Sugad han iginpapakita ha kasamok ha Ukraine, damu nga lider han Kristiano nga mga relihiyon an nag-aaghat ha mga tawo nga makigbahin ha girra. Pansina kon paonan-o ginsusuportaran han mga klero an magkakontra nga nasud:

•   “Proud gud kami ngan mapasalamaton ha ngatanan nga nagdidepensa ha Ukraine tikang ha mga kaaway . . . Aadi kamo ha amon mga kasingkasing, ngan pirme namon kamo ig-aampo ngan susuportaran.”—Metropolitan Epiphanius I han Kyiv, sumala ha report han The Jerusalem Post, Marso 16, 2022.

•   “An lider han Russian Orthodox Church nagmisa para ha mga sundalo han Russia han Domingo. Hito nga misa, iya gin-aghat hira nga depensahan an ira nasud samtang an Moscow nagpapadayon ha ira pag-atake ha Ukraine.”—Reuters, Abril 3, 2022.

 Angay ba makigbahin ha girra an mga Kristiano? Ano an ginsisiring han Biblia?

 Iginpapakita han Biblia nga an tinuod nga mga sumurunod ni Jesu-Kristo diri nakikigbahin ha girra.

•   “Itakob an imo espada, kay an ngatanan nga nagamit han espada mamamatay pinaagi han espada.”—Mateo 26:52.

   An tawo ba nga nasuporta ha girra o nakikigbahin ha girra nasugot hito nga mga pulong ni Jesus?

•   “Naghahatag ako ha iyo hin bag-o nga sugo, nga higugmaon niyo an usa kag usa; sugad la han paghigugma ko ha iyo, higugmaa liwat niyo an usa kag usa. Pinaagi hini an ngatanan mahibabaro nga mga disipulo ko kamo—kon nahigugma kamo ha usa kag usa.”—Juan 13:34, 35.

   Iginpapakita ba han tawo nga nasuporta ha girra an klase han gugma nga ginsiring ni Jesus nga pangirilal-an han iya mga disipulo, o mga sumurunod?

 Para ha dugang nga impormasyon, basaha an artikulo nga “Dapat Bang Sumali sa Digmaan ang mga Kristiyano?”

 Makatadunganon ba ha mga Kristiano nga diri makigbahin ha mga girra yana? Oo. Igintagna han Biblia nga ha aton panahon, an panahon nga gintatawag nga “kataposan nga mga adlaw,” may mga tawo tikang ha ngatanan nga nasud nga “diri na . . . mag-aaram hin pakiggirra,” uyon ha mga katutdoan ni Jesus.—Isaias 2:2, 4, footnote.

•   Basi mahibaro hin dugang pa, basaha an serye han mga artikulo han Ang Bantayan nga may ulohan “Ano ang Tingin ng Diyos sa mga Digmaan?”

 Diri na maiha, gagamiton ni Jehova, a “an Dios han kamurayawan,” an iya langitnon nga gobyerno basi talwason an katawohan “tikang ha panalumpigos ngan kamadarahog.”—Filipos 4:9; Salmo 72:14.

•   Basi mahibaroan kon paonan-o niya ito hihimoon, kitaa an video nga Ano an Ginhadian han Dios?