Hagaappe Sinttanau Daafabay Deˈenna!

ISSI uri, “Mata wode daafabay xayana” yaagidi yootiyaakko neeyyo aybi siyettanee? Neeni geella, “Aymottayiyye? Daafabay ubbatto deˈiyaaba” gaana danddayaassa. Woy ‘I oona naacii?’ gaada qoppana danddayaasa.

Meretay daafabaa gattiyoogee attennaba milatikkokka, ha hanotay tumuppe laamettanaagaa hidootanaadan oottiyaabay deˈees. Gidikkokka, he laamiyaa asaa naati baaxetidi ehookkona. Asaa naati meretan hanettiyaabaa teqqiyoogee woy laammiyoogee atto shin, hegee waanidi, qassi aybissi haniyaakko loytti erana danddayokkona. Aadhida eratettaaninne akeekan erettida, beni Israaˈeela Kawuwaa Solomoni hagaadan giidi xaafiis: “Saloppe garssa baggan oosettida oosuwaa asi pilggidi eranau danddayennaagaa eraas. Asi ai keenaa daafuridi pilggi xeellikkonne, a birshshettaa eranau danddayenna. Qassi aadhdhida eranchcha asi, ‘Taani hagaa erais’ giikkonne, i eranau danddayenna.”—Era. 8:17.

Asaa naati meretay gattiyo daafabaa teqqana danddayennaba gidikko, yaatin teqqana danddayiyay oonee? Geeshsha Maxaafay he laamiyaa ehaanay nuna Medhidaagaa gidiyoogaa yootees. Haattay yuuyi yuuyi ba sohuwaa simmiyoogaa mala, saˈaanne a yuushuwan deˈiyaabaa giddon deˈiya gaytotettaa giigissidaagee Xoossaa. (Era. 1:7) Qassi asaa naatuugaappe dumma ogiyan, Xoossay ba koyiyoogaadan goˈettana danddayiyo, zawi baynna wolqqay au deˈees. Hananabaa yootiya Ermmaasi, “Ubbaa Haariya GODAU, neeni salotanne sa7aa ne gita wolqqaaninne ne yeddido kushiyan medhdhadasa! Neessi danddayettennabi mulekka baawa” yaagidi, hegau naqaasha gidiyaabaa yootiis. (Erm. 32:17) Xoossay saˈaanne an deˈiyaabaa medhido gishshau, asaa naati saˈan sarotettaaninne woppan deˈana mala, ubbabaa waati giigissana danddayiyaakko erees.—Maz. 37:11; 115:16.

Yaatin Xoossay koshshiya laamiyaa waatidi ehaanee? Ha wodiyan haniiddi deˈiya yashshiyaabati ‘wodiyaa wurssettaayyo’ ‘malaata.’ Yesuusi, “Intte hegee haniyoogaa be7iyo wode, Xoossaa kawotettai gakkana matattidoogaa [erite]” yaagiis. (Maa. 24:3; Luq. 21:31) Xoossay saluwan essido a Kawotettay saˈan gita laamiyaa ehaana; mereta wolqqatakka ubba azazana. Xoossaa Yihoowayyo hegaadan oottiyo wolqqay deˈiyaaba gidikkokka, he oosuwaa ba naˈau immanau dooriis. Hananabaa yootiya Daaneeli Yesuusa xeelliyaagan, “Asai ubbai, kawotettati ubbainne dumma dumma qaalan haasayiya zareti ubbai ayyo haarettana mala, maatai, bonchchoinne kawotettai ayyo imettiis” yaagiis.—Dane. 7:14.

Xoossaa Naˈaa Yesuus Kiristtoosi, saˈay deˈanau ufayssiya soho gidana mala, koshshiya ubbabaa laammanaadan ayyo wolqqay imettiis. Yesuusi naaˈˈu shaˈu layttappe kase saˈan deˈido wode, mereta wolqqata azazana danddayiyoogau xeera beso gidiyaaba oottiis.  Issi wode Yesuusinne i erissiyo ashkkarati Galiila Abbaa wolwoluwan pinnishin “wolqqaama gotee denddin, beetai wolwoluwaa shocin, haattai kumana gakkanaassi wolwoluwaa giddo gelees.” Yesuusi erissiyo ashkkarati bantta shemppuwau keehippe yayyidi, Yesuusi ashshanaadan oychidosona. Yesuusi ay oottidee? I “gotiyaa, ‘Co77u ga’ giidi abbaakka, ‘Woppu ga’ giis; goteekka co77u gin, ubbabaikka woppu giis.” I erissiyo ashkkarati maalaalettidi, “Hagee laa harai atto, goteenne abbai azazettiyoogee oonee?” yaagidosona.—Mar. 4:37-41.

Yesuusi guyyeppe saluwaa bin, hegaappe dariya wolqqaynne maatay ayyo imettiis. I Xoossaa Kawotettaa Kawo gidiyoogaadan, saˈaa bolli asay sarotettaaninne woppan deˈanaadan koshshiya ubbabaa laammanau au aawatettaynne giday deˈees.

SHin nuuni qommoora beˈidoogaadan, metuwaappenne daafabaappe daroy asi ehiyooba, giishin bantta xallaa siiqiyaanne yaaretiya asati bessennabaa oottiyoogee ehiidoba woykko yaa iitanaadan oottidoba. Hegaa malabaa oottiyoogaa aggennanne laamettenna asata he Kawotettay waatanee? Geeshsha Maxaafay Goday Yesuusi “ba wolqqaama kiitanchchatuura tamaa lacuwaa giddon saluwaappe yiyo wode, . . . Xoossai bana erennaageetanne nu Godaa Yesuus Kiristtoosa wonggeliyaa mishiraachchuwaayyo azazettennaageeta” qaxxayanaagaa yootees. Ee, Yesuusi ‘saˈaa xayssiyaageeta xayssana.’—2 Tas. 1:7, 8; Ajj. 11:18.

Hegaappe simmin, ‘kawotu Kawoy,’ Yesuus Kiristtoosi saˈaa wolqqata ubbaa azazana. (Ajj. 19:16) I he Kawotettau haarettiyaageeta hegaappe simmin ayba bashshaynne gakkennaadan oottana. Boniyaa balgguwaa malaban carkkuwaa hanotay laamettiyoogee, asaa naata goˈˈiyaaba gidanaadan oottanau i ba wolqqaa goˈettana. Yihooway ba asau daro wodiyaappe kase, “Taani intteyyo iraa wodiyan bukissana; biittaikka kattaa darissidi mokkana; dembbaa mittatikka aifiyaa aifana” yaagidi qaalaa gelidobay polettana. (Wog. 26:4) Asay bashshay xayssana giidi hirggennan keettaa keexxana. Eti “keettata keexxidi, etan de7ana; woiniyaa turatakka tokkidi, eta aifiyaa maana.”—Isi. 65:21.

Neeni Ay Oottana Bessii?

Neeni hara daro asaagaadan, ubbabaa xayssiya daafabay baynna alamiyan deˈanau amottiyoogee erettidaba. Yaatin neeni yan deˈanau ay oottana koshshii? ‘Xoossaa erennaageetinne mishiraachuwaayyo azazettennaageeti’ sinttappe yaana, daafabay baynna alamiyan deˈenna gishshau, issi uri ha wodiyan Xoossaabaa tamaarananne i saˈaa haaranaadan essido Kawotettau exatana bessiyoogee qoncce. Xoossay nuuni a eranaadaaninne i ba Naˈaa baggaara essido Kawotettaa mishiraachuwau azazettanaadan koyees.

Hegaadan oottiyoogaa tamaariyo keehippe loˈˈo ogee Geeshsha Maxaafaa akeekan xannaˈiyoogaa. Kawotettaa haaruwan woppu giida heeran deˈanau gidaa kunttanaadan maaddiya kaaletoy Geeshsha Maxaafan deˈees. Geeshsha Maxaafay tamaarissiyoobaa eranau nena maaddanaadan Yihoowa Markkata aybissi oychikkii? Neeni oychikko eti nena maaddana. Neeni Xoossaa eranaunne mishiraachuwau azazettanau baaxetiyaaba gidikko, Leemiso 1:33y, “Taani odiyoogaa siyiyaageeti ubbai woppu giidi, saro de7ana; metuwaa hirggaappekka shemppana” yaagidi yootiyo hidootay neeyyo polettanaagee erettidaagaa.