AMARKKAN diccida Katiriina iyyo layttay 16 gidiyo wode xammaqettada Yihoowa Markka gidaasu. A minnada haggaazawusu; shin a haggaaziyo heeran Kawotettaa mishiraachuwaa siyiya asay keehi guutta. A hagaadan gaasu: “Banttana Xoossaabaa tamaarissiya asa kiittanaadan woossida asatubaa nabbabaas. Taanikka hegaa mala asa demmanawu amottaas; shin mule demma erikke.”

Katiriina he heeran daro layttawu sabbaka simmada, asay Kawotettaa mishiraachuwaa ufayttidi siyiyo heeri baanawu qoppiyoogaa doommaasu. SHin baanaagee o hirggissiis. A so asaappe haakka biidoy issi wode xalla; he wode a takkido naaˈˈu saaminttatun so asaa keehi laamotaasu. SHin a Yihoowabaa eranawu koyiyaageeta maaddada ufayttanawu amottiyoogee hegaa xoonanawu maaddiis. A baana danddayiyo amarida heeraa qoppa simmada, Guwamen deˈiya macara biiruwawu xaafin, he macara biiroy issi issi maaddiya qofaa iyyo yootiis. Isiine 2007n, iyyo layttay 26 gidido wode, Pasifikke Ano Abban deˈiya, ba biittaappe 10,000 kilo meetire gidiyaagaa haakkidi deˈiya Saypane haruuruwaa baasu. A yaa baada demmidobay aybee?

Katiriina yaa gakkada takkennan Geeshsha Maxaafaa xannaˈana koyiya, layttay 45 heera gidido Dooriso giyo maccaaseera gayttaasu. Eti Geeshsha Maxaafay Tamaarissiyoy giyo maxaafaappe koyro heezzu shemppota xannaˈoogaappe guyyiyan Katiriino issi issibay qofissiis. A hagaadan gaasu: “Doorisa gooba xinaate; shin taani o loytta xannaˈissiyaabadan qoppabeykke. Taani aggennan xannaˈana koyiya ura xannaˈissa erikke; qassi Doorisa kayma gidida, geella ba lagge gidida michiyaa bana xannaˈissanaadan koyennan aggukku gaada qoppaas.” Katiriina ba xinaatiyo xannaˈissiya giiga michiyo demmanawu bana maaddana mala Yihoowa woossaasu. Yaatada, o hara uri xannaˈissanaadan koyiyoogaa Doorisiyyo yootanawu qofaa qachaasu.

Katiriina hagaadan gaasu: “Taani hegaa iyyo yootanaappe kase, Doorisa bana metida issibaa taassi yootana koyiyoogaa odaasu. A yootiyoobaa ezgga simmada, tana hegaa mala metoy gakkido wode Yihooway tana waati maaddidaakko iyyo yootaas. Yootin, a tana galataasu.” Hegaappe simmada Doorisa Katiriiniyyo hagaadan gaasu: “Yihooway tana ne baggaara maaddees. Neeni ta soo koyro yiyo wode, taani daro saatiyawu Geeshsha Maxaafaa nabbabaydda takkaas. Qassi Geeshsha Maxaafay yootiyoobaa taani akeekanaadan maaddiya asa kiittanaadan yeekkaydda Xoossaakko woossaas. He wode neeni ta kariyaa  qoxxadasa. Yihooway ta woosaa zaariis!” Katiriina he ufayssiya taarikiyaa yootiyo wode i ayfiyan afuttay yooliyoolees. A, “Doorisa yootidobay ta woosaa zaaro. Hegee taani o xannaˈissiyoogan sinttawu suganaadan Yihooway koyiyoogaa bessiyaaba” yaagaasu.

Doorisa 2010n xammaqettaasu; qassi ha wodiyan daro xinaateta xannaˈissawusu. Katiriina, “Yihoowayyo oottanawu wozanappe koyiya ura maaddanawu taani daro wodiyaasappe doommada amottidobay polettido gishshawu keehi ufayttays!” yaagaasu. Ha wodiyan, Katiriina Kosre giyo Pasifikke haruuruwan dumma aqinye gidada ufayssan haggaazawusu.

Kare biittaappe biida xeetaappe dariya ishatinne michoti (layttay 19ppe biidi 79) Maykroneezhiyan aassiyaageeti keehippe koshshiyoosan haggaazoosona. Yan mishettidi haggaaziyaageetu qofay Eriki qofaara issi mala; iyyo layttay 19 gidido wode 2006n Guwame baasu. Erika hagaadan gaasu: “Asay tumaa siyanawu keehi koyiyo heeran aqinye gididi haggaaziyoogee daro ufayssiyaaba. Taani hagaadan haggaazanaadan Yihooway maaddido gishshawu keehi ufayttays. Hagee aybippenne aadhiya deˈo oge!” Erika ha wodiyan Marshshaale haruuruwan Ebi giyoosan dumma aqinye gidada ufayssan haggaazawusu. Kare biittan haggaaziyo wode issi issi metiyaabay deˈiyoogeekka qoncce. Hegeetuppe heezzata ane beˈoos; qassi Maykroneezhiyaa biidaageeti hegaa waati xoonidaakko beˈoos.

Duussaa. Layttay 22 gidido Saymeni 2007n Paalawu haruuruwaa biidi, yan oottidi demmiyo damoozay ba biittan Inggilizen oottidi demmiyoogaappe keehi guutta gidiyoogaa sohuwaara akeekiis. I hagaadan giis: “Taani koyiyoobaa ubbaa shammana bessennaagaa eraas. Haˈˈi taani shammana koshshiyo kattay awugaakko akeekan doorays; qassi hirayssiyaabaa demmana gakkanaashin koyays. Issibay moorettiyo wode hegaa giigissanawu galˈˈa miishshaa koyada issi uri loyttanaadan oottays.” Ishalo deˈuwaa aggidi hegaadan deˈiyoogee a waati maaddidee? Saymeni hagaadan giis: “Hegee taani deˈuwan keehi koshshiyaabay aybakko eranaadan, qassi koshshiyaabawu guutta miishshaa waata goˈettana danddayiyaakko akeekanaadan maaddiis. Dumma dumma wodiyan Yihooway tana maaddiyoogaa akeekaas. Taani hagan haggaazido laappun laytta ubban miyoobaanne deˈiyo keettaa xaya erikke. Xoossaa Kawotettaa kaseyanawu koyidi ishalo deˈuwaa deˈiyoogaa aggidaageeta Yihooway maaddiyoogee erettidaagaa.—Maa. 6:32, 33.

Laamotaa. Erika, “Taani so asaa keehi siiqiyo gishshawu, laamotay taani loytta haggaazenna mala waayissana gaada hirggaas” yaagaasu. A hegawu kasetada waana giigettadee? A hagaadan gaasu: “Taani baanaappe kase Wochiyo Keelan laamotaabaa yootiya huuphe yohota nabbabaas. Taani nabbabidobay hegawu giigettanaadan keehi maaddiis. Issi huuphe yohoy, aayyiyaa ba naˈeessi, ‘Yihooway ta neessi qoppiyoogaappe aaruwan qoppees’ yaagada Yihooway o maaddanaagaa yootidoogaa odees. Hegee tana keehi  minttettiis.” Haannanne i azinay Patiriki Marshshaale haruuruwan Majuro giyoosan haggaazoosona. Haanna he gubaaˈiyan deˈiya ishatubaanne michotubaa qoppiyoogan so asaa laamotiyoogaa aggana danddayaasu. A hagaadan gaasu: “Kumetta alamiyan deˈiya ishatikka issi keettaa asa gidiyo gishshawu, taani ubba wode Yihoowa galatays. Eta maadoy baynnaakko taani aassiyaageeti keehippe koshshiyoosan mule haggaazana danddayikke.”

Meezetiyoogaa. Saymeni hagaadan giis: “Hara biitti biyo wode ubbabay meezetibeennaba gidees. Taani issi issitoo naaciyo wode hegaa akeekiya ura demmanawu amottays.” Erika qassi hagaadan gaasu: “Koyro heeran keehi boorasaas; shin hegee taani yaa biidoy aybissakko loytta qoppanaadan maaddiis. Taani yaa biidoy Yihoowa loyttada haggaazanaassappe attin, ta goˈˈaassa gidenna.” A gujjada, “Guyyeppe, taani xoqqu oottada xeelliyo loˈˈo laggeta demmaas” yaagaasu. Saymeni Paalawu qaalaa minni tamaaridoogee he biittan deˈiya ishatuyyoonne michotuyyo i ‘ba uluwaa aassi dooyanaadan’ maaddiis. (2 Qor. 6:13) I he qaalaa tamaaranawu baaxetiyoogee ishantti a keehi siiqanaadan oottiis. Ee, kare biittaappe yiida ishatinne he biittan deˈiya ishati hashetidi oottiyo wode, ubbaykka gubaaˈe giddon loˈˈo laggiyaa demmana danddayoosona. Aassiyaageeti keehippe koshshiyoosan haggaazanawu bantta dosan eeno giidi biidaageeti demmiyo hara anjjoy aybee?

Kiitettida PHawuloosi, “Daro zerettaa zeriya urai . . . daro kattaa cakkana” yaagiis. (2 Qor. 9:6) Ha xiqisiyan deˈiya qofay aassiyaageeti keehippe koshshiyoosan haggaaziyaageetuyyookka haniyaaba. Hegaa mala asati Maykroneezhiyan ‘cakkido daro’ ayfee aybee?

Maykroneezhiyan haggaaziya ishati haˈˈikka Geeshsha Maxaafaa xannaˈiya daro asaa demmiiddi deˈoosona; qassi Xoossaa Qaalaappe tumaa yootido asay tamaaridobaa oosuwan peeshshidi ayyaanaaban dicciyoogaa beˈiiddi deˈoosona. Patirikinne Haanna 320 asay deˈiyo Enguwar giyo guutta haruuruwankka sabbakidosona. Eti yan naaˈˈu aginaa sabbaki simmidi, ba naˈaa barkka dichiya maccaasiyo demmidosona. A Geeshsha Maxaafaa xannaˈanawu sohuwaara eeno gaasu; qassi tumaa ekkada ba deˈuwan keehi laamettaasu. Haanna hagaadan gaasu: “Ubba wode o xannaˈissi simmidi bishkkiliitiyan soo simmiyo wode, issoy issuwaa xeelliiddi, ‘Yihoowawu nena galatoos!’ yaagoos.” A gujjadakka hagaadan gaasu: “Yihooway ha maccaasiyo baakko ehaanawu issibaa goˈettana danddayiyoogaa erays; shin aassiyaageeti keehippe koshshiyoosan nuuni haggaazido gishshawu dorssa mala gidida ha maccaasiyaa Yihoowa eranaadan maaddana danddayida. Hagee nuuni nu deˈuwan keehi ufayttanaadan oottidabaappe issuwaa!” Erika giidoogaadan, “Neeni issi uri Yihoowa eranaadan maaddiyo wode daro ufayssaa cakkaasa.”

Daro biittan Kawotettaa mishiraachuwaa yootiya daro asay koshshees. Neenikka mishiraachuwaa yootiyaageeti keehi koshshiyoosaa baana danddayay? Neeni kaseegaappe loytta haggaazanawu koyanaadan Yihooway maaddana mala woossa. Hegaa xeelliyaagan gubaaˈiyaa cimata, woradaa xomoosiya ishaa woy aassiyaageeti keehi koshshiyo sohuwaa biidi haggaaziyo maataa demmida uraa zoriyaa oycha. Hegaadan haggaazanawu halchiyo wode, neeni baanawu qoppido heeran deˈiya macara biiruwawu xaafada issi issibaa oycha. * Geella neenikka bantta dosan eeno giidi daro ufayssaa ‘cakkiya,’ yelaga woy cima, aqo oyqqida woy oyqqibeenna, shaˈan qoodettiya ishanttunne michonttuppe issuwaa gidana danddayaasa.