Gesù el ga salvà persone fedele quando el ga dato la so vita come sacrifìssio. (Mateo 20:28) Par quela la Bìblia la ciama Gesù de “Salvador del mondo”. (1 Gioani 4:14) Anca la dise: “No ghen’è salvassion in nissun altro, parché no ghen’è soto el cielo nissun altro nome che l’è stà dato intrà i òmini par meso del qual gavemo de esser salvi.” — Ati 4:12.

 Gesù el ga proà la morte par tuti quei che i dimostra fede in lu. (Ebrei 2:9; Gioani 3:16) Dopo, Dio lo ga ressussità, e Gesù l’è ritornà al cielo come una creatura spiritual. (Ati 3:15) Là ntel cielo, Gesù el pol “salvar quei che i riva darente a Dio par meso de lu, parché l’è sempre vivo par giutarli”, o difenderli. — Ebrei 7:25.

Parché ne ocore del aiuto de Gesù?

 Parché tuti semo pecadori. (Romani 3:23) El pecato el ne spartisse de Dio e el causa la morte. (Romani 6:23) Ma Gesù l’è come un “advogado” par quei che i ga fede nel so sacrifìssio. (1 Gioani 2:1, nota) Gesù li giuta domandando a Dio che scolte le so orassion e perdone i so pecati par conta del so sacrifìssio de risgate. (Mateo 1:21; Romani 8:34) Dio el fà quel che lu el domanda parché l’è de acordo cola so volontà. Dio el ga mandà Gesù ala tera parché “el mondo el fusse salvo par meso de lu”. — Gioani 3:17.

Sarà che sol gaver fede in Gesù basta par esser salvi?

 Nò. L’è vera che ne toca gaver fede in Gesù par esser salvi, ma no l’è sol questo. (Ati 16:30, 31) La Bìblia la dise: “Come che un corpo sensa spìrito l’è morto, cossita anca la fede sensa òpere la ze morta.” (Tiago 2:26) Par esser salvi, ne toca:

•   Imparar sora Gesù e sora el so Pare, Geovà. — Gioani 17:3.

•   Gaver fede in lori. — Gioani 12:44; 14:1.

•   Dimostrar fede par via dela nostra obediensa ai so comandamenti. (Luca 6:46; 1 Gioani 2:17) Gesù el ga insegnà che gnanca tuti che lo ciamesse de “Signor” i saria salvi, “ma sol quei che i fà la volontà de me Pare, che l’è nei cieli”. — Mateo 7:21.

•   Seitar a dimostrar fede anca se infrontemo dificoltà. Gesù el ga assà questo ciaro quando el ga dito: “Quel che el persevera fin el fin el sarà salvo.” — Mateo 24:13.