Anamoona a Yehova annaarumeela aBiibiliya oovirikana. Masi hata vari siiso, onninsivela omurumeela Biibiliya a Elapo Esya, yoowo oniphwanyaneya mattaava manceene. Biibiliya owo onnirumeela nsina na Yehova, teekeekhai ni tookhweya omwiiwexexa.

•   Orumeela nsina na Muluku. ABiibiliya akina khanihimya nsina na mwaneene Biibiliya. Mwa ntakiheryo, Biibiliya mmosa onnihimya masina a atthu 70 yaakhalihenrye omutaphulela. Masi hata vari siiso, Biibiliya owo khonihimya nsina na mwaneene Biibiliya, eyo piiyo, Yehova Muluku!

   Moovirikana ni aBiibiliya awo, Biibiliya a Elapo Esya, onnirumeela nsina na Muluku ikwaha imilyau sinceene mapuro naari aya Biibiliya oopacerya, nave atthu ene animutaphulela khanihimmwa masina aya.

•   Okhala Eekeekhai. Khahiyo wira aBiibiliya otheene anihimya ekeekhai vaavo anilavula aya muhupi wa Biibiliya. Mwa ntakiheryo, Biibiliya mmosa otaphuleliwe so yoolepa ya Matheyo 7:13: “Nvireke mukhora woophunyeya okhala wira mukhora muulupale ti wookhweya ni oniroiha omooroni”. Masi Biibiliya oopacerya nuulumo nirumeeliwe eversiikulu ela ti “wookhwaani” ohiya “omooroni”. Vanikhala ntoko wira anamataphulela aahela nuulumo noowi “omooroni” eversiikulu ela mwaha woowi anikupali wira nuumala atthu ootakhala murima okhwa anipahiwa omooroni. Masi yowiixuttiha eyo khenikhuma mBiibiliyani. Tivonto Biibiliya a Elapo Esya onitaphulela awe oratteene eversiikulu ela oriki: “Nvireke mukhora woophunyeya, okhala wira mukhora muulupale ni estaraata yuulupale sinroiha wookhwaani”.

•   Okhweya Omwiiwexexa. Biibiliya otaphuleliwe saana khahiyo paahi onihimya ekeekhai, masi-tho tookhweya omwiiwexexa. Nwehe ntakiheryo nimosa. Yoolepa ya Matheyo 5:3, Yesu aahirumeela nuulumo nintaphulela wira “oohakalala taale oohaawa muroohoni mwaya”. Okhala wira nuulumo nna khaninvarihana ni Emakhuwa enilavuliwa niinaano-va, Biibiliya a Elapo Esya otaphulenle so moolumo awo: “Oohakalala taale anisuwela wira ahaana omusuwela Muluku”. Nto vano moolumo awo tookhweya wiiwexexa.

 Ohiya paahi orumeela nsina na Muluku, okhala eekeekhai ni ookhweya omwiiwexexa, Biibiliya a Elapo Esya onikaiwa mahala. Nto atthu imilyau sinceene annikhalana Biibiliya a nttaava naya wira amusomeke.