Biibiliya eliivuru ehinlikana ni iliivuru sikina. Maana malakiheryo a mBiibiliyani anikhuma wa Mpattuxa ahu. (2 Timootheyo 3:​16) Nto muhupi wa mBiibiliyani pooti onikhaliherya vanceene. Maana Biibiliya onihimya so: “Nuulumo na Muluku nikumi, ni nookhalana owerya wuulupale”. (aHeeberi 4:12) Biibiliya ookhalana owerya woorukunuxa okumi ahu mwa inamuna piili: Yoopacerya, owo onninivaha malakiheryo annikhaliherya khula nihiku. Ya nenli, Biibiliya onninikhaliherya omusuwela Muluku ni soolakela sawe.​—1 Timootheyo 4:8; Yakobo 4:8.

Biibiliya pooti wookhaliheryani niinaano-va. Biibiliya ookhalana malakiheryo anrowa wookhaliheryani mookumini mwanyu. Mwa ntakiheryo:

•   Okhalana waataana wooloka ni atthu akina.—aEefeso 4:​31, 32; 5:​22, 25, 28, 33.

• Okhalana okumi wooloka ni muupuwelo wooloka.—Esalimo 37:8; Miruku 17:22.

• Osuwela ele eri yooloka ni yoohiloka.​—1 aKorinto 6:​9, 10.

• Okhapelela musurukhu anyu.​—Miruku 10:4;28:19; aEefeso 4:​28. *

Nwehe yowiiraneya ya anamathelana a niinaano a wÁsia, yaawo anivaha efaita malakiheryo a mBiibiliyani. Ntoko anamathelana anceene a niinaano, awo annikhalana mixankiho sa moota woolimalela omutthu wa ole athelanne aya ni moota woolavulihana. Awo yaahipacerya weettela ele yaasoma aya mBiibiliyani. Etthu xeeni yaakhumelenle? Amulopwana oniihaniwa Vicent, onihimya so: “Ele kaasomme aka mBiibiliyani yookikhaliherya ovilela mixankiho sa ekasamento ahu moophenta. Nuumala opacerya weettela malakiheryo a mBiibiliyani ninnikhalihana saana”. Amuthiyana oniihaniwa Annalou, onihimya so: “Osoma matakiheryo a mBiibiliyani woonikhaliherya vanceene. Vano ekasamento ahu ti yoohakalaliha ni kinnihakalala ni soolukama naapanke ahu”.

Biibiliya onninikhaliherya omusuwela Muluku. Vicent aahoona wira Biibiliya khahiyo aakhalihenrye ekasamento awe paahi. Owo onihimya so: “Omusoma Biibiliya, wookikhaliherya omwaattamela Yehova ovikana khalai”. Vicent ohoona wira sowiixuttiha sa Biibiliya sinnikhaliherya vanceene, nave sinimookhaliheryani nyuwo omusuwela oratteene Muluku. Nave otthara malakiheryo a mBiibiliyani onimoophwanyihani mireerelo ni okhala mpatthani a Muluku. Ohiya-vo, munoosuwela itthu sinrowa wiiraneya muhoolo. Okathi owo nyuwo munrowa okhalana “okumi weekeekhai” vaavo munrowa anyu okhalaka mahiku otheene. (1 Timootheyo 6:​19) Itthu iyo khasiniphwanyaneya iliivuru sikina.

Nave nyuwo pooti okhalana okumi wooloka niinaano-va ni omusuwela oratteene Muluku. Nto wira mphwanye itthu iyo muhihiye omusoma Biibiliya. Woonasa wene, okathi munrowa anyu omusomaka Biibiliya, munookhalana makoho manceene. Akhala wira eyo enimwiiraneya, muhaana opaka etthu emosaru aapanke awe mulopwana a wEthiyopia iyaakha 2.000 sivinre. Owo aahikhalana makoho. Nto vaavo aakohiwe awe akhala wira aaniiwexexa ele aasoma awe, owo aakhunle so: “Kinrowa osuwela sai, ohikhanle mutthu onikitthokiherya?” * Nto aahikhaliheriwa ni Filipe, mwiixutti a Yesu, yoowo aasuwela itthu sinceene sa mBiibiliyani. (Miteko 8:​30, 31, 34) Nto yakhala etthu muhiniiwexexa anyu mBiibiliyani, mutthareke ntakiheryo na mulopwana ole a wEthiyopia. Nto wira mwiixutte itthu sikina voohimya sa Biibiliya, nvekele yoosoma ya Biibiliya esaiti jw.org, wala mulepele enderesu eri erevista yeela. Nave nyuwo pooti olavula ni Namoona a Yehova wala orowa Empa ya Omwene mwaattamenle anyu. Nto olelo vaava mpacerye omusoma Biibiliya wira nwehe moota onrowa awe wookhaliheryani.