“Coˈˈu giidi uttite; qassi taani Xoossa gidiyogaa erite. Taani asaa giddon xoqqu xoqqu gaana; saˈaa bollankka xoqqu xoqqu gaana.”—Mazamure 46:10, Ooratta Alamiya Birshshettaa.

 “Coˈˈu giite; taani Xoossa gidiyogaa erite. Taani asaa giddon xoqqu xoqqu gaana. Qassi biittaa bollankka xoqqu xoqqu gaana.”—Mazamure 46:10, King Jems Vershin.

 Xoossay ubba asay awu goynnanaadaaninne kumetta saˈaa haariyo maatay awu deˈiyogaa ammanettanaadan koyees. Merinaa deˈuwa demmana koyiya ubbay A wolqqawunne maatawu zaway baynnaagaa ammanana koshshees—Ajjuutaa 4:11.

 “Coˈˈu giidi uttite; qassi taani Xoossa gidiyogaa erite.” Issi issi Geeshsha Maxaafaa birshshettatun ha xiqisiyawu koyro shaahoy “coˈˈu giidi uttite” geetettidi birshshettiis. Hegaadan birshshettidoogee, he qofay woosa keettan coˈˈu giidi uttanaadan azaziyaba giidi daro asay balan qoppanaadan oottiis. Gidoppe attin, “coˈˈu giidi uttite; qassi taani Xoossa gidiyogaa erite” geetettidi birshshettida Ibraawetto qofay asa ubbay A eqettiyogaa agganaadaaninne goynoy bessiyoy A xalaala gidiyogaa ammananaadan Xoossaa Yihooway a minttidi yootidoogaa bessees.

 Mazamure 2nkka hegaa mala qofay deˈees. Hegan, A eqettiyageeta Xoossay qaxxayanaagaa yootees. Hara baggaara qassi, ayyo maatay deˈiyogaa ammanettiyageeti, Xoossay eta kaalettanaadan, minttettanaadaaninne aadhdhida eratettaa immanaadan A woossoosona. “Akko baqati attiya ubbati,” ubba wayssiya wodiyankka ufayttoosonanne woppu goosona.—Mazamure 2:9-12.

 “Taani asaa giddon xoqqu xoqqu gaana; saˈaa bollankka xoqqu xoqqu gaana.” Beni wode, Xoossaa Yihooway ba asaa ashshanawu ba wolqqaa goˈettido wode xoqqu xoqqu giis. (Kessaabaa 15:1-3) Sinttappe qassi saˈan deˈiya ubba asay awu haarettiyonne A xalaalawu goynniyo wode, hegaappekka aaruwan I xoqqu xoqqu gaana.—Mazamure 86:9, 10; Isiyaasa 2:11.

 Issi maxaafay Mazamure 46 ‘Xoossay ba asaa naaganawu goˈettiyo gita wolqqaa sabbiya mazamuriya’ yaagiis. Xoossaa asay, Mazamure 46 yexxiyo wode, Yihooway banttana naaganawunne maaddanawu danddayiyogaa qonccissoosona. (Mazamure 46:1, 2) Hegan deˈiya qaalati Yihooway ubbatookka etaara deˈiyogaa eta hassayissoosona.—Mazamure 46:7, 11.

 Xoossaa Yihoowawu deˈiya ashshiyo wolqqaa mintti ammananawu he mazamuriyan deˈiya minttettiya qaalata wotti denttidi qoppanaadan mazamuraawee eta shoobbiis. (Mazamure 46:8) Qassi, Xoossay olaa xayssanawu danddayiyogaa yootees. (Mazamure 46:9) Beni wode, Yihooway ba asaa eta morkketuppe ashshiyogan olaa xayssiis gaana danddayettees. Shin, Xoossay mata wodiyan saˈa ubbaappe olaa xayssiyogan hegaappe aarobaa oottanaagaa Geeshsha Maxaafay yootees.—Isiyaasa 2:4.

 Yihooway baassi goynniyageeta ha wodiyankka maaddii? Ee, maaddees. Kiitettida Phawuloosi maaduwa demmanawu An ammanettanaadan Kiristtaaneta minttettiis. (Ibraawe 13:6) Mazamure 46n deˈiya qofati Xoossay nuna ashshanawu wolqqay deˈiyogaa ammanettanaadan maaddoosona. Xoossaa ‘nuuni naagetti attiyo sohodan’ xeellana mala nuna minttettoosona— Mazamure 46:1.

 Mazamure maxaafaa erissiya ha qantta biiduwa beˈa.