Yesu aahitthokiherya wira “nikoto namukhani” nnookhalana opuro Momweneni wiirimu. (Luka 12:32) Masi ovahiwa etthuvo eyo yuulupale khahiyo etthu ya faita vakhaani. Maana Yesu aahittittimiherya wira, akhala wira mutthu onniphavela wiirela mpantta Omwene owo, onnitthuneya okhalana moonelo wooloka.

Nave Yesu aahaaleela awiixutti awe wira yaahaana okhala oolikana ene okathi aarowa awe otthika. Yesu aahimmye so: “Mukhaleke òlikanene ovara muteko, mpattinhene muthuko. Mulikaneke n’arumeyi aninwehererya pwiy’aya, ahokolowaka onìrani w’othela, wira, aphiyakaru ni amanakaru mukhora, emuhulele nananoru. Oreriwa t’arumeyi ale, anìra pwiy’aya arwaka, anaphwanya enwehereryaka”.​—Luka 12:35-37.

Awiixutti ale yaahaakuva wiiwexexa ele Yesu aahimya awe. Maana arumeyi aahimya awe yaari oolikana ene anwehereryaka pwiya aya otthika. Nto Yesu aahaatthokiherya wira: “Pwiya yowo arwaka ohiyu eriyari [okhuma ewoora 21 mpakha ohiyu eriyari], walá vasisu ene [okhuma ohiyu eriyari mpakha ewoora 3 oxaaka], khwaphwanya siso, àreriwa arumeyi awo”.​—Luka 12:38.

Yesu khahiyo wira aatumererya oluttuweliwa ovara muteko paahi. Maana Yesu, yoowo ori Mwaana a mutthu, onniihela muhina nlikanyiho nna. Nto Yesu aahaaleela awiixutti awe wira: “Nave-tho nyuwo mukhaleke òlikanene, okhala wira Mwana a Mutthu onrwá okathi ohinùpuwelanyu”. (Luka 12:40) Tivonto Yesu aahittittimiherya wira aamoorwa muhoolo. Nto aaphavela wira atthareli awe, otepexa wene ale a “nikoto namukhani”, akhaleke oolikana ene.

Okhala wira Pedru aaphavela wiiwexexa nlikanyiho na Yesu, aahimukoha wira: “Pwiya, nlikanyiho nla munnilavulela hiyo pahi, walá munalavulela atthu othene?” Ohiya omwaakhula Pedru paahi, Yesu aahilavula nlikanyiho nla: “Vano, t’uvi murumeyi òroromeleya ni ànkhili, onrowa othanliwa ni pwiy’awe wira awettiheke anamuteko awe akina, àkaweleke yolya okathi wophwanelela? Oreriwa ti murumeyi ule, onìra pwiy’awe arwaka, khumphwanya avaraka mutek’owo. Kinohimeryani ekhweli: mwanene owo ononvaha wettiha muhakhu awe wothene”.​—Luka 12:41-44.

Nlikanyiho noopacerya na Yesu, nuulumo noowi “pwiya”, onihimmwa Yesu yoowo ori Mwaana a mutthu. Tthiri “murumeyi òroromeleya ni ànkhili”, anihimmwa alopwana aniirela mpantta “nikoto namukhani”, yaawo anrowa ovahiwa Omwene. (Luka 12:32) Vano Yesu aahihimya wira atthu akina a “nikoto namukhani”, yaarowa ‘owettihaka anamuteko’ ni waavaha “yolya okathi wophwanelela”. Vano Pedru ni awiixutti akina yaawo Yesu aawiixuttiha awe ni waavaha yoolya ya omunepani, yaahisuwela wira Mwaana a mutthu aamoorwa muhoolo mwaya. Okathi owo, naamukhumelela nikhuuru naarowa waavahaka yoolya yomunepani atthareli a Yesu, yaawo ari egrupu ya “anamuteko” a Pwiya.

Yesu aahittittimiherya nthowa nikina vaatthuneya aya awiixutti awe okhala oowehaweha ni ovaha ephoole moonelo aya. Maana pooti wira yampaceryaka ohaakhapelela saana anna ni arokora. Yesu aaloponle so: “Vano, murumeyi yowo aihimerya mmurimani mwawe wira: ‘Pwiy’aka onnipisa orwa’, apajeryá wamanakasa arumeyi akina, alopwana n’athiyana, apajeryá olya n’uwurya n’uhapaliwa: pwiy’awe onophiya nihiku nihininwehereryawe, okathi ohinsuwelawe; onomomola muteko awe, amutakaniherye n’arumeyi òhiroromeleya”.​—Luka 12:45, 46.

Yesu aahimmye wira, aarwiiye “opattiha moro molumwenkuni-mu”. Yesu aahiixuttiha itthu  saarowa okumiherya ovaanyihana ni saarowa wiiriha omala-malihiwa soowiixuttiha ni soolema soohiloka. Nto eyo yaamwaakawanya atthu yaawo yaari oowiiraana, maana “tithi onrowa owanaka ni mwan’awe, mwana ni tithi awe; mama onrowa owanaka ni mwan’awe, mwana ni mam’awe; piyamwana onrowa owanaka ni mathi awe, mathi ni piyamwan’awe”.​—Luka 12:49, 53.

Masu ala yaahimya vanceenexa awiixutti a Yesu. Nuumala-vo, Yesu aahilavula ni muttitthi ole. Maana anceene yaahikhootta weemererya wira Yesu aari Mesiya. Nto Yesu aahaaleela wira: “Mònaka meku ekhumaka onikela nsuwa, nyuwo munnihimya nananoru wira: ‘Epula ehanle orupa’. Siso vannìraneya. Vano, yòpaka epheyo y’okusini, munnihimya wira: ‘Onokhala ovihaviha olelo’. Siso vannìraneya. Nyuwo alolo! Munnisuwela otaphulela makhalelo èlapo ni a wirimu: muhinsuwela sai otaphulela makhalelo òkathi ula?” (Luka 12:54-56) Tthiri, ela ennooniherya wira atthu ale khiyailokihenrye.