Kaalliya amarida saaminttatun kumetta saˈan dumma dumma biittatun kawotettaa dooroy deˈees. Asay keehi koshshiya gitaba, hegeekka haariya oona dooranaakko kuuyana koshshees.

 Geeshsha Maxaafay woygii?

 Asaa haariyaageetussi deˈiya abbee keehi guuttaa gidiyoogaa Geeshsha Maxaafay yootees.

•   “Asi ashshanau danddayenna gishshau, asaa halaqatun ammanettoppite. Eta shemppoi kiyiyo wode, eti biittau simmoosona; eta halchchoi ubbai he gallassikka atti aggees.”—Mazamure 146:3, 4.

 Haariya keehi goobatikka gidin guyyeppe hayqqoosona. Hegaa bollikka, eti oottido loˈˈobaa etappe simmin haariya harati nashshidi xeellanaakkonne agganaakko erana danddayokkona.—Eranchchaa 2:18, 19.

 Asi asaa mule haarana bessennaagaa Geeshsha Maxaafay yootees.

•   ‘Asi ba hemetaa suurissanaagee aawu shene gidenna.’—Ermmaasa 10:23.

 Haariya loˈˈuwaa ha wodiyan nuuni demmana danddayiyoo?

 Loyttidi haarana danddayiyaanne ammanttiya Kawuwaa, Yesuus Kiristtoosa Xoossay dooridoogaa Geeshsha Maxaafay yootees. (Mazamure 2:6) Saluwan gididi haariya Xoossaa Kawotettaassi Kawoy Yesuusa.—Maatiyoosa 6:10.

 Neeni Yesuusa haaruwaa dooruutee? Hegaa ne doorana koshshiyo waanna gaasota Geeshsha Maxaafay yootees:

•   “GODAI hanqqettin, ogiyan intte xayennaadan na7aa [Yesuus Kiristtoosa] yerite; aissi giikko, hanqquwaa eesuwan i eexxi kiyana. Akko baqati attiya ubbati anjjettidaageeta.”—Mazamure 2:12.

 Nuuni kuuyana bessiyo wode haˈˈa. Yesuusi 1914ppe doommidi haariyoogaa doommidoogaanne mata wode Xoossaa Kawotettay asaa kawotettata ubbaa xayssanaagaa Geeshsha Maxaafaa hiraagay yootees.—Daaneela 2:44.

 Yesuusa haaruwawu exatiyoogaa waata bessana danddayiyaakko gujjada tamaaranawu, “Xoossaa Kawotettawu Haˈˈi Exata!” giya huuphe yohuwaa nabbaba.