Hi Jehova an gintitikangan han kinabuhi. (Salmo 36:9) Salit, diri ba makatadunganon la nga tumoo nga mahimo gud banhawon ni Jehova an mga patay? An Biblia nagpapasarig ha aton nga ito gud an iya hihimoon ha tidaraon. (Basaha an Buhat 24:15) Pero kay ano nga bubuhaton niya ito?

Katuyoan han aton Maglalarang nga an tawo mabuhi ha tuna ha waray kataposan. (Genesis 1:31; 2:15-17) Ngan ini la gihapon an iya karuyag para ha katawohan. Nasasakitan hiya nga makita an aton mga gin-aatubang yana—kinabuhi nga halipot ngan puno hin kasakitan.—Basaha an Job 14:1, 14, 15.

Ginlarang ba han Dios an tawo basi umukoy ha langit? Diri. An mga anghel an ginlarang han Dios basi umukoy didto. Ginlarang niya an tawo para ha tuna. (Genesis 1:28; Job 38:4, 7) Uyon hini, tagda an mga pagbanhaw nga ginhimo ni Jesus. Ginbanhaw niya an mga tawo dinhi mismo ha tuna. Salit, kadam-an han mga babanhawon ha tidaraon mabubuhi dinhi gihapon ha tuna.—Basaha an Juan 5:28, 29; 11:44.

Pero nagpili an Dios hin mga tawo nga babanhawon basi magkinabuhi ha langit, diin magkakaada hira espiritu nga lawas. (Lucas 12:32; 1 Corinto 15:49, 50) An mga babanhawon ha langit magmamando ha tuna sugad nga mga hadi kaupod han Kristo.—Basaha an Pahayag 5:9, 10.