Meretay gattiyo daafabay ha wodiyan keehi meeze gididaba. Daafabay gakkiyo wode, maaddanawu oottiyo oosoy loytti daraajjayettidaagaanne maaray mankkay deˈiyoogaa gidana koshshees. Yaatanawu, Oosuwaa Kaalettiya Citay, Daafaban Qohettidaageeta Maaddiya Kifilee ubba macara biirotun eqqanaadan oottiis.

He kifiliyan oottiya ishantti daafabay gakkidoogaa siyiyo wode, aassiyaageetussi koshshiya maadoy aybakko eranawu hegaa heeran deˈiya gubaaˈe cimatuura sohuwaara gayttoosona. Hegaa heeran deˈiya aassiyaageeti giigissana danddayiyoogaappe keehi wolqqaama qohoy gakkikko, maaduwaa oosuwaa kaalettana danddayiya ishantta macara biiroy sunttees. He ishantti bantta dosan maaddiyaageeta woy koshshiyaabaa immiyaageeta oychchana danddayoosona, woykko koshshiyaabaa heeraappe shammidi gishana danddayoosona.

Hegaadan oottiyoogee daro ogiyan maaddees. Hegee ishantti bantta koyidobaa oottiyoogaa gaasuwan koshshennabaa oottennaadan, maari xayennaadan, miishshaanne harabaa bessenna ogiyan goˈettennaadan teqqees.

Macara biiroy sunttiyo ishantti maaduwaa oosuwawu koshshiya miishshay ay keenakko, qassi ba dosan oottiya ay keena asay koshshiyaakko kuuyana danddayoosona. Qassi maaduwaa oosoy eesuwaara oosettanaadan darotoo maaddana danddayiya heeran aawatettay deˈiyoogeeta erana danddayoosona. Hegaa gishshawu, miishsha shiishshanaadan, koshshiyaabaa kiittanaadan, woy qohoy gakkido heeri baanaadan oyshettibeenaageeti yaatanawu malana koshshenna.

Gidikkonne, daafabay gakkiyo wode nuuni maaddanawu koyoos. (Ibr 13:16) Nu ishantta siiqoos! Yaatin waatana danddayiyoo? Daafaban qohettidaageetussinne eta maaddiyaageetussi nuuni woossiyoogee keehippe koshshiyaaba. Qassi kumetta saˈan oosettiya oosuwawu miishshaa immana danddayoos. Oosuwaa Kaalettiya Citay immiyo kaaletuwaa kaallidi, macara biiroti he miishshaa waati loytti goˈettanaakko kuuyoosona. Qassi nuuni he oosuwaa oottanawu koyikko, Halchchuwaa Kesuwaanne Keexuwaa Kifiliyaa Dosan Maaddiyoogaa (DC-50) giyo qitsiyaa kunttiyoogan nuuni giigi uttidoogaa bessana danddayoos.

BRAZILEN WOLQQAAMA QOHUWAA GATTIDA DIˈUWAA GIYA BIIDUWAA BEˈITE; YAATIDI KAALLIDI DEˈIYA OYSHAA ZAARITE:

Brazilen 2020n wolqqaama diˈoy diˈi simmin Yihoowa Markkati maaddanawu oottidoban inttena maalaalissidaagee awugee?