Han Marso 2020, han igindeklara han World Health Organization an COVID-19 sugad nga pandemya, damu an waray maghunahuna nga makakaapekto la gihapon ini nga virus ha bug-os nga kalibotan paglabay hin sobra usa ka tuig. Minilyon nga mga tawo, upod na an pipira nga Saksi ni Jehova, an nag-antos han mga epekto han pandemya ha pisikal, emosyonal, ngan pinansyal. Paonan-o an mga Saksi ni Jehova nag-organisar ngan nanhatag hin relief ha panahon han pandemya?

 Ha paggiya han Coordinators’ Committee han Nagmamando nga Lawas han mga Saksi ni Jehova, nagkaada sobra 950 nga Disaster Relief Committee (DRC) ha bug-os nga kalibotan para ha COVID-19. Ha pipira nga kahimtang, ginhikay nira nga an lokal nga kabugtoan an maghahatag hin bulig, ngan ha iba naman nga kahimtang, an mga Saksi nakapahimulos han ayuda tikang ha gobyerno. Gin-organisar liwat han mga DRC nga manhatag hin mga relief ha damu nga lugar.

 Pananglitan, ini an kahimtang ha Paraguay. Usa nga dyaryo an nagreport nga tungod han epekto han pandemya ha ekonomiya, “damu nga mga taga-Paraguay an nagutom.” Pero an DRC ha Paraguay nagtikang na panhatag hin mga relief nga igo para ha duha ka semana—pagkaon ngan gamit nga panlimpyo ha balay ngan ha lawas para ha pamilya nga may upat nga membro. An tagsa nga relief nagkakantidad hin mga $30 (U.S.).

 Paonan-o ginpuprotektaran han mga nanhahatag han relief an ira kalugaringon ngan an iba para diri matapnan han COVID-19? Nagsusul-ot hira hin mask ngan nasunod ha physical distancing. Ginsisiguro liwat nira nga an mga kompanya nga nagsusuplay han pagkaon nag-aandam hito ha limpyo nga mga lugar ngan istrikto nga nasunod ha mga safety protocol. Upod na hini an pagsiguro nga an ngatanan nga nanginginano han mga relief magsul-ot hin personal protective equipment, maglimpyo ngan mag-disinfect han ira mga sarakyan, ngan ibutang an mga relief ha mga lugar nga na-disinfect na. Ngan ginsisiguro liwat han naghahatag han mga relief nga may-ada hira physical distancing ha mga kabugtoan nga nakarawat hito.

 Tubtob han Enero 2021, sobra 25 ka milyon dolyar (U.S.) an naaprobaran na han Coordinators’ Committee nga gamiton ha relief para ha COVID-19. Gin-gamit hin maopay han mga branch ngan DRC an mga donasyon ngan nangalimbasog nga makakuha han pinakamaopay nga presyo para han ginkikinahanglan nga mga suplay. Pananglitan, ha Chile, an mga kabugtoan nga nanginginano ha panhatag hin relief karuyag pumalit hin 750 ka kilo nga lentihas. Pero nagin doble an presyo han lentihas ha sulod la hin usa ka bulan! Duha ka oras katapos nira umuyon nga pumalit han lentihas ha mas hitaas nga presyo, nagsiring an parabaligya nga may nag-uli ha ira hin order nga lentihas. Salit imbes nga pabaydan ha ira ginsabotan nga presyo, iginbaligya ha aton kabugtoan an igin-uli nga mga lentihas ha presyo han naglabay nga bulan!

 Pero han kukuhaon na han aton mga kabugtoan an lentihas, an parabaligya nadiri na pagtuman han sabot kay gin-aakusaran hira nga diri patas an panhatag hin pagkaon sugad han ginbubuhat han iba nga organisasyon. Katapos mag-ampo hin halipot, an usa han aton kabugtoan nagsumat ha parabaligya nga an tagsa nga kongregasyon tapos na masurbey basi mahibaroan kon hin-o gud an nanginginahanglan. Iginsaysay liwat han kabugtoan nga tungod kay iba-iba an kultura han makarawat hito, an tagsa nga relief ipapahiuyon ha ginkikinahanglan han pamilya nga makarawat hito. Ha urhi, ginpasarig nira an parabaligya nga an ngatanan nga donasyon nga kwarta ngan pagbulig para ha mga Saksi ni Jehova boluntaryo nga iginhatag. Naimpres hiya hito. An parabaligya waray la umuyon ha mas ubos nga presyo kondi naghatag liwat hin donasyon nga 400 ka kilo nga lentihas para ha sunod nga order han kabugtoan.

 Hi Lusu nga lagas nga balo ha Liberia, naukoy upod an lima nga membro han pamilya. Han aga, samtang namamahaw hira ngan ginhihisgotan an inadlaw nga teksto, napansin han syete anyos nga apo ni Lusu nga waray na hira pagkaon. Nagpakiana hiya, “Ano an aton kakaunon?” Ginpasarig hiya ni Lusu nga nag-ampo na hiya para han bulig ngan nasarig hiya nga magtatagana hi Jehova para ha ira. Hito mismo nga kulop, nakakarawat hi Lusu hin tawag tikang ha mga tigurang han kongregasyon ngan may ginpapakuha ha iya nga pipira nga relief nga pagkaon. Hiya nagsaysay: “Siring han akon apo nga yana maaram na hiya nga ginpapamatian ngan ginbabaton ni Jehova an mga pag-ampo kay ginbaton ni Jehova an akon pag-ampo.”

 Usa nga babaye ha Democratic Republic of Congo an amyaw han usa nga Saksi nga pamilya. Katapos niya makita an pamilya nga nakarawat hin pagkaon tikang ha ira mga igkasi-tumuroo, hiya nagsiring, “Katapos han pandemya, magigin mga Saksi ni Jehova kita kay ira gin-aataman an ira mga kabugtoan hini nga makuri nga panahon.” Ginpakianhan hiya han iya bana, “Magigin usa ka ba han mga Saksi ni Jehova tungod la han usa ka sako nga bugas?” Hiya binaton, “Syempre diri, pero ito nga usa ka sako nga bugas proyba han tinuod nga gugma.”

 An mga Saksi ni Jehova nakagtagana dayon han mga panginahanglan han aton mga kabugtoan hini nga panahon han pandemya tungod han iyo mga donasyon. Salamat han iyo mga donasyon nga iginhahatag gamit an iba-iba nga pamaagi ha donate.isa4310.com.