ʼE Mole Hao He Tahi Mai Te Mate
ʼE KE lolotoga sioʼi te foʼi ʼata ʼe fakamatala ai te maʼuli ʼo he fafine hiva ʼe ke leleiʼia. ʼE ha ai ʼona pāki ʼi tana kei veliveli, ʼe ina ako te lomi piano. Pea ʼe ke sio leva kua iloa pea ʼe foli ʼi te ʼu fenua ʼo faimaholo ai. Kae ʼasi mai leva ʼi te ʼu pāki kua finematuʼa pea ʼi te fakaʼosi ʼo te foʼi ʼata ʼe mate leva te fafine.
Neʼe ko te ʼata tauhi ʼofa ʼo te fafine hiva. ʼE tatau pe tona maʼuli mo ʼae ʼo he tahi age kilisitiano ohage ko he tagata faigaoʼi peʼe ko he tagata faisienesia. Neʼe lahi te ʼu meʼa lelei ʼae neʼe fai e te fafine hiva lolotoga tona maʼuli kae neʼe motuhi vave ʼuhi ko te vaivai matuʼa pea mate ai leva.
ʼE fakaʼofaʼofa he ʼe toe feia anai mo tatou. (Ekelesiasi 9:5) ʼE mole toe hao he tahi mai te matuʼa mo te mate pea ʼe feala ke tou pupuli vave ʼi he tuʼutamaki peʼe ko he mahaki kovi. Koia ʼae ʼe ui ai ʼi te Tohi-Tapu ʼe tou hage ko te hahau ʼae “ ʼe ha ʼi he kiʼi temi pea puli leva ia.”—Sakopo 4:14.
ʼE iloʼi e ʼihi ʼe haʼu fakapunamaʼuli ia te mate, koia ʼae ʼe natou manatu fenei ai: Ke “tou kakai pea mo iinu, he ʼe tou mamate anai apogipogi.” (1 Kolonito 15:32) Kae ʼe mole ha ai koa la ʼe mole hanatou ʼamanakiʼaga ki te ka haʼu? Koia, ʼe feala mo koe ke ke fai te fehuʼi ʼaeni, tafito ʼi te ʼu temi ʼae ka ke fihifihia ai: ‘Ko siʼi gataʼaga pe koa ʼaeni ʼo siʼoku maʼuli?’ ʼE ke maʼu anai ʼifea he tali ki ai?
ʼE falala te tokolahi ki te sienesia koteʼuhi neʼe kua maʼu e te kau poto mo te ʼu toketa te ʼu faitoʼo ke fuafualoa ai te maʼuli. Pea ʼe kei hoko atu pe tanatou faifekumi. Kae logo pe la ʼanatou faiga, ʼe heʼeki katoa tatatou mahino: He koʼe koa ʼe tou matutuʼa pea mo mamate? ʼE feala koa ke puli ia te mate? ʼE maʼu te ʼu fakamahino ʼi te ʼu alatike ʼae ka hoa mai. ʼE ke toe maʼu anai mo te tali ki te fehuʼi ʼaeni, Ko siʼi gataʼaga pe koa ʼaeni ʼo te maʼuli?