Han Hunyo 7, 2022, an European Court of Human Rights (ECHR) nagpagawas hin importante gud nga desisyon a kontra ha Russia tungod han pagtimaraot ha mga Saksi ni Jehova. Igindeklara han ECHR nga supak ha balaud an ginbuhat han Russia nga pagdiri han mga buruhaton han mga Saksi ni Jehova han 2017. Nagsiring liwat an Korte nga ilegal an pagdiri ha inimprinta nga mga publikasyon ngan ha jw.org. Ginsugo an Russia nga iundang an pagbista ha ngatanan nga kaso kriminal kontra ha aton kabugtoan ngan pagawson an ngatanan nga ginpriso. Ginsugo liwat an Russia nga ibalik an ngatanan nga ginkumpiskar nga mga propyedad o magbayad hin 59,617,458 euro ($63,684,978 U.S.) sugad nga danyos para ha ginkumpiskar nga mga propyedad. Ginsugo an Russia nga maghatag ha mga nagpetisyon hin 3,447,250 euro ($3,682,445 U.S.) sugad nga kabaraydan para ha danyos nga may-ada diri nasusukol nga kantidad.

An desisyon mahitungod ha 20 nga kaso tikang ha 2010 tubtob 2019, nga nag-uupod han sobra 1,400 nga nagpetisyon—indibiduwal nga mga Saksi ngan legal nga mga korporasyon. Pero, an desisyon han ECHR diri la para ha mga nagpetisyon. Nasiring ito nga “kinahanglan iundang [han Russia] an pagbista ha ngatanan nga kaso kriminal kontra ha mga Saksi ni Jehova . . . ngan pagawson an ngatanan nga Saksi ni Jehova nga ginkuhaan han ira kagawasan.” (Kami an nag-italiko.) An desisyon nagpapamatuod nga waray sala an tagsa han aton kabugtoan ha sulod ngan gawas han Russia, ngan legal nga ginpapamatud-an hito nga masinugtanon hira ha balaud nga mga tuminungnong nga sayop nga gin-akusaran ngan ginpriso.

Ha bug-os nga desisyon, ginpamatud-an hin maopay han ECHR nga sayop an waray basihan nga mga akusasyon han Russia nga an aton mga buhat, gintotoohan, publikasyon, ngan website mga extremist. Pananglitan, pansina an masunod nga pipira nga mga bahin han desisyon:

• Mga buhat: Ginpapabug-atan han ECHR nga an mga korte ha Russia “waray gin-unabi nga bisan ano nga pulong, gios o buhat han mga nagpetisyon nga nagpapamatuod nga ginbuhat nira ito tungod han kamadarahog, kangalas o diskriminasyon ha iba.” (§271)

• Gintotoohan nga an mga Saksi ni Jehova amo an tinuod nga relihiyon: “An mamurayawon nga pagkombinse ha iba nga an imo relihiyon an tinuod ngan aghaton hira nga bayaan an ‘buwa nga mga relihiyon’ ngan umapi ha ‘tinuod nga relihiyon’ legal nga paagi ha paggamit han katungod ha kagawasan ha relihiyon ngan kagawasan ha pagyakan.” (§156)

• Pagpaabuno hin dugo: “An pagdumiri ha pagpaabuno hin dugo kapahayagan han kagawasan ha pagbuot han usa nga membro han komunidad basi gamiton an iya katungod ha paghimo hin personal nga desisyon may kalabotan ha pagpatambal nga protektado ilarom han Convention ngan han balaud han Russia.” (§165)

• Diri pagsundalo tungod han konsensya: “An pagdumiri ha pagsundalo tungod han relihiyoso nga gintotoohan diri nagtatalapas hin bisan ano nga balaud han Russia.” (§169)

• An aton mga publikasyon: “An relihiyoso nga mga buruhaton han mga nagpetisyon ngan an sulod han ira mga publikasyon baga hin nag-aaghat hin kamurayawan uyon ha ira gintotoohan nga doktrina parte ha diri pakigbahin ha kamadarahog.” (§157)

• JW.ORG: Nagdesisyon an Korte nga an sulod han jw.org diri extremist. Kon may pipira nga impormasyon ha website nga diri gin-uuyonan han mga awtoridad, dapat gin-obligar nira an organisasyon nga tanggalon an mga bahin la nga para ha ira diri maopay imbes nga igdiri an bug-os nga website. (§231 ngan §232)

Marig-on nga ginkondenar han desisyon an mga awtoridad han Russia ngan ginpamatud-an nga nagpakita hira hin diskriminasyon, pagin diri patas, ngan “pagin diri tangkod.” (§187) Pananglitan, gindetalye han desisyon an masunod nga mga nadiskobrehan han Korte:

• “An pagpwersa ha pagdiri ha ngatanan nga relihiyoso nga organisasyon han mga Saksi ni Jehova ha Russia ginbuhat diri tungod ha legal nga mga rason. Lugod, iginpapakita han ebidensya nga ginbuhat ito kay an mga awtoridad han Russia may diskriminasyon kontra ha relihiyoso nga mga buruhaton han mga Saksi ni Jehova ngan tungod kay karuyag han mga awtoridad han Russia nga bayaan han mga Saksi ni Jehova an ira pagtoo ngan pugngan an iba nga umapi ha ira.” (§254)

• Gintugotan han mga awtoridad han Russia nga magkaada grabe nga “mga sayop ha proseso,” sugad han pagsarig han Korte Suprema han Russia ha may gindadapigan nga mga report nga ginpili han mga pulis ngan prosecutor imbes nga repasuhon nga waray gindadapigan an mga publikasyon. (§203)

• An balaud may kalabotan ha pagin extremist iginsurat ha paagi nga diri detalyado ngan diri klaro salit an mga awtoridad nagin diri makatadunganon ha mga Saksi ni Jehova. (§272)

Diri pa klaro kon ano an magigin epekto ha Russia han mga desisyon han ECHR. Pero diri kita nasarig ha tawhanon nga mga awtoridad. Lugod, “nagpapamulat kita kan Jehova” sugad nga ‘aton parabulig ngan aton taming.’—Salmo 33:20.