Xoossaara Dabbotanaadan Nuna Maaddiya Eraa
Medhdhidaagee nuna wolqqanttenna. Assi keehi loˈˈo eeshshati deˈoosona. Qassi I nuuni abaa eranaadaaninne A dabbo gidanaadan koyees. (Yohaannisa 17:3; Yaaqooba 4:8) I babaa darobaa qonccissidoy hegaassa.
Nuna Medhdhidaagawu Buzo Sunttay Deˈees
“Ne xalaalai GODAA [“Yihoowa,” NW] gidiyoogaa, neeni Ubbaappe Xoqqiya Xoossai sa7aa ubbaa haariyoogaa eti erona.”—MAZAMURE 83:18.
Yihoowa xallay tumu Xoossaa gidiyoogaa Geeshsha Maxaafay tamaarissees. I saluwaa saˈaanne deˈuwan deˈiya ubbabaa Medhdhiis. Nu goynnana bessiyoy A xallaassa.—Ajjuutaa 4:11.
Yihooway Siiqiyaa Xoossaa
“Xoossai siiqo.”— 1 YOHAANNISA 4:8.
Yihooway I ay mala Xoossakko nuussi qonccissanawu Geeshsha Maxaafaanne I medhdhidobata goˈettees. A eeshshatun ubbaappe aadhdhiyaagee siiquwaa. Siiqoy A oonatettaa qonccissees. Yihoowabaa loytti tamaariyo wode kaseegaappe aaruwan A siiqoos.
Yihooway Maariya Xoossaa
“Neeni Atto Giya Xoossaa.”—NAHIMIYAA 9:17.
Yihooway nuuni nagaranchcha gidiyoogaa erees. Yaatiyo gishshawu I nuussi ‘atto gees.’ Nuuni balidoogaa awu yootiyoonne balabaa oottiyoogaa aggiyo wode, I nuussi atto gees; qassi kase nuuni oottido nagaraa gishshawu nuna qaxxayenna.—Mazamure 103:12, 13.
Yihooway Nuuni Akko Woossanaadan Koyees
“GODAI bana xeesiya ubbau, . . . matan de7ees. . . . I eta waasuwaa siyidi eta ashshees.”—MAZAMURE 145:18, 19.
Yihoowawu goynnanawu nuuni asay kessido dumma maaraa kaallana woy misiliyaa woy harabaa goˈettana koshshenna. Siiqiya yelidaageeti bantta naati yootiyoobaa siyiyoogaadan I nu woosaa siyees.