ʼE Tokaga Mai Koa Ia Te ʼAtua Kia Koe?
TE AKO MAI TE FAKATUPU
Ka fanauʼi he kiʼi toe, ko te ʼuluaki hola ʼo tona maʼuli ʼe maʼuhiga ʼaupito. Kotea tona tupuʼaga? Koteʼuhi, kapau ʼe pipiki atu aipe te faʼe ki tana kiʼi tamasiʼi ʼi te moʼi temi pe ʼaia, pea ʼe fua lelei anai ki ʼamuli ki te tuputupu ʼa te kiʼi toe. *
Kotea ʼae ʼe fia tokaga ai he faʼe ki tana kiʼi toe ʼae ʼe kei meamea? ʼE ui e te fafine faiako ko Jeannette Crenshaw, ʼe ko te lahi ʼo te ocytocine ʼae ʼe ina “fakamalohiʼi te ʼofa ʼa te faʼe moka ina fāfā mo sioʼi tana kiʼi toe, pea moka ʼe ina fafaga.” Pea ʼe fakamahino ʼi te sulunale, ʼe ʼi ai mo te tahi hormone ʼe “tokoni ki te faʼe ke ina foaki ia meʼa fuli ʼe ʼaoga ki tana kiʼi toe” pea mo fakamalohiʼi ʼanā felogoi. He koʼe ʼe maʼuhiga te faʼahi ʼaeni?
ʼE ko Sehova ʼAtua, te Tupuʼaga manavaʼofa, te haʼuʼaga ʼo te ʼofa ʼae ʼe femaʼuʼaki e te faʼe mo tana kiʼi toe. * Neʼe fakavikiviki ia te Hau ko Tavite ki te ʼAtua ʼi tana toʼo mai ia ia mai ‘te fatu ʼo tana faʼe’ pea mo te lotofimalie ʼae neʼe ina logoʼi ia tafa ʼo tana faʼe. Neʼe faikole fenei ai: “Talu mai te fatu o taku fae, nee ke taupau au. Mai te fatu o taku fae, nee ke liliu ko toku Atua.”—Pesalemo 22:10, 11.
FAKAKAUKAUʼI AGE MUʼA: Kapau neʼe fakatupu e te ʼAtua te faʼe ke tokaga mo ina foaki ia meʼa fuli ʼe ʼaoga ki tana kiʼi toe pea ʼe mahino ia, ʼe tokaga moʼoni ia te ʼAtua kia tatou takitokotahi ʼae ko ʼana “fanau.”—Gaue 17:29.
TE LOTOTOKAGA ʼA TE ʼATUA ʼI TE TOHI-TAPU
Neʼe iloʼi lelei e Sesu Kilisito te agaaga ʼo te Tupuʼaga. Neʼe ina ui fenei: “ ʼE mole fakatau koa la he ʼu misi ʼe lua ki he foʼi piesi ʼe mole faʼa maʼuhiga? Kaʼe ʼe iloʼi e takotou Tamai moka to he misi ki te kele. Kaʼe ʼo ʼuhiga mo koutou, kua lau fuli ʼokotou fuluʼi ʼulu. Koia, ʼaua naʼa kotou matataku, ʼe kotou maʼuhiga age ʼi he faga misi.”—Mateo 10:29-31.
ʼE mole tou fakamaʼuhigaʼi te ʼu kiʼi manulele liliki fuli ʼe tou sisio ki ai. Pea ʼe mole tou tokagaʼi pe la moka to ifo ki lalo he kiʼi manu. Kae ʼe sio tatatou Tamai ʼae ʼe ʼi selo ki te ʼu manulele takitokotahi. ʼE maʼuhiga age kia ia he tagata ʼe tahi ʼi he faga misi. Koia, kotea he ako ʼe ke taʼofi mai ai? Ke ʼaua naʼa ke tuʼania, koteʼuhi ʼe tokaga moʼoni ia te ʼAtua kia koe.
ʼE tokaga mo ʼofa mai ia te ʼAtua
ʼE fakalotomalohiʼi tatou ʼi te Tohi-Tapu
-
“Ko te ʼu mata ʼo Sehova ʼe ʼi te potu fuli pe, ʼo sio ki te kau agakovi mo te kau agalelei.”—TAAGA LEA 15:3, MN.
-
“ ʼE sio te ʼu mata ʼo Sehova ki te kau agatonu, pea ʼe logo ʼona taliga ki ʼanatou tagi.”—PESALEMO 34:15, MN.
-
“ ʼE au fiafia anai ʼi tau ʼofa makehe, he neʼe ke sio ki toku mamahi; ʼe ke iloʼi te lahi ʼo toku lotomamahi.”—PESALEMO 31:7, MN.
“NEʼE AU MANATU ʼE MOLE ʼOFA IA SEHOVA IA AU”
ʼE maʼuhiga koa hatatou iloʼi ʼe tokaga mo ʼofa mai ia te ʼAtua? ʼEi, pea ʼe ui fenei e Hannah, * mai Pilitania:
“Neʼe au logoʼi ʼi te temi fuli pe ʼe mole ʼofa ia Sehova ia au. Pea neʼe au hage ia ʼe mole ina tali ʼaku faikole. ʼI taku manatu ʼe feia la he ʼe mole malohi taku tui. Neʼe hage kia au ko hoku fakatuʼā mai te ʼAtua. Neʼe mole tokaga mai ia he ʼe mole au maʼuhiga.”
Kae, kua fetogi leva ia te manatu ʼa Hannah. Kotea ʼae neʼe tokoni kia ia? ʼE ina fakamatala fenei: “Neʼe ʼaoga mai he temi loaloaga. Neʼe au manatuʼi te akonaki kua fualoa, ʼo ʼuhiga mo te sakilifisio faitotogi ʼa Sesu, pea neʼe malave ʼaupito kia au. Neʼe au toe falala ai ʼe ʼofa pe ia Sehova ia au. Pea neʼe au tokagaʼi neʼe ina tali ʼaku faikole. Neʼe au tagi mamahi ai he neʼe kua au mahino leva ʼe ʼofa ia Sehova ia au. Neʼe tokoni mai te ako ʼo te Tohi-Tapu mo taku kau ki te ʼu fono ke au mahino lelei age ki te ʼuhiga moʼoni ʼo Sehova. Kua au sio leva, ʼi te temi nei, ki te tokaga ʼofa ʼa Sehova ʼae kia tatou fuli, pea ki te takitokotahi.”
ʼE fakalotomalohi te ʼu palalau ʼaeni ʼa Hannah. Kae, ʼe feafeaʼi hau iloʼi papau ʼe mahino ia te ʼAtua kia koe, pea ʼe ina manatuʼi ia koe? ʼE tali te alatike ʼae ka hoa mai ki te fehuʼi ʼaia.
^ pal. 3 Ka maʼu e te faʼe te mahaki ʼae ko te dépression postnatale (ʼe lotovaivai ʼi te ʼosi faifanau), ʼe faigataʼa ai hana pipiki ki tana kiʼi toe. Kae ʼe mole ko hana hala. ʼE tala fenei e te fale fekumi ʼo te ʼu faitoʼo ʼo te ʼu mahaki ʼo te ulu ʼi Amelika ʼo ʼuhiga mo te mahaki ʼaia: “ ʼE tupu mai te ʼu meʼa ʼae ʼe hoko ʼi te loto sino mo te ʼatamai. ʼE mole ko he gaue kovi ʼa te faʼe pe ko he meʼa neʼe mole ina fai.” Kapau ʼe ke fia maʼu he tahi age ʼu fakamahino, vakaʼi te alatike “Comprendre la dépression postnatale” ʼi te Réveillez-vous ! ʼaho 8 ʼo Sunio 2003.
^ pal. 5 ʼI te Tohi-Tapu, ko Sehova ʼe ko te huafa ʼaia ʼo te ʼAtua.—Pesalemo 83:18, MN.
^ pal. 15 ʼI te ʼu alatike ʼaeni, neʼe fetogi ʼihi higoa.