An mga Saksi ni Jehova nakakakarawat yana hin mas damu nga espirituwal nga pagkaon ha elektroniko nga pormat kay ha kakan-o pa man. Pero ha damu nga bahin han tuna, an aton kabugtoan diri nakakaakses ha Internet tungod kay mahal ito. An iba naman naukoy ha mga lugar nga wara-wara an Internet, mahinay, o waray gud Internet.

 Bisan pa hito, damu han aton kabugtoan an makakag-download na yana hin elektroniko nga mga publikasyon bisan waray Internet! Paonan-o ini nagin posible?

 An JW Box usa nga gutiay nga kahon nga iginhahatag ha mga kongregasyon nga makuri makaakses ha Internet. May-ada ito router nga ginpalit ha usa nga kompanya, software nga ginhimo han Computer Department ha Bethel, ngan elektroniko nga mga publikasyon ngan video nga makikita ha jw.org. An tagsa nga JW Box nagkakantidad hin mga $75 U.S.

 Ha Kingdom Hall, ikukonektar han kabugtoan an ira mga gadyet ha Wi-Fi han JW Box ngan makakag-download na hira hin mga publikasyon ngan video. Bisan adton daan na o baratuhon la an gadyet makakakonektar na. Pero kon an kongregasyon waray akses ha Internet, paonan-o maa-update an JW Box? An branch regular nga nagpapadara hin mga USB nga nakantidad hin mga $4 U.S. an kada usa. Ngan may sulod ito nga bag-o nga elektroniko nga mga publikasyon ngan video tikang ha jw.org nga puydi ma-download ha JW Box.

 Paonan-o nakabulig an JW Box ha aton kabugtoan? Hi Nathan Adruandra, usa nga tatay nga naukoy ha Democratic Republic of Congo, nagsiring: “Damu ka beses ako nagtesting pag-download han mga drama nga ‘O Jehova, ha Imo Nasarig Ako’ ngan Hinumdumi an Asawa ni Lot. Pero waray gud ako maglampos ngan nakapaluya ito ha akon. Yana, mada-download ko na ini nga mga video ha akon gadyet ngan makakabulig ini ha amon sugad nga mga kag-anak nga matutdoan hin mas maopay an amon mga anak.”

 Usa nga brother nga nabulig ha mga kongregasyon ha Nigeria ha pag-set-up han JW Box an nagsiring: “Para ha kabugtoan, espesyal nga regalo tikang kan Jehova an JW Box. Nalilipay gud hira kay masayon na la nira nga mada-download an mga publikasyon ngan video tikang ha Toolbox ha Pagpanutdo.”

 Sobra 1,700 nga JW Box an iginpadara ha aton kabugtoan ha Africa, Oceania, ngan South America, ngan ginpaplano pa nga magpadara ha mas damu nga kongregasyon. Diin tikang an kwarta nga gin-gagamit para hini? Ginkuha ito ha mga donasyon para ha bug-os-kalibotan nga buruhaton, ngan an kadam-an hito igindonar gamit an donate.isa4310.com. Salamat han iyo kinasingkasing nga bulig.