Natoo ba an mga Saksi ni Jehova ha Daan nga Tugon?
Oo. Natoo an mga Saksi ni Jehova nga an bug-os nga Biblia “giniyahan han Dios ngan mapulsanon.” (2 Timoteo 3:16) Upod hito an Daan nga Tugon ngan an Bag-o nga Tugon, sugad han tawag hito han kadam-an. Gintatawag han mga Saksi ni Jehova ini nga mga bahin han Biblia sugad nga an Hebreo nga Kasuratan ngan an Kristiano Griego nga Kasuratan. Hito nga paagi, ginlilikyan namon an paghatag hin impresyon nga an iba nga bahin han Biblia, daan na o diri na aplikado yana.
Kay ano nga kinahanglan han mga Kristiano an Daan nga Tugon ngan an Bag-o nga Tugon?
Ilarom ha paggiya han Dios, an Kristiano nga apostol nga hi Pablo nagsurat: “An ngatanan nga iginsurat hadto iginsurat ha pagtutdo ha aton.” (Roma 15:4) Salit, may importante nga impormasyon nga makukuha naton ha Hebreo nga Kasuratan. Pananglitan, may-ada ito makakabulig nga mga rekord ngan praktikal nga mga sagdon.
Makakabulig nga mga rekord. An Hebreo nga Kasuratan may-ada detalyado nga rekord han paglarang ngan kon paonan-o nakasala an katawohan. Kon waray ito nga mga impormasyon, diri naton mahibabaroan an makapatagbaw nga mga baton ha mga pakiana sugad han: Diin kita nagtikang? Kay ano nga namamatay an mga tawo? (Genesis 2:7, 17) Dugang pa, an Hebreo nga Kasuratan may mga rekord han pakig-upod ni Jehova nga Dios ha mga tawo nga nakaeksperyensya hin kalipay ngan mga problema nga pariho ha aton.—Santiago 5:17.
Praktikal nga mga sagdon. An mga libro han Biblia nga Proberbios ngan Eclesiastes nga bahin han Hebreo nga Kasuratan, may-ada diri nadadaan nga kinaadman para ha pagkinabuhi. Naghahatag ito hin sagdon kon paonan-o magkakaada malipayon nga kinabuhi sugad nga pamilya (Proberbios 15:17), kon paonan-o magkakaada balanse nga panhunahuna ha trabaho (Proberbios 10:4; Eclesiastes 4:6), ngan kon paonan-o magigin tinuod nga malipayon an mga batan-on (Eclesiastes 11:9–12:1).
Labot pa hito, makakapahimulos kita ha pag-aram han Mosaiko nga Balaud nga nakarekord ha Torah (an siyahan nga lima nga libro han Biblia). Bisan kon an mga Kristiano diri na ilarom hito nga Balaud, may-ada la gihapon ito importante nga mga prinsipyo nga makakabulig ha aton nga magkaada malipayon nga kinabuhi.—Levitico 19:18; Deuteronomio 6:5-7.
Bangin Maruyagan Mo Liwat
ESSENTIAL BIBLE TEACHINGS
Hin-o an Awtor han Biblia?
Kon an mga tawo an nagsurat hito, angayan ba nga tawagon ito nga “pulong han Dios”? Kan kanay panhunahuna an aada ha Biblia?
MAHITUNGOD HA AMON
Paghangyo nga May Bumisita ha Imo
Hisgotan an usa nga pakiana ha Biblia, o mahibaro hin dugang mahitungod ha mga Saksi ni Jehova.
KOMON NGA MGA PAKIANA
May Kalugaringon ba nga Biblia an mga Saksi ni Jehova?
An paggamit hin iba-iba nga hubad makakabulig ha imo pag-aram han Biblia. Tulo nga punto nga an Bag-o nga Kalibotan nga Hubad han Baraan nga Kasuratan angay gamiton ha imo pag-aram han Biblia.