Ee, Geeshsha Maxaafay saynisiyaa maxaafa gidana xayikkonne, I saynisiyaara gayttidabaa yootiyo wode suurebaa yootees. Sayniseenne Geeshsha Maxaafay maayettiyoogaanne Geeshsha Maxaafay xaafettiyo wode deˈida daro asay qoppiyoogaappe keehi dummatiya saynisee yootiyo tumubay an deˈiyoogaa bessiya amarida leemisota beˈa.

•   Salo gufanttuwawu doomettay deˈees. (Doomettaabaa 1:1) SHin beni wode odettiya daro hayseti salo gufanttoy laalettidabaa shiishshidi giigissidobaappe aattin merettidaba gidenna goosona. Baabilooneti naaˈˈu ano abbatuppe yiida xoossati salo gufanttuwaa yelidosona giidi ammanoosona. Asay haasayiyo hara hayseti qassi salo gufanttoy issi gita phuuphulliyaappe yiis giidi yootoosona.

•   Salo gufanttoy meretaa higgiyaa maaraadan deˈiyaabappe attin, xoossati koyiyoogaadan kaalettiyoobaa gidenna. (Iyyooba 38:33; Ermmaasa 33:25) He xoossati meqetti baynnaageeta gidiyoogaanne asaa bantta koyoogaadan oottanawu eti koyiyoogaa, qassi asay he xoossatuppe bana naaganawu aynne oottana danddayennaagaa kumetta alamiyan odettiya hayseti yootoosona.

•   Saˈay aybakko baynnasan kaqettiis. (Iyyooba 26:7) Beni wodiyan deˈiya daro asay saˈaa issi keehi gitabay woykko menttaa woy geeggiyaa mala doˈay tookki uttiis giidi qoppees.

•   Ano abbatuppenne hara pulttotuppe haattay penttuwan pude denddidi iranne shachcha gididi duge saˈawu bukkidi shaafatuuninne pulttotun gelees. (Iyyooba 36:27, 28; Eranchchaa 1:7; Isiyaasa 55:10; Amoxa 9:6) Beni Giriiketi shaafatun geliya haattay biitta giddon deˈiya ano abbaappe kiyees giidi qoppoosona; qassi 300 layttaappe kase gakkanaashinkka asay hegaadan qoppees.

•   Ha wodiyan deˈiya dereti issi wode ano abbaa garssan deˈoosona. (Mazamure 104:6, 8) SHin dereta haˈˈi deˈiyo sohuwan wottiday xoossata giidi daro hayseti yootoosona.

•   Geeshshatettaa naagiyoogee nuuni payya gididi deˈanaadan maaddees. Israaˈeela deriyawu imettida Higgee issi uri anhaa bochchikko meecettanaadan, asaappe asaa oyqqiya harggiyaara deˈiya uri barkka dumma takkanaadaaninne sheeshshawu utti simmidi kammanaadan yootees. (Wogaabaa 11:28; 13:1-5; Zaarettido Wogaa 23:13) SHin Israaˈeelatuyyo he higgeti imettido wode, Gibxxeti masunttaa pattanawu katta sheeshshaara walahettidabaa goˈettoosona.

 Issi uri Geeshsha Maxaafaa wozanappe pilggikko, he oyshaa zaaroy chii giyaagaa gidiyoogaa akeekana. Geeshsha Maxaafay yootiyoobay saynisiyaara maayettenna giidi issoti issoti qoppiyo kaallidi deˈiya amarida qofata beˈa:

 Haysiyaa: Geeshsha Maxaafay salo gufanttoy 24 saatee deˈiyo usuppun gallassatun merettiis giidi yootees.

 Tumaa: Geeshsha Maxaafay yootiyoogaadan Xoossay salo gufanttuwaa meretaa medhdhanaappe kase medhdhiis; he wodee ay keenakko Geeshsha Maxaafay qonccissidi yootenna. (Doomettaabaa 1:1) Qassi Doomettaabaa shemppo 1n odettida meretaa gallassay hagaa keena giyo wode gidennaagaa bessees. Saˈaanne saluwaa muleera issi ‘gallassan’ medhdhidoogaa yootiya qofaykka Geeshsha Maxaafan deˈees.—Doomettaabaa 2:4, NW.

 Haysiyaa: Maatay mittay awaa ayfiyaappe kase merettidoogaa Geeshsha Maxaafay yootees.—Doomettaabaa 1:11, 16.

 Tumaa: Geeshsha Maxaafay xoolinttetuppe issinno gidida awaa ayfiyaa deˈiyo ‘saloti’ mittaa maataappe koyro merettidoogaa yootees. (Doomettaabaa 1:1) Saˈan meretay merettido koyro ‘gallassi’ awaa ayfiyaappe guutta pooˈoy saˈan pooˈiis. Heezzantto ‘gallassan’ saˈaa yuushuwan deˈiya carkkoy geeyiis; qassi mittay maatay saˈan mokkanaadan gidiya pooˈuwaa away pooˈissiis. (Doomettaabaa 1:3-5, 12, 13) Hegaappe simmin awaa ayfee saˈaa bollan qoncci beettiyoogaa doommiis.—Doomettaabaa 1:16.

 Haysiyaa: Geeshsha Maxaafay away saˈaa yuushuwan yuuyiyoogaa yootees.

 Tumaa: Eranchchaa 1:5y hagaadan gees: “Awai mokkeesinne wullees; qassi naa77anttuwaakka mokkanau yaa mokkiyo sohuwaakko eesotees.” SHin ha qofay saˈan eqqidi xeelliya urawu away yuuyiyaaba milatiyoogaa qonccissanaassa gidenna. Ha wodiyankka issi uri saˈay awaa yuushuwan yuuyiyoogaa eriyaaba gidikkonne, “awai mokkeesinne wullees” gees.

 Haysiyaa: Geeshsha Maxaafay saˈay pidda yaagees.

 Tumaa: Geeshsha maxaafay “sa7aa gaxaa” giyo wode saˈan deˈiya haaho sohuwaa yootanaassappe attin, saˈay pidda gidiyoogaa woy saˈawu gaxay deˈiyoogaa yootanaassa gidenna. (Oosuwaa 1:8) Hegaadankka ‘saˈaa oyddu zooziyaa’ giyoogee saˈawu oyddu zoozee deˈees giyoogaa gidenna. Hegaa nabbabiyo wode hegee kumetta alamiyaa qonccissiyaaba gidiyoogaa akeekoos.—Isiyaasa 11:12; Luqaasa 13:29.