1. Kay ano nga an usa nga piloto may ginsusunod nga listahan antes magpalupad hin eruplano?

ANTES magpalupad hin eruplano, an mga piloto may ginkikita nga listahan hin sobra 30 nga butang nga kinahanglan inspeksyunon. Kon diri nira susundon hin maopay ito nga listahan antes han kada paglarga, mas daku an posibilidad nga maaksidente hira. Maaram ka ba kon ano nga klase hin piloto an labi na nga ginpapahinumdoman nga kitaon an ngatanan nga aada ha listahan antes han kada pagbiyahe? An eksperyensyado gud nga piloto! An maiha na nga piloto masayon la magin kampante ngan diri sumunod ha ngatanan nga aada ha listahan.

2. Ano nga klase hin listahan an igin-aaghat nga gamiton han mga Kristiano?

² Pariho hin mahirot nga piloto, puydi ka gumamit hin usa nga klase hin listahan basi masiguro nga an imo pagtoo diri magluya ha panahon nga ginkikinahanglan mo gud ito. Bag-o ka man nga bawtismado o damu na ka tuig nga nag-aalagad ha Dios, importante an regular nga pag-usisa han karig-on han imo pagtoo ngan debosyon kan Jehova nga Dios. Kon diri mo ini bubuhaton, mahimo madaot an imo relasyon kan Jehova. An Biblia nagpapahamangno ha aton: “An naghuhunahuna nga natindog hiya magmatngon bangin mapukan hiya.”—1 Kor. 10:12.

3. Ano an kinahanglan buhaton han mga Kristiano ha Galasia?

³ An mga Kristiano ha Galasia kinahanglan mag-usisa han karig-on han ira pagtoo ngan mag-apresyar han ira espirituwal nga kagawasan. Pinaagi han halad ni Jesus, nagin posible para ha mga nagpapakita hin pagtoo ha iya nga makilala an Dios ha naiiba gud nga paagi—mahimo hira magin mga anak han Dios! (Gal. 4:9) Basi magpabilin hiton espesyal gud nga relasyon, kinahanglan isalikway han mga taga-Galasia an mga katutdoan han mga nasuporta ha Judaismo, nga nag-iinsister nga kinahanglan sundon an Mosaiko nga Balaud. Aw, waray ngani magin sakop han Balaud an diri-turi nga mga Hentil  ha mga kongregasyon! An mga Judio ngan mga Hentil pariho kinahanglan mag-uswag ha espirituwal. Nag-uupod ini han pagkarawat nga diri hira magigin matadong pinaagi han pagsunod ha Mosaiko nga Balaud.

4, 5. Ano an iginsagdon ni Pablo ha mga taga-Galasia, ngan kay ano nga importante ini ha aton?

⁴ May katuyoan kon kay ano nga iginrekord an sagdon ni apostol Pablo ha mga taga-Galasia: basi buligan an tinuod nga mga Kristiano ha bisan ano nga panahon nga diri bumaya ha kamatuoran ha Biblia ngan diri bumalik ha mga butang nga ira na ginbayaan. Gin-giyahan ni Jehova hi Pablo nga dasigon diri la an mga membro han mga kongregasyon ha Galasia kondi an ngatanan nga Iya magsiringba nga magpabilin nga matinumanon.

⁵ Kinahanglan hinumdoman naton ngatanan kon paonan-o kita gintalwas ha espirituwal nga pagkauripon ngan nagin usa han mga Saksi ni Jehova. Basi mahimo ini, tagda inin duha nga pakiana: Nahinunumdoman mo ba an mga pitad nga imo ginhimo basi magin kwalipikado ha bawtismo? Nahinunumdoman mo ba kon paonan-o mo nakilala an Dios ngan nakilala ka niya ngan tungod hito inabat ka hin tinuod nga kagawasan ha espirituwal?

6. Ano nga listahan an aton tatagdon?

⁶ An kadam-an ha aton may ginhimo nga siyam nga pitad. Ito nga mga pitad, pariho hin listahan ha pag-usisa han aton kahimtang ha espirituwal, makikita ha kahon nga “Mga Pitad nga Nagtutugway ha Bawtismo ngan Padayon nga Pag-uswag.” An regular nga pagpahinumdom ha aton kalugaringon hinin siyam nga pitad magpaparig-on ha aton nga diri bumalik ha mga butang ha kalibotan. Sugad la nga an eksperyensyado kondi mahirot nga piloto padayon nga talwas nga nagpapalupad hin eruplano pinaagi han pagkita ha iya listahan antes lumarga, mabubuligan ka liwat nga magpadayon ha matinumanon nga pag-alagad kon pirme mo ginkikita an imo espirituwal nga listahan.

7. Ano nga surubdan an kinahanglan naton sundon, ngan kay ano?

⁷ An listahan han piloto nagpapahinumdom ha iya nga may rutina nga kinahanglan sundon niya hin maopay antes han kada paglarga. Mahimo liwat naton usisahon hin regular an aton kalugaringon ngan an rutina nga aton ginsusunod tikang han nabawtismohan kita. Hi Pablo nagsurat kan Timoteo: “Magsubad ha surubdan han mga putli nga mga pulong nga imo hinbatian ha akon, ha pagtoo ngan paghigugma nga aada kan Kristo Jesus.” (2 Tim. 1:13) Iton “putli nga mga pulong” mababasa ha Pulong han Dios. (1 Tim. 6:3) Sugad la nga an drowing naghahatag hin ideya han kabug-osan nga hitsura han usa nga butang, an ‘surubdan han kamatuoran’ nabulig ha aton nga masabtan ha kabug-osan an mga ginkikinahanglan ha aton ni Jehova ngan masunod ito. Salit hisgotan naton yana an mga pitad nga nagtugway ha aton bawtismo basi mausisa kon nasusunod ba naton hin maopay an surubdan han kamatuoran.

8, 9. (a) May kalabotan ha kahibaro ngan pagtoo, ano an kinahanglan naton buhaton? (b) Iilustrar kon kay ano nga importante an pag-uswag ha espirituwal ngan kon kay ano nga nagpapadayon ito nga proseso.

⁸ An siyahan ha aton listahan amo an panginahanglan ha pagkuha hin kahibaro. Katapos, mahimo kita magkaada pagtoo. Kondi kinahanglan padayon kita nga mag-uswag hito nga duha. (2 Tes. 1:3) An pag-uswag nag-uupod hin sunod-sunod nga pagbag-o. An pulong nga “pag-uswag” nangangahulogan hin pagdugang, pagdaku. Salit katapos han bawtismo, kinahanglan padayon nga parig-unon naton an aton espirituwalidad basi padayon kita nga mag-uswag.

⁹ Mahimo naton itanding an aton pag-uswag ha espirituwal ha pagtubo han usa nga kahoy. An usa nga kahoy mahimo maghitaas hinduro, labi na kon nakagamot ito hin hilarom o haluag. Pananglitan, an pipira han makaruruyag gud nga mga sedro ha Lebanon mahimo magin sugad kahitaas  han 12 ka andana nga building, magkaada marig-on ngan hilarom nga mga gamot, ngan an kadaku han lawas hito mahimo umabot hin 12 ka metro. (Kanta ni Salo. 5:15) Katapos han malaksi gud nga paghitaas hito ha tinikangan, natubo la gihapon ito pero diri na sugad kaabat. Kada tuig, an lawas nagtitikadaku ngan an mga gamot mas nagtitikahilarom ngan nagtitikahaluag, salit nagigin mas marig-on ito. Sugad liwat hito an pag-uswag ha espirituwal han usa nga Kristiano. Ha tinikangan han aton pag-Bible study, bangin madagmit an aton pag-uswag ha espirituwal ngan katapos nagpabawtismo kita. Nakita han kabugtoan ha kongregasyon an aton pag-uswag ngan nalipay hira. Bangin nagin kwalipikado pa ngani kita nga magin payunir o kumarawat hin iba pa nga pribilehiyo. Ha sumunod nga mga tuig, bangin diri na sugad kaabat an aton padayon nga pag-uswag ha espirituwal. Bisan pa hito, kinahanglan pa gihapon nga mag-uswag an aton pagtoo ngan kahibaro ngadto ha pagin “hamtong nga kalalaki, ha suruklan ha kahitaas han kabug-osan ni Kristo.” (Efe. 4:13) Salit kon nag-uuswag kita sugad nga Kristiano, pariho kita hin pagtuturok pa la nga liso nga natubo ngan nagigin marig-on nga kahoy.

10. Kay ano nga bisan an hamtong nga mga Kristiano kinahanglan mag-uswag?

¹⁰ Kondi kinahanglan diri la tubtob dida an aton pag-uswag. Kinahanglan mag-uswag an aton kahibaro ngan magmarig-on an aton pagtoo. Hito nga paagi nagigin mas marig-on an aton pakagamot ha Pulong han Dios. (Prob. 12:3) Ha Kristiano nga kongregasyon, damu nga kabugtoan an naghimo hito. Pananglitan, usa nga brother nga sobra tulo ka dekada na nga tigurang an nagsiring nga padayon la gihapon hiya nga nag-uuswag ha espirituwal. Hiya nagsiring: “Nag-uswag gud an akon pagpabili ha Biblia. Pirme ako nakakaagi hin bag-o nga mga higayon ha pag-aplikar han mga prinsipyo ngan balaud ha Biblia ha iba-iba nga paagi. Padayon liwat nga nag-uuswag an akon pagpabili ha ministeryo.”

11. Paonan-o naton makikilala hin maopay hi Jehova ha paglabay han panahon?

¹¹ Nahiuupod liwat ha aton pag-uswag an pagin mas duok kan Jehova sugad nga aton Sangkay ngan Amay. Karuyag niya nga abaton naton nga kinakarawat kita niya. Karuyag niya nga hibaroan naton nga talwas kita ngan hinigugma pariho han inaabat han usa nga bata kon ginhahangkopan han iya mahigugmaon nga kag-anak o pariho han aton inaabat kon kaupod naton an usa nga tinuod ngan maunungon nga sangkay. Syempre, ini nga pagin duok kan Jehova diri basta la nahitatabo. Ginkikinahanglan an panahon basi makilala ngan higugmaon naton hiya. Salit basi makilala hin maopay hi Jehova, magin determinado nga maggahin hin panahon ha pagbasa han iya Pulong  kada adlaw. Basaha liwat an tagsa nga gowa han An Barantayan ngan Awake! sugad man an iba pa nga publikasyon nga basado ha Biblia.

12. Ano an kinahanglan naton buhaton basi magpabilin nga marig-on an aton pakigsangkay ha Dios?

¹² An mga sangkay han Dios nag-uuswag ha espirituwal pinaagi han ira sinsero nga mga pag-ampo ngan pagkaada mag-opay nga kaupod. (Basaha an Malakias 3:16.) An “mga talinga [ni Jehova] nanmamati ha ira pag-ampo.” (1 Ped. 3:12) Pariho hin mahigugmaon nga kag-anak, hi Jehova namamati gud ha aton mga pag-ampo ha pangaro hin bulig. Salit kinahanglan ‘magpadayon gud kita ha pag-ampo.’ (Roma 12:12) Diri kita makakapabilin nga hamtong nga Kristiano kon waray han bulig han Dios. Kon ha aton la kalugaringon nga kusog, diri naton maaatohan ngan malalamposan an mga pagsulay ngan problema dinhi hini nga sistema. Kon diri na kita mag-aampo, diri na naton makakarawat an kusog nga andam ihatag han Dios. Kontento ka ba ha kalidad han imo mga pag-ampo, o nakikita mo nga may kinahanglan ka pauswagon hito nga bahin?—Jer. 16:19.

13. Kay ano nga an pakig-upod ha aton igkasi-Kristiano ginkikinahanglan basi mag-uswag ha espirituwal?

¹³ Hi Jehova nalilipay ha mga “nadangop ha iya”; salit bisan kon nakilala na naton an Dios, karuyag naton magpadayon ha regular nga pakig-upod ha iba pa nga nakilala ha iya. (Nah. 1:7) Tungod kay maraot hinduro ini nga kalibotan, maaramon gud nga makig-upod kita ha aton kabugtoan. Ano an mga kapulsanan hito? Ha kongregasyon makakaagi ka hin mga bugto nga mag-aaghat ha imo “ha gugma ngan ha mga mag-opay nga buhat.” (Heb. 10:24, 25) An gugma ha usa kag usa nga gin-unabi ni Pablo ha iya surat ha mga Hebreohanon nagkikinahanglan hin pagminagburugto, usa nga komunidad han mga magsiringba nga nagkakaurosa an hunahuna, usa nga kongregasyon. An pagpakita hini nga klase hin gugma nagkikinahanglan hin pakig-upod ha iba nga Kristiano. Salit iapi ha imo listahan an regular nga pagtambong ngan pagkomento ha mga katirok.

14. Kay ano nga an pagbasol ngan pagbag-o nagpapadayon nga proseso?

¹⁴ Basi magin Kristiano, ginkinahanglan naton nga magbasol ngan umundang ha makasasala nga pagkinabuhi. Kondi an pagbasol nagpapadayon nga proseso. Sugad nga diri-hingpit nga mga tawo, aada pa gihapon ha aton an sala nga pariho hin nalukot nga halas nga andam tumukob. (Roma 3:9, 10; 6:12-14) Magpabilin kita nga mabinantayon ngan diri igbalewaray an aton mga kaluyahan. Maopay na la kay hi Jehova mapailubon ha aton samtang nangangalimbasog gud kita nga atohan an aton mga kaluyahan ngan maghimo hin ginkikinahanglan nga mga pagbag-o. (Fil. 2:12; 2 Ped. 3:9) Daku nga bulig an pagkontrol han aton paggamit han aton panahon ngan panag-iya, iginsasalikway an makikalugaringon nga mga tumong. Usa nga sister an nagsurat: “Nagdaku ako ha kamatuoran, kondi an akon panhunahuna kan Jehova iba gud ha panhunahuna han kadam-an. Sadang Hiya kahadlokan hinduro, ngan inabat ko nga diri ko gud hiya mapapalipay.” Ini nga sister waray umabat nga duok hiya kan Jehova ngan nakabuhat hin mga sayop. “Diri ito tungod kay diri ko hinigugma hi Jehova,” siring niya, “kondi tungod kay diri ko hiya kilala hin maopay. Kondi katapos han damu nga sinsero nga pag-ampo, nagtikang ako paghimo hin mga pagbag-o.” Nagsiring liwat hiya: “Inabat ko nga gintutugwayan ako ni Jehova pariho hin bata, malumo gud nga ginbubuligan ako nga malamposan an tagsa nga ulang ngan iginpapakita ha akon an kinahanglan ko buhaton.”

15. Ano an nakikita ngan ginpapabilhan ni Jesus ngan han iya Amay?

¹⁵ Padayon nga ‘magyakan ha katawohan’ mahitungod han maopay nga sumat. Ini an ginsiring han anghel han Dios kan Pedro ngan ha iba pa nga apostol katapos han milagroso nga pagpagawas ha ira ha prisohan. (Buh. 5:19-21) Oo, an pakigbahin ha ministeryo kada semana kinahanglan upod liwat ha aton listahan. Nakikita ngan ginpapabilhan ni Jesus ngan han iya Amay an aton pagtoo ngan ministeryo. (Pah. 2:19) An ministeryo sadang magin daku nga bahin han aton kinabuhi.

16. Kay ano nga maopay nga pamalandungon an aton dedikasyon kan Jehova?

¹⁶ Pamalandonga an imo dedikasyon. An aton pinakabirilhon nga panag-iya amo an aton relasyon  kan Jehova. Kilala niya an iya mga panag-iya. (Basaha an Isaias 44:5.) Usisaha an imo relasyon kan Jehova, ngan pag-ampo nga buligan ka niya nga magpabilin ito nga marig-on. May kalabotan hito, hinumdumi an importante nga petsa han imo bawtismo. Magpapahinumdom liwat ini ha imo nga an imo bawtismo nagsisimbolo han pinakaimportante nga desisyon nga imo ginhimo.

17. Kay ano nga kinahanglan kita magpailob basi makapabilin nga duok kan Jehova?

¹⁷ Ha surat ni Pablo ha mga taga-Galasia, iya ginpabug-atan an panginahanglan nga magpailob. (Gal. 6:9) Importante liwat ito ha mga Kristiano yana. Maatubang ka hin mga pagsari, kondi bubuligan ka ni Jehova. Padayon nga mag-ampo ha pangaro hin baraan nga espiritu. Magigin kalmado ka samtang iya ginsasaliwnan hin kalipay an kasubo ngan hin kamurayawan an kabaraka. (Mat. 7:7-11) Hunahunaa ini: Kon hi Jehova nagmamangno ha mga tamsi, diri ba mas nagmamangno hiya ha imo kay hinigugma mo hiya ngan igindedikar mo an imo kalugaringon ha iya? (Mat. 10:29-31) Anoman an imo problema, ayaw gud pagbalik ha mga butang nga imo na ginbayaan, ayaw gud pag-undang ha pag-alagad. Damu gud nga bendisyon an aton nakakarawat kay kilala kita ni Jehova!

18. Yana nga ‘nakilala mo na an Dios,’ ano an karuyag mo buhaton?

¹⁸ Salit, kon bag-o ka pa la nga nakakilala ha Dios ngan nagpabawtismo, ano an sadang mo buhaton? Padayon nga kilalaha hi Jehova hin maopay, ngan padayon nga mag-uswag ngadto ha pagkahamtong ha espirituwal. Ngan kon damu ka tuig ka na nga bawtismado, ano liwat an imo bubuhaton? Kinahanglan padayon liwat nga pahilarumon ngan pauswagon mo an imo kahibaro mahitungod kan Jehova. Hinaot diri gud kita magin kampante ha aton relasyon ha iya. Lugod, ha panapanahon kinahanglan usisahon naton ngatanan an aton espirituwal nga listahan basi masiguro nga padayon nga nag-uuswag an aton relasyon ha aton mahigugmaon nga Amay, Sangkay, ngan Dios—hi Jehova.—Basaha an 2 Korinto 13:5, 6.