Igintutdo ni Jesus nga an iya mga sumurunod kinahanglan ‘diri bahin han kalibotan.’ (Juan 15:19) Nag-uupod ini han pagin neutral​—an diri pagdapig ha politika han kalibotan ngan ha mga girra. Ha tinuod la, diri pirme masayon an pagin neutral. Bangin tamayon kita tungod hini. Paonan-o kita makakapabilin nga neutral ngan magigin maunungon pirme kan Jehova nga Dios?

1. Ano an panhunahuna han tinuod nga mga Kristiano ha mga gobyerno han tawo?

Ginrirespeto han mga Kristiano an gobyerno. Ginbubuhat naton an ginsiring ni Jesus ngan ‘ginhahatag ha Cesar an mga butang han Cesar’​—karuyag sidngon, ginsusunod naton an mga balaud han nasud, sugad han pagbayad han mga buhis. (Marcos 12:17) Igintututdo han Biblia nga an mga gobyerno han tawo nagmamando tungod la kay gintutugotan hira ni Jehova nga magmando. (Roma 13:1) Salit nasasabtan naton nga an mga gobyerno han tawo relatibo la, o limitado, an awtoridad. Naglalaom kita ha aton Dios ngan ha iya langitnon nga Ginhadian nga amo an magsusulbad han mga problema han katawohan.

2. Paonan-o naton maipapakita nga neutral kita?

Pariho kan Jesus, diri kita nakikigbahin ha politika. Han nakita han mga tawo an usa han mga milagro ni Jesus ngan nangalimbasog nga himoon hiya nga ira hadi ha tuna, waray hiya sumige. (Juan 6:15) Kay ano? Kay sugad han iya ginsiring ha urhi, “an akon Ginhadian diri bahin hini nga kalibotan.” (Juan 18:36) Sugad nga mga disipulo ni Jesus, ginpapakita naton an aton pagin neutral ha damu nga paagi. Pananglitan, diri kita naapi ha girra. (Basaha an Micas 4:3.) Ginrirespeto naton an mga simbolo han nasud​—sugad han bandera​—pero diri naton ito ginsisingba. (1 Juan 5:21) Ngan diri kita nadapig o nakontra ha bisan ano nga partido ha politika o kandidato. Ha sugad hini ngan ha iba pa nga mga paagi, ginpapakita naton nga bug-os nga maunungon kita ha gobyerno han Dios​—an iya Ginhadian.

 DUGANG NGA USISAHA

3. An tinuod nga mga Kristiano neutral

Hi Jesus ngan an iya mga sumurunod nagpakita hin ehemplo para ha aton. Basaha an Roma 13:​1, 5-7 ngan 1 Pedro 2:​13, 14. Katapos, i-play an VIDEO ngan hisguti niyo an masunod nga mga pakiana.

• Kay ano nga kinahanglan naton irespeto an mga gobyerno han tawo?

• Ano an pipira nga paagi nga maipapakita naton nga nagpapasakop kita ha ira?

Ha panahon han girra, an iba nga mga nasud bangin sumiring nga neutral hira, pero pariho nira ginbubuligan an duha nga grupo nga naggigirra. Ano gud ba an karuyag sidngon han pagin neutral? Basaha an Juan 17:16. Katapos, i-play an VIDEO ngan hisguti niyo an masunod nga pakiana.

• Ano an karuyag sidngon han pagin neutral?

Ano man kon an gobyerno may ginpapatuman nga nakontra ha balaud han Dios? Basaha an Buhat 5:​28, 29. Katapos, i-play an VIDEO ngan hisguti niyo an masunod nga mga pakiana.

• Kon may-ada balaud an tawo nga nakontra ha balaud han Dios, kan kanay balaud an kinahanglan naton sugton?

• May nahuhunahuna ka ba nga kahimtang nga an mga Kristiano kinahanglan diri sumugot ha gobyerno han tawo?

 4. Magin neutral ha hunahuna ngan buhat

Basaha an 1 Juan 5:21. Katapos, i-play an VIDEO ngan hisguti niyo an masunod nga mga pakiana.

• Ha video, kay ano nga nagdesisyon hi Ayenge nga diri umapi ha partido ha politika o makigbahin ha nasyonalistiko nga mga seremonya, sugad han pagsaludo ha bandera?

• Para ha imo, maaramon ba an iya desisyon?

Ha ano nga iba pa nga mga sitwasyon bangin magin makuri para ha aton nga magpabilin nga neutral? I-play an VIDEO, katapos, hisguti niyo an masunod nga mga pakiana.

• Paonan-o kita makakapabilin nga neutral kon nagkikita hin isport nga an mga atleta tikang ha iba-iba nga nasud?

• Paonan-o kita makakapabilin nga neutral bisan kon kita mismo nadadaot o nakakapahimulos ha desisyon han mga politiko?

• Paonan-o makakaapekto ha aton pagin neutral an mga balita o an aton mga kaupod?

 SUMARYO

An mga Kristiano naniningkamot nga magin neutral ha politika ha ira hunahuna, pulong, ngan buhat.

Repaso

• Ano an kinahanglan nga magin panhunahuna naton ha mga gobyerno han tawo?

• Kay ano nga nagpapabilin kita nga neutral ha politika?

• Ha ano nga mga sitwasyon bangin makurian kita nga magpabilin nga neutral?