Pirme nababatian ha mga balita an parte ha mga tawo nga nagyayakan hin nakakasakit nga mga pulong o nagbubuhat hin kamadarahog tungod han diskriminasyon, mga tawo nga nag-aaraway tungod kay magkaiba an ira lahi, ngan an mga girra.

•   “Tungod han girra ha Israel ngan Gaza ngan han mga tawo nga naruruyag han kamadarahog ngan kangalas, mas grabe na gud yana an masakit nga mga panyakan ha mga social media.”—The New York Times, Nobyembre 15, 2023.

•   “Tikang han Oktubre 7, nakita ha bug-os nga kalibotan nga tigda nga nagtikadamu an nakakasakit nga panyakan ngan madarahog nga mga buhat tungod han kangalas.”—Dennis Francis, presidente han United Nations General Assembly, Nobyembre 3, 2023.

 An nakakasakit nga panyakan tungod han kangalas, kamadarahog, ngan girra diri kay bag-o la. Ngani, an Biblia nasiring nga may mga tawo ha naglabay nga “[nagpupuntirya han] ira nakakasakit nga mga pulong pariho hin mga pana” ngan nakikiggirra ngan nagbubuhat hin kamadarahog. (Salmo 64:3; 120:7; 140:1) Kondi iginsasaysay han Biblia nga an kangalas nga aton nakikita yana may importante nga kahulogan.

 Iginpapakita han Biblia an duha nga rason kon kay ano nga komon yana an kangalas.

1.  1. An Biblia nagtagna hin usa nga peryodo han panahon diin “magtutugnaw an gugma han kadam-an.” (Mateo 24:12) Imbes nga magpakita hin gugma, an kadam-an magpapakita hin mga batasan nga magriresulta nga mangalas an mga tawo ha usa kag usa.—2 Timoteo 3:1-5.

2.  2. An duro nga kangalas ha kalibotan yana resulta han maraot gud nga impluwensya ni Satanas nga Yawa. An Biblia nasiring nga “an bug-os nga kalibotan aada ha gahum han usa nga maraot.”—1 Juan 5:19; Pahayag 12:9, 12.

 Pero iginpapakita liwat han Biblia nga ha diri na maiha wawad-on han Dios an mga hinungdan han kangalas. Dugang pa, iya wawad-on an ngatanan nga pag-antos nga resulta han kangalas. An Biblia nagsasaad:

•   “Papahiron [han Dios] an ngatanan nga luha ha ira mga mata, ngan mawawara na an kamatayon, pati an kabidoan, pagtangis, ngan kasakit. An daan nga mga butang naglabay na.”—Pahayag 21:4.