NEW YORK​—Ha Huwebes, Mayo 3, 2018, bibistahon han Saint Petersburg City Court an apela han mga Saksi ni Jehova kontra ha desisyon nga kompiskaron an ira national office hadto ha Russia. Kon diri uyonan an apela, puydi kompiskaron dayon han Estado an 14 nga bilding. An propyedad nga mga 10 ka ektarya nagkakantidad hin mga $31.8 ka milyon (2 ka bilyon nga ruble).

Waray kilalaha han orihinal nga desisyon han Sestroretskiy District Court han Disyembre 2017 an ebidensya nga an opisina han mga Saksi gintatag-iya han Watch Tower Bible and Tract Society of Pennsylvania (WTPA), usa nga non-profit nga korporasyon nga nakabase ha United States. An propyedad iginbalhin han mga Saksi ni Jehova ha Russia ha WTPA han 2000, ngan tikang hadto an WTPA nagbayad hin mga $3 ka milyon (188 ka milyon nga ruble) sugad nga buhis ha propyedad ha Russian Federation. Bisan kon ginkilala han gobyerno han Russia an legal nga pagbalhin ha sulod hin sobra 17 ka tuig, gin-insister yana han district court nga diri balido an kontrata ha pagtag-iya han WTPA. Salit, gindeklara han korte nga an Administrative Center (AC) han mga Saksi ha Russia an tinuod nga tag-iya hito. Tungod kay iginpasara han Korte Suprema han 2017 an AC, kon mapirde an mga Saksi ha maabot nga apela, ipapatuman an desisyon ngan puydi kompiskaron dayon han Estado an propyedad.

An pagbista hihimoon ha alas-11:30 ha aga ha Saint Petersburg City Court, ul. Basseynaya, 6, St. Petersburg, Russia.

Media Contacts:

International: David A. Semonian, Office of Public Information, +1-845-524-3000