Kon an pag-antos diri tikang ha Dios, ano an hinungdan han kalyap nga gutom, diri nasusulbad nga kapobrehan, brutal nga mga girra, nakakabaldado nga mga sakit, ngan kalamidad? Iginpapakita han Pulong han Dios, an Biblia, an tulo nga nangunguna nga hinungdan han pag-antos han tawo:

1. Pagin Makikalugaringon, Kahakog, Ngan Kapungot. “Ginmamandoan han tawo an iya igkasi-tawo ha iya ikakadaot.” (Eclesiastes 8:9) Agsob nga nag-aantos an mga tawo tungod kay biktima hira han diri perpekto, makikalugaringon, o madarahog nga mga tawo.

2. Panahon Ngan Diri Ginlalaoman nga mga Panhitabo. An mga tawo agsob nga nag-aantos “kay an panahon ngan diri ginlalaoman nga mga hitabo naabot ha ira.” (Eclesiastes 9:11) Karuyag sidngon, an mga tawo posible nga aada ha sayop nga lugar ha sayop nga panahon, naaaksidente hira, diri naghihirot, o nagsasayop.

3. An Maraot nga Magmarando han Kalibotan. Klaro nga iginpapakilala han Biblia an nangunguna nga rason han pag-antos han katawohan. Ito nasiring: “An bug-os nga kalibotan aada ha gahum han usa nga maraot.” (1 Juan 5:19) Ito nga “usa nga maraot” amo hi Satanas nga Yawa. Gamhanan hiya nga espiritu ngan anghel han Dios hadto, kondi “waray hiya magpadayon ha kamatuoran.” (Juan 8:44) Inupod ha iya an iba nga anghel ha pagrebelde ha Dios basi kab-uton an ira hakugnon nga mga hingyap, salit nagin demonyo hira. (Genesis 6:1-5) Tikang hito nga takna, nangangalimbasog gud hi Satanas ngan an iya mga demonyo nga madarahog nga makaimpluwensya ha kalibotan. Makikita gud ini labi na ha aton panahon yana. May daku nga kasina yana an Yawa ngan “nanlilimbong ha bug-os nga inuukyan nga tuna,” salit “kairo han tuna.” (Pahayag 12:9, 12) Oo, brutal nga magmarando hi Satanas. Nalilipay hiya ha pag-antos han katawohan. Hi Satanas, diri an Dios, an nagpapakuri ha mga tawo.

TAGDA: Usa la nga waray kalooy ngan magburuhat hin duro nga karaotan an malilipay nga mag-antos an inosente nga mga tawo. Ha kabaliktaran, an Biblia nasiring: “An Dios gugma.” (1 Juan 4:8) Uyon ha iya mahigugmaon nga personalidad, “imposible gud nga magbuhat hin maraot an tinuod nga Dios, nga magbuhat hin sayop an Makagarahum-ha-ngatanan!”—Job 34:10.

Kondi bangin magpakiana ka, ‘Tubtob san-o hi Satanas tutugotan han Makagarahum-ha-ngatanan nga Dios ha iya maraot nga pagmando?’ Sugad han aton hinbaroan, nangangalas an Dios ha karaotan ngan naghahatag ha Iya hin duro nga kasakit an aton pag-antos. Dugang pa, an iya Pulong nag-aaghat: ‘Ipasa ha iya an ngatanan niyo nga kabaraka, kay nagtatagad hiya ha iyo.’ (1 Pedro 5:7) Hinigugma kita han Dios ngan may gahum hiya nga wad-on an tanan nga pag-antos ngan kawaray-hustisya, sugad han aton mahibabaroan ha sunod nga artikulo. *