai au, kaʼe ʼe kotou mamate anai ʼi tokotou ʼuhiga agahala. Ko te potu ʼae ʼe au alu anai ki ai ʼe mole feala ke kotou ʼomai ki ai.”
22 Neʼe ui fenei leva e te kau Sutea: “ ʼE fakamate anai koa ia? Koteʼuhi ʼe ina ui fenei: ‘Ko te potu ʼae ʼe au alu anai ki ai ʼe mole feala ke kotou ʼomai ki ai.’ ”
23 Neʼe ina ui fenei kia natou: “ ʼE kotou ʼomai mai te ʼu potu ʼo lalo nei. ʼE au haʼu au mai te ʼu potu ʼo ʼoluga. ʼE kotou ʼomai mai te malamanei, ʼe mole au haʼu au mai te malamanei.
24 Ko te tupuʼaga la ʼaia ʼo taku ui fenei atu kia koutou: ʼE kotou mamate anai ʼi tokotou ʼuhiga agahala. Koteʼuhi kapau ʼe mole kotou tui ʼe ko au ia ia ʼae neʼe tonu ke haʼu, pea ʼe kotou mamate anai ʼi tokotou ʼuhiga agahala.”
25 Neʼe natou fehuʼi fenei leva kia te ia: “Ko ai ia koe?” Neʼe ui fenei e Sesu kia natou: “Kotea te ʼuhiga ʼo taku palalau atu kia koutou?
26 ʼE lahi te ʼu faʼahi ʼe tonu ke au palalau ki ai ʼo ʼuhiga mo koutou pea ke au fakamauʼi. Ko Ia ʼae neʼe ina fekauʼi mai au ʼe moʼoni, pea ko te ʼu meʼa ʼae neʼe ina fakaha mai ʼe au fakaha ki te malamanei.”
27 Neʼe mole natou mahino neʼe palalau age kia natou ʼo ʼuhiga mo te Tamai.
28 Neʼe ui fenei leva e Sesu: “ ʼI takotou ʼosi lagaʼi ake ia te Foha ʼo te tagata, ʼe hoki kotou iloʼi ai anai ʼe ko au ia ia ʼae neʼe tonu ke haʼu pea ʼe mole au fai he meʼa ʼi toku loto faʼitaliha. Kaʼe ohage pe ko te akoʼi au e te Tamai, ʼe au fakaha te ʼu meʼa ʼaia.
29 Pea ko Ia ʼae neʼe ina fekauʼi mai au ʼe fakatahi mo au. Neʼe mole ina liakī au koteʼuhi ʼe au fai tuʼumaʼu pe te ʼu meʼa ʼae ʼe ina leleiʼia.”
30 ʼI tana fai te ʼu palalau ʼaia, tokolahi neʼe natou tui kia te ia.
31 Pea neʼe ui fenei e Sesu ki te kau Sutea ʼae neʼe tui kia te ia: “Kapau ʼe kotou nonofo ʼi taku folafola, ko koutou ko ʼaku tisipulo moʼoni.
32 ʼE kotou iloʼi anai te moʼoni, pea ʼe fakaʼateaina anai koutou e te moʼoni.”
33 Neʼe natou tali fenei kia te ia: “Ko matou ko te hakoga ʼo Apalahamo pea neʼe mole matou kaugana ʼi he temi ki he tahi. He koʼe ʼe ke ui fenei: ‘ ʼE kotou ʼateaina anai’?”
34 Neʼe tali fenei e Sesu kia natou: “ ʼE au tala moʼoni atu kia koutou, ko he tahi ʼe ina fai he agahala ʼe kaugana ia ki te agahala.
35 Pea tahi, ko te tagata kaugana ʼe mole nofo ia ʼi te loto fale ʼo talu ai, kaʼe ko te foha ʼe nofo ia ʼo talu ai.
36 Koia kapau ʼe fakaʼateaina koutou e te ʼAlo, ʼe kotou ʼateaina moʼoni anai.
37 ʼE au iloʼi ko koutou ko te hakoga ʼo Apalahamo. Kaʼe ʼe kotou faigaʼi ke kotou matehi au, koteʼuhi ʼe mole tuputupu taku folafola ia koutou.
38 ʼE au palalau ki te ʼu meʼa ʼae neʼe au sio ki ai ʼi taku nofo ʼae mo taku Tamai, kaʼe ʼe kotou fai koutou te ʼu meʼa ʼae neʼe kotou logo ki ai mai takotou tamai.”
39 Neʼe natou ui fenei kia te ia: “Ko tamatou tamai ko Apalahamo.” Neʼe ui fenei e Sesu kia natou: “Ka na pau la ko koutou ko te ʼu fanau ʼa Apalahamo, neʼe kotou fai te ʼu gaue ʼa Apalahamo.
40 Kaʼe ʼe kotou faigaʼi ke kotou matehi au, ia au ʼae neʼe ina fakaha atu te moʼoni ʼae neʼe au logo ki ai mai te ʼAtua. Neʼe mole fai e Apalahamo ia te faʼahi ʼaia.
41 ʼE kotou fai te ʼu gaue ʼo takotou tamai.” Neʼe natou ui fenei kia te ia: “ ʼE mole ko matou ko ni fanau taka, kaʼe ko tamatou Tamai pe ʼe tahi, ko te ʼAtua.”
42 Neʼe ui fenei e Sesu kia natou: “Ka na pau la neʼe ko te ʼAtua takotou Tamai, neʼe kotou ʼoʼofa ia au, he neʼe au haʼu mai te ʼAtua pea ʼe au ʼi heni. Neʼe mole au haʼu ʼi toku loto faʼitaliha, kaʼe neʼe ko Ia ʼae neʼe ina fekauʼi mai au.
43 He koʼe ʼe mole kotou mahino ki ʼaku palalau? Koteʼuhi ʼe mole feala ke kotou fagono ki ʼaku folafola.
44 ʼE kotou ʼomai mai takotou tamai te Tevolo, pea ʼe kotou fia fakahoko te ʼu holi ʼo takotou tamai. Ko ia ʼaia neʼe faifakapo ʼi te kamataʼaga, pea neʼe mole haga nofo ia ʼi te moʼoni, koteʼuhi ʼe mole nofo te moʼoni ia ia. Ka ina tala te loi, ʼe palalau ia ʼo mulimuli ki tona ʼuhiga, koteʼuhi ʼe gutuloi pea ʼe ko te tamai ʼo te loi.
45 Kaʼe, ʼuhi ʼae ʼe au tala atu te moʼoni, ʼe mole kotou tui mai kia te au.
46 Ko ai ia koutou ʼe feala ke ina fakamoʼoni neʼe au agahala? Kapau ʼe au tala te moʼoni, pea he koʼe ʼe mole kotou tui mai kia te au?
47 Ko ʼae ʼe haʼu mai te ʼAtua, ʼe fagono ki te ʼu folafola ʼa te ʼAtua. Ko te tupuʼaga ʼaia ʼo takotou mole fagono, he ʼe mole kotou ʼomai mai te ʼAtua.”
48 Neʼe ui fenei e te kau Sutea kia te ia: “Neʼe mole tonu koa la tamatou ui fenei: ‘Ko koe ko he Samalitana pea ʼe nofo ia koe he temonio’?”
49 Neʼe ui fenei e Sesu: “ ʼE mole nofo ia au he temonio kaʼe ʼe au fakamaʼuhigaʼi taku Tamai, pea ʼe kotou fakalainoaʼi au.
50 Kaʼe ʼe mole au kumi ke fakakololiaʼi au. ʼE ʼi ai he Tahi ʼe ina kumi pea mo faifakamau.
51 ʼE au tala moʼoni atu kia koutou, kapau ʼe mulimuli he tahi ki taku folafola, ʼe mole mate anai.”
52 Neʼe ui fenei e te kau Sutea kia te ia: “Kua matou iloʼi leva ʼe nofo ia koe he temonio. Kua mate ia Apalahamo, ʼo toe feia mo te kau polofeta, kaʼe ʼe ke ui fenei koe: ‘Kapau ʼe mulimuli he tahi ki taku folafola, ʼe mole mate anai ia ʼi he temi.’
53 ʼE ke lahi age koa la koe ʼi tamatou tamai ko Apalahamo, ʼae kua mate? Kua toe mamate foki mo te kau polofeta. Koia, ui mai pe ko ai ia koe.”
54 Neʼe tali fenei e Sesu: “Kapau ʼe au fakakololiaʼi au, pea ʼe mole he ʼuhiga ʼo toku kololia. Kaʼe ʼe fakakololiaʼi au e taku Tamai, ia ia ʼae ʼe kotou ui ʼe ko tokotou ʼAtua.
55 Kaʼe ʼe mole kotou iloʼi ia ia, kaʼe ʼe au iloʼi au ia ia. Pea kapau neʼe au ui ʼe mole au iloʼi ia ia, ʼe au liliu anai ko he tagata gutuloi, ohage ko koutou. Kaʼe ʼe au iloʼi ia ia pea ʼe au mulimuli ki tana folafola.
56 Ko Apalahamo takotou tamai neʼe fakafiafia lahi ʼi tana ʼamanaki ʼae ke sio ki te ʼu meʼa ʼae ka au fai anai, pea neʼe sio ki ai pea neʼe fakafiafia.”
57 Pea neʼe ui fenei e te kau Sutea kia te ia: “Heʼeki ke taʼu 50 kaʼe kua ke sio koe kia Apalahamo?”
58 Neʼe ui fenei e Sesu kia natou: “ ʼE au tala moʼoni atu kia koutou, ʼi muʼa ʼo te tupu ʼo Apalahamo, neʼe kua au maʼuli au.”
59 Neʼe natou toʼo ai he ʼu maka ke natou taumakaʼi ia ia, kaʼe neʼe nono ia Sesu pea neʼe mavae mai te fale lotu.
Nota ’i te lalo pasina
^ ʼI te Fakakeleka, “ki te kakano.”