Nagkikinabuhi kita ha panahon nga damu an ginkakabarak-an, “peligroso gud nga mga panahon nga makuri pakiangayan.” (2 Timoteo 3:1) Damu an nalilisang tungod han krisis ha ekonomiya, pagburublag han pamilya, girra, epidemya han grabe nga mga sakit, ngan kalamidad nga natural o resulta han mga ginhihimo han tawo. Labot la hini, may personal pa kita nga mga kabaraka: ‘Kanseros ba ini nga bukol nga akon nakakaptan?’ ‘Ano daw la nga klase hin kalibotan an maaabtan han akon mga apo?’

Normal la an mabaraka. Natural la nga naiistres kita kon may-ada kita eksamin, presentasyon, o interbyu ha trabaho. Ngan an husto nga kahadlok nga mameligro kita nabulig ha aton nga diri madaot. Kondi an sobra o pirme nga pagkinabaraka nakakadaot. Iginpapakita han bag-o la nga sunod-sunod nga pag-aram nga ginhimo ha sobra 68,000 nga adulto nga bisan an diri sobra nga pagkinabaraka mahimo magresulta hin temprano nga kamatayon. Salit husto la nga nagpakiana hi Jesus: “Hin-o ha iyo an makakadugang hin bisan gutiay la nga kahilaba han iya kinabuhi tungod ha kabaraka?” Oo, an pagkinabaraka diri nagpapahilawig han kinabuhi. Salit nagsagdon hi Jesus: “Ayaw na kamo pagkinabaraka.” (Mateo 6:25, 27) Kondi paonan-o ito mahihimo?

Makakabulig an pag-aplikar han praktikal nga kinaadman, pagkultibar hin husto nga pagtoo ha Dios, ngan padayon nga pagkaada masasarigan nga paglaom ha tidaraon. Bisan kon diri kita yana naatubang hin magkuri nga kahimtang, bangin makaeksperyensya kita hito ha tidaraon. Salit hisgotan naton kon paonan-o ito nga mga butang nakabulig kanda Paul, Janet, ngan Alona nga maatubang an mga kabaraka.