Ko Taku Fakaovi Ki Te ʼAtua Neʼe Lelei Kia Au
ʼI TOKU taʼu hiva, neʼe gata taku tupu. Ia ʼaho nei ʼi toku taʼu 43, ʼe au meta tahi pe. ʼI te iloʼi e ʼaku matuʼā kua gata taku tupu, neʼe nā fakalotomalohiʼi au ke au gaue kinakina ke mole au manatuʼi tuʼumaʼu toku leka. Neʼe au fakatuʼu ʼi tomatou muʼa ʼapi he laupapa ʼe fakatau ai te ʼu fuaʼi ʼakau pea neʼe maʼa tuʼumaʼu. Koia neʼe hahaʼi natou neʼe ʼomai ʼo faifakatau ai.
Logo la neʼe au gaue kinakina kaʼe neʼe mole fetogi toku ʼuhiga leka. Pea neʼe faigataʼa kia au ʼihi aluʼaga ʼo te maʼuli, ohage la ko te maʼoluga ʼo te ʼu kesi ʼo te ʼu koloa. ʼE hage pe neʼe faʼu ia meʼa fuli maʼa te hahaʼi ʼae ʼe lalahi. Neʼe au lotomamahi ai, kaʼe neʼe hoko leva te aluʼaga ʼi toku taʼu 14.
ʼI te tahi ʼaho, ko te ʼu tuagaʼane Fakamoʼoni ʼa Sehova ʼe toko lua neʼe ʼomai ʼo totogi ʼanā fuaʼi ʼakau, pea neʼe nā fehuʼi mai pe ʼe au fia ako te Tohi-Tapu. Mole tuai pea neʼe au mahino ai ʼe maʼuhiga age taku iloʼi ia Sehova mo ʼana fakatuʼutuʼu ʼi toku ʼuhiga leka. Neʼe tokoni lahi mai te faʼahi ʼaia. Pea neʼe au leleiʼia tafitō te vaega Tohi-Tapu ʼo Pesalemo 73:28. ʼE ui fenei ʼi te ʼuluaki koga: “Ko taku fakaovi ki te Atua, koena toku koloa.”
Kaʼe fokifa pe neʼe mavae toku famili mai Côte d’Ivoire ki Burkina Faso, ʼo fetogi ai toku maʼuli. ʼI te kolo ʼae neʼe matou ʼomai mai ai, neʼe kua mahani te hahaʼi ʼi tanatou sisio kia au mo taku laupapa ʼae neʼe fakatau ai te ʼu fuaʼi ʼakau. Kaʼe ʼi tomatou kolo foʼou, ki te tokolahi neʼe au matapule pea mo matafaikehe. Neʼe sioʼi au e te hahaʼi, koia neʼe au nofo fale ai lolotoga ni vahaʼa. Pea neʼe au manatuʼi ai te lelei ʼo taku fakaovi kia Sehova. Neʼe au faitohi ki te filiale ʼo te kau Fakamoʼoni ʼa Sehova, pea neʼe natou fekauʼi mai te tuagaʼane misionea ko Nani. Neʼe haʼu ʼo ʼaʼahi au ʼi tana motopai.
ʼI tomatou kolo, neʼe momole tuʼumaʼu te ʼu ala, pea neʼe pela ʼi te ʼu temi ʼua. Neʼe to tuʼa lahi ia Nani mai tana motopai ʼi tana haʼu ʼo fai taku ako, kaʼe neʼe mole he temi neʼe ina siʼaki ai taku ako. ʼI te tahi ʼaho leva, neʼe ina ui mai ʼe haʼu anai ʼo ʼave au ki te ʼu fono. Neʼe au mahino ai neʼe tonu ke au hu ki tuʼa pea mo au katakiʼi toku sioʼi e te hahaʼi. Pea tahi, ko taku heka ʼi te motopai neʼe ʼaʼasili mamafa ai pea toe faigataʼa tona taki. Kaʼe neʼe au tali, ʼo au manatuʼi ia te lua koga ʼaeni ʼo te vaega Tohi-Tapu ʼae neʼe
au leleiʼia tafitō: “E au fakatuu toku nonoaga i te Aliki, te Eteleno [“te Tuʼi ʼAliki ko Sehova,” MN].”ʼI ʼihi temi, ʼe ma tautau fetoki mo Nani ki te pela, kaʼe neʼe ko he meʼa noa ia kia maua he neʼe ma leleiʼia te ʼu fono. Pea ʼe mole he fakatatau ʼo te ʼu malimali neʼe au sio ki ai ʼi te Fale Fono mo te sisio ʼa te hahaʼi ʼae ʼi tuʼa. Hili ki ai mahina ʼe hiva pea neʼe au papitema.
Koʼeni te tolu koga ʼo te vaega Tohi-Tapu ʼae neʼe au leleiʼia tafitō: “Ke fakamatala au gaueaga fuli.” Neʼe au toe mahino, ʼe faigataʼa anai taku alu ʼo faifakamafola. Pea ʼe kei au manatuʼi pe taku ʼuluaki faifakamafola ʼi te ʼu ʼapi. Ko te tamaliki mo te hahaʼi lalahi, neʼe natou sioʼi mo muliʼi au pea natou vaʼi taku faʼahiga haʼele. Neʼe au lotomamahi ai, kaʼe ʼi taku manatu age ʼae ʼe toe ʼaoga kia natou te Palatiso ohage pe ko au, neʼe au lavaʼi tona katakiʼi.
Ke faigafua taku feʼaluʼaki, neʼe au maʼu taku lelue makehe koteʼuhi ʼe teka tolu pea neʼe au mio ʼaki ʼoku nima. Ko toku kaugā fagona ʼae neʼe ina toho au ʼi te ʼu mahake pea heka mai leva ki te lelue ʼi te ʼu mahifo. Logo la neʼe faigataʼa taku faifakamafola ʼi te kamata, kaʼe neʼe au fiafia ʼaupito, ʼo au liliu ai ʼo pionie katoa ʼi te taʼu 1998.
Neʼe lahi ʼaku ako Tohi-Tapu, pea neʼe ko te toko fa ʼo natou neʼe papitema. Pea tahi, neʼe tali e toku kiʼi tehina te moʼoni. Pea ko taku logo ʼae ki te tuputupu ʼa ʼihi ʼi te moʼoni, neʼe fakalotomalohiʼi ai au ʼi te temi neʼe ʼaoga ai. Ohage la, ko te ʼaho neʼe au maʼu ai taku tohi mai Côte d’Ivoire, kaʼe neʼe au lolotoga kau ʼi te mahaki ʼae ko te malaria. Ko he tahi, neʼe au kamata tana ako Tohi-Tapu ʼi te muʼa matapa, pea neʼe ako ʼi te univelesite ʼi Burkina Faso. Kaʼe neʼe au tuku ki he tehina ke ina hoko atu tana ako. Ki muli age, neʼe alu leva ia ki Côte d’Ivoire. Pea ʼi ʼoku fiafia leva ʼi taku logo ʼae kua liliu ko he kaugā fagona.
Neʼe feafeaʼi taku taupau toku maʼuli? Ko te kautahi neʼe tokoni ki te hahaʼi maʼimoa, pea neʼe akoʼi au ki te faitui. Neʼe tokagaʼi e taku tagata faiako ʼaku gaue mahani ʼo ina ui, “ ʼE tonu ke matou akoʼi atu ia te fai ʼo te topa.” Pea neʼe natou fakahoko te faʼahi ʼaia. Kua au fai nei ʼi fale te ʼu foʼi topa ʼe fakaʼaogaʼi ki te ʼu gaue ʼo te loto fale mo te ʼu foʼi topa fo. Neʼe leleiʼia e te hahaʼi ia te topa ʼae neʼe au fai, ʼo natou logologo ai ki ʼihi. Pea neʼe au alu ʼi taku motopai ʼe teka tolu ʼo fakatau ʼaku topa.
Kaʼe ʼi te taʼu 2004, neʼe au tuku taku pionie katoa koteʼuhi neʼe laga toku mamahi tuʼa. Kaʼe ʼe kei au faifakamafola tuʼumaʼu pe.
ʼE au iloa ki te hahaʼi ʼi taku malimali. Pea ʼe au fiafia ʼaupito, koteʼuhi ko taku fakaovi ki te ʼAtua ʼe ko toku koloa ʼaia.—Neʼe fakamatala e Sarah Maiga.