Tagna 6. Bug-os-Kalibotan nga Pagsangyaw

“Inin maopay nga sumat han Ginhadian isasangyaw ha bug-os nga inuukyan nga tuna.”​—MATEO 24:14.

● Hi Vaiatea naukoy ha usa nga hirayo nga isla han Pasipiko nga sakop han Tuamotu Archipelago. Bisan kon an Tuamotu ginkukompwesto hin haros 80 nga isla ha kahaluag nga sobra 802,900 ka kilometro kwadrado, mga 16,000 la an naukoy dida hito. Pero hi Vaiatea ngan an iya mga amyaw nasangyawan han mga Saksi ni Jehova. Kay ano? Kay karuyag han mga Saksi nga isangyaw an maopay nga sumat han Ginhadian han Dios ha ngatanan nga tawo​—diin man hira naukoy.

ANO AN IGINPAPAKITA HAN MGA REPORT? An mensahe mahitungod han Ginhadian nakakaabot ha ngatanan nga sidsid han kalibotan. Han 2010 la, an mga Saksi ni Jehova naggamit hin sobra 1.6 ka bilyon nga oras ha pagpasamwak hinin maopay nga sumat ha 236 nga katunaan. Karuyag sidngon, an tagsa nga Saksi naggahin hin aberids nga 30 minutos kada adlaw ha pagsangyaw. Han naglabay nga dekada, nagpublikar hira ngan nanaltag hin sobra 20 ka bilyon nga literatura nga nagtututdo mahitungod ha Biblia.

ANO AN KOMON NGA PAGRIWA? Yinukot ka tuig na nga iginsasangyaw an mensahe han Biblia.

MAKATADUNGANON BA ITO NGA PAGRIWA? Tinuod, damu an nagsangyaw mahitungod han mensahe han Biblia. Pero an kadam-an ha ira nagbuhat hito hin madaliay la ngan ha pipira la nga lugar. Ha kabaliktaran, an mga Saksi ni Jehova naghihimo hin organisado ngan bug-os-kalibotan nga kampanya han pagsangyaw nga nakakaabot ha ginatos ka milyon nga tawo. An mga Saksi padayon nga nagsasangyaw bisan kon nakakaeksperyensya hin duro nga pagkontra tikang ha pipira han pinakagamhanan ngan pinakamapintas nga mga organisasyon ha kasaysayan. (Marcos 13:13) Dugang pa, waray sweldo an pagsangyaw han mga Saksi ni Jehova. Lugod, kinaburut-on nga ginagamit nira an ira panahon, ngan libre nga iginpapanaltag nira an ira mga literatura. An ira buruhaton ginsusuportaran pinaagi gud la hin boluntaryo nga mga donasyon.

ANO HA IMO PAGHUNAHUNA? Iginsasangyaw na ba ha bug-os nga kalibotan an “maopay nga sumat han Ginhadian”? An katumanan ba hini nga tagna nagpapasabot nga hirani na an mas maopay nga kinabuhi?

[Blurb]

“Samtang igintutugot pa ni Jehova, magpapadayon kita ha madasigon nga pagsangyaw han maopay nga sumat han Ginhadian, gamit an ngatanan nga paagi para maabot an mga tawo.”​—2010 YEARBOOK OF JEHOVAH’S WITNESSES.